“يوميات علوب” (51) … ليزا جات

 Dear Allob
I am happy to convey to you the news of my presence of the hose has been selected to visit the National Museum in Khartoum in the workshop … the biggest pleasure to see you again…….Liza
…اها ياها دى الرسالة الجاتنى فى الفيس من ليزا …خلت راسى ده لافى وعيونى ديل مطششات ! ليزا جايه الخرطوم ..!!! وفى رمضان الحار ده …!!! البت دى مانصيحه ولا شنو …!! …. هسه دى اقول ليها شنو …!!! الكهربا قاطعه والجو مسخن والدنيا رمضان ..!!!
افرض قلتا ليها ..!! مش ياهم الإنجليز الشافتم عينى ديل ولا واحدين تانين ….ديل حايمين وشغالين فى نص المطره !
المباراه دى مابلغوها..!!! يوقفن الحر …!!! يازول خليها تجى الحى الله والكاتل الله …وهى ذاتا جالداهو…!!
لكن والله الرساله عجبتنى ….!! ياخ دى خصوصيه ياعلوب وتكريم لم تنله فى بلدك …!!! ليزا تخاطب علوب قبل مدير المتحف ومسؤولى الاثار …!!! كبير ياعلوب …!!!
رسلتا ليها قلتا ليها تشرفى حبابك الف ….نشيلك فى راسنا …(ما تسألونى نشيلك فى راسنا دى كتبتها كيف ) …(المهم الاحساس ….) وفعلا وقع المحظور ..!! ووصلت ليزا الى الخرطوم طوالى أدتنى تلفون انهم وصلو بخير ونازلين فى برج الفاتح ..(اسم الدلع كورونثيا) …يعنى حينزلو وين ماياهو…!! ياكورونثيا يا كورونثيا ….!! المهم قالت ده رقما فى السودان …..(طوالى جوه السيستم ماف عطله ) …قلتا ليها حبابك نورتى ياليزا ….!! الليله المسا انا معاكم ..!! قالت لى لا الليله ماتجى الساعة تمنيه عندنا اجتماع مع إدارة المتحف …!!! والله كان تمنيه مابعرفو ..!! وعلى حظك كمان ….!!! معاها تراويح …!!! والله كان جوك حداشر يكونوا أبدعوا …!!! قالت
….Specifically at eight …..
بالله شوفو براءة البت دى….!!! اها كان جوك تمنيه (تفي ) لى فى وشى ده …!!!
قمتا مشيت عليها تانى يوم ….!! بس شافتنى ليك من هناك فى (اللوبى ) بتاع الفندق وجاتنى جاريه …!! هى قايلاها ( تايتانك ) ….!! شهيدى الله اى زول خلا شغلتو بقى مركز مع الخواجيه دى جاريه وين …..!! وانا يازول حيلى مات..!! والله ياخوانا اللحظه الجايانى ليزا دى من هناك والمسافه بين كرسيها وتصلنى ….!!مرت على كالدهر
بس فى اخر ثانيه شلتا ليك تلفونى ده بطاريتو قاطعه وعملتا فيها جانى تلفون حتى أخفف من وقع
الاصطدام الكونى الحيحصل ده …!! غايتو كان وصلتنى بى حالتا دى يشهد الله فى رمضان ده لو مرقتا بخمسين جلده يكونو اكرمونى …!! غايتو هى هدنت شويه كده وانا مطيت المكالمه !!!
وهى واقفه قدامى طوالى مديت يدى ….وعامل فيها لِسَّه بتكلم فى التلفون …اوووووو ليزا ويلكوم ان كارتوم ايام سوووو هابى تو سي يو اقين …سودان هاذ زا اونر يور برزانس …!! (طبعا السلام ده حفظتو قبل مااجى) ….!! الظاهر هى بى ذكاء كده أتفهمت انو دى مالندن عشان كده ما اتحسست كتير ….(الوووووب ايام سوووو هابى تو سى يو ..!! امسسس يو سو ماتش …) ده كلو وهى ماسكا يدى وانا اجرجر فيها وماقادر اقش العرق …!!!
يد فى التلفون والتانيه فى يدها ….!! المهم فى النهايه ملصتها …!! الود البنضف فى الفندق مبسوووط يعاين ساااكت …!!! (فيلم اجنبى جاهو فى حتتو) …!!! وطوالى مشينا على الكراسى لقيت معاها راجلين وحاجة كبيره كده ..!!
( خواجات صر ) لفحة الحر بدأت فى الظهور ..!! وبدأ اللون يتحول للفشفاشى …!!! قالت لى أعرفك ..!! ده مستر دوغلاس ..!! اهلًا يادوغلاس …(الغريبه ناس الرجوبه عندهم كلب اسمو دوغلاس قربتا اقول لي …جر .. )
اهلًا ..اهلًا ….دوغلاس …(داير ينشرط من السمن …!! ) اها وده مستر جيمى ….!! اهلًا ياجيمى …!! ده بكون اسمو جمال ….!!! ودى مسز ناتاليا .. ( ينتلك النتل جدى ) …!! قدر حبوبتى …احمر الشفايف والعقد …اشدا
منى ومنك ..!! تقرض فى الفول والتمر …!! مستر الوووب ماