خليل صاحبي اتصل بي من الصباح علي غير العاده …!! اهلًا ابو الخل كيفك …!!! خير …!!! قال لي الخير يجي من وين ياعلوب ياخ انا مأزوم …( مأزوم عشا ) 😆عجبتني مأزوم دي ..!! (دوما نصف بيها الأوضاع عندما تصل الذروة) ….!! قلتا لي مأزوم مالك يا ( منصور خالد ) …!!قال لي عليك الله ماتهزر ….!! ياخ انا بتهاوي ….!! (اخير مأزوم )….😳
طبعا ابو الخل صاحبنا ده زول مرهف كده ..!! ❤️النوع داك البحب فاروق جويده …!! ومهتم بالآثار …!! وبمشي المعارض بتاعة الفنون الجميلة ..!! (نحنا حدنا معرض الخرطوم الدولي) …..اها وناس (باولو كويلو ) و (غارسيا ماركيز ) والجماعه ديل بتكلم عنهم ذي كأنهم اولاد عمو ..!! وحافظ مدارس النقد الأدبي دي مدرسة مدرسة ..(انا زمان كنتا قايلا ذي مدارس (القبس ) دي يعني طابور وجلد وكلام ذي ده ) ..!! المهم حسّيت بالمسألة فعلا متأزمة …!!قلتا ليهو في شنو ….!؟ قال لي مابنفع بالتلفون …إنتا فاضي متين …،!؟ (اها خلاص قام داير يستأذن وياخد مواعيد والقصص دي …) قلتا ليهو فاضي شنو يابو الخل ياخ ….أنا كيس …!! 😁أنا اطواااالي فاضي ..!! أبقي مارق بس تعال نشوف قصتك الحزينه دي …..!! قال لي خلاص نتلاقي الساعة حداشر كده في المركز الثقافي الفرنسي …..(اها ده أنا اول مره اسمع بي ….!! (ياحليلك ياانور اخر مره واعدني قال لي نتلاقي جنب (الكوشه ) 🙈القدام بيتم ….!!) اها قلتا ليهو جدا ..هو وين المركز ده ..؟؟
قام وصفو لي ..!! مشيت …!!! لقيتو فعلا حالتو صعبه وتشفق …!! أهليين (خليلوف )…!!!
قال لي نقعد ….!!! قعدنا …!! طلب ليمون …!! (ليمون حلو حلا ..) ولا عشان انا قاعد في الفرنسي ده ماعارف …!!! المهم قلتا ليهو مالك الحاصل شنو …!!؟ قال لي انت بتعرف ياعلوب انك صديق (عميق ) ….اهااا خلاص قمنا …!! هسه انا عميق …!!! 😳 ياخ قول صديق (دسيس ) …صديق (خسيس ..) كلام ذي ده …..غايتو فوتها….!!!
قلتا ليهو ايوه …اها واصل …!! قال لي بالتالي انا داير احكي ليك عن معاناتي ….!! قلتا ليهو اتفضل …!!! المهم اخد ليهو سرحه كده بتاعة الشعرا ديك ….!! وقال كده اتدفق ….!! قال لي ياعلوب ياخ ان بحبها ..!! بحبها البت دي ….!! بعشقا ..!! مابتخيل حياتي من غيرا ..!! (كلام ذي الدهب وأغلي من شاي الغزالتين ) ..طوالي انا نطيت ….!! وهي بتحبك …!! 💕 (مافي زمن ) …!! قال لي طبعا ياخ طبعا ….!! أرجوك ماتقاطعني خليني أتتداعي …!! سكتا….!! وهو واصل ….!!! المشكلة مش في حبنا لي بعض …!! أفتكر دي مسالة مفروغ منها ومحسومه …!! (العقده ) إنّو البت دي سطحيه جدا ….!! مافي اي (عمق) …( تاني عمق..!!! 😁 (الله يمزقنا من البير دي )…!! (بعدين شنو قصة (العقدة ) اللامي فيها الزول ده …!! عقدنا نحنا ذاتو ) …!!!قول قول ياخليل…!! اداعا ….!! قال لي …لحدي هسه اهتمامتا غير ناضجه …!! بنية الوعي الفكري بتاعتا ضعيفه وفيها هشاشه..!! ومتاكلة يوم بعد يوم ) 😳غايتو انا بعرف بنات ام لعاب …لكن بت خشب دي اول مره ) ( البت دي قطع شك بكون عندها هشاشة في العظام ) ..!!ويستمر التداعي ..!! قال تعاطيها مع القضايا الكبيره فيهو شي من الاستخفاف احيانا حتي بي نبض الجماهير ( امممممك ) …!! وعندها مشكلة تاني إنّو حاصل ليها نوع من الاستلاب الثقافي …..!! (مستلبه طلعت ….!! التصبر لي ) …!!ان شالله بس ماتكون (استلبت ) ليها فستان من صاحبتا …!!! اها ياخليل قول …!! قال لي صدق دي بتعرف اخبار (انجلينا جولي ) اكتر من معاناة ستات الشاي …!!! (ماليها حق والله ) ..!! (جولي منو..!!؟ ) …قال وصلت بيها درجات الاستخفاف والاستهتار إنّو قالت عايزه تربي (كديسه) لقتا في النت ..!! بمبلغ وقدرو…!!! ونست إنّو دار المايقوما مثلا محتاج لعلبة لبن …!!! ياعلوب البت دي حافظا اسماء الفنانين العرب اكتر من اسماء قرايبا وكل أفراد أسرم …..امبارح لقيتا زعلانه زعل شديد قالت لي واحد كده اسمو ( راغب علامه ) أبو مات ..!! بتصدق ..!! 🎶…(اتذكرتا مشاعر وقت تقول ليك ياسلام علي الهضبة…!! انا قايلا الهضبة الاثيوبيه… !! طلع عمرو دياب ) ..!! واصل ياخليل …!! قال لي ياعلوب …(سحر ) دي عايشه في عالم تاني (جاب اسمها من غير مايقصد) …!!! (كلهم الذي ناس خليل ديل كده …!! غتاته مافي …!! وصدق متناهي ) ..ماعارفين في ناس لو لقو طرف الاسم بس ممكن يألفو روايه ويعملو قصة في البت دي …!!! )…اها انا القصة عجبتني شديد …!! قول ياخلي …!! عقب …!!! أقول شنو ولا شنو علوب …!!! (سحر) لحدي هسه مابتعرف حاجه عن (غبريال غارسيا ماركيز) …😳 ..(وانا بي جوه غبريال ده ذاتو منو ماعرفتو …!!! ياربي يكون الكاردينال ) …وأبو الخل مواصل …..!!! دي ماعندها فكره عن قيصر الروايه الحديثة (واسيني الاعرج ) (وده اتكسر في فاول ولا شنو ) ….!!!
علوب البت دي للان حس التّذوق الفني عندها ضعيف ..!! عمرها ما أتأملت لوحة تجريديه وجردتا من ذاتا ( اغسوم ) بالله الاخيره دي محتاجه مترجم ) ..!! قول قول ياخليل كلامك (ينفسن ) قول …!! قال لي أقول شنو بعد القلتو ليك ده …!!أقول شنو بس …!! قلتا ليهو خلصتا…!! قالي لي ايوه ..!! وحاسي أني ارتحتا شويه …!!! بس استعدلتا لي …!! قلتا لي لكن انا
ما أظن حأريحك …!! انت مش جبتني هنا وداير شورتي …!! قال لي ايوه…!! قلتا ليهو عليك الله ياخليل انت بتحب سحر دي ولا ( نوال السعداوي …) …!! ياخ حرام عليك …!! اها انا نص القلتهم ديل ماعارفم …!!هل ده يعني أني ماصاحبك …!!؟ قال لي ياخ ماتقول كده….!!! انت بتعرف انك أعزهم كمان …!!! قلتا ليهو بعرف …!! عشان كده النقول ليك النصيحه ..!! ياخ اطلع من الشخصية دي ياخ ..!! انت فعلا راجل مثقف وواعي ..!!ونحن بنحترم كل حاجاتك دي ….!! لكن كمان عايز الناس كلهم علي مقاسك ..!!! ده نوع من الانانيه ساكت …!! ياخ سحر دي مادام بتحبك ورضت بي شعرك المبرم ده …ونضاراتك الكبار …وعروقكً المشحطات ديل …!! وبنطلون جينزيك الملسلس (الناصل ) ده ..!!! مشكلتك شنو تاني ….!!!
ياخ ماتخلي البت في عالما البتحبو وانت في عالمك ….!!! ياخ مالك ياخ ..!!مالك داير تجننا …!!(جنكم تعقدو الأمور
ولو ماعقدتوها مابتتكيفو ….) هسه أمانة في ذمتك البت دي لو كانت برضو بتعرف الحاجات البتتكلم عنها دي …ما بيتكم ده
بس ما الا تكتبو فيهو لافته كبيييرة فوق ….(مركز خليل وسحر الثقافي ..) ….!! ياخ ابقي مارق ياخ …عيش حياتك ….بعدين
سحر دي لو مادايرا اديني ليها …!! انا ذاتي كايس لي واحده ذي دي ….!! ده النوع البجي (برقص )؟من خشم الباب ..!!
(تفكها لينا ذاتو ..) …نحضر أفلام لمن نقول بس ….!! ونقوم علي المسلسلات …والكديسه حايمه …..!!!شوف المنظر ده ….!! والله انا (ماركيز ) حقك ده لو جاني في البيت احتمال كبير اطردو …..!! بتصدقو خليل ضحك ….!!! قال لي ماتقول كده انا مابرضي في سحر ….!!! احي يالرز ..!!! ماقلتا بنيتا التوعويه فيها إشكاليه …..!! خليل …!!! قوم شوف حاجاتك دي ما سألناك ….!!! وأرجوك خلي للناس حاجاتا …..!!! عاين لي كداااا ..!!! وقال لي مش لي حق أتكلم معاك ..!!! عارف ..!! كلامك فيهو شي من الواقعيه..!! وانا حافكر فيهو ..!!! الظاهر انا تعسفت شويه …(تااااني الواقعيه وتعسفت ) ….الزول ده بجيب الكلام ده من وين …..!!! وقلتا ليهو وتاني بدل تتعسف ….!!! سعف مخك ده بالسعافه وقابل البت دي ….!! وضحكنا بعمق …هيااا علوب انت برضو (بعمق ) قوم قوم اتخارج الزول ده بملاك فقر …..!! وتوادعنا…!!وهو عايزني اقعد معاهو …قلتا ليهو لا انا مستعجل عندي جلسة تأمل ويوغا …!! وكتاب لي غارسيا ماشي اتمو …هو ذاتو أتكيف ….!! وانا في طريقي لسينما (عفراء ) قالو فيها جنريتر …!!! قال بنية الوعي الفكري ..!!! اديك بنيه هسه …!! …..انتو عفراء دي منو ..!!!؟
error: Content is protected !!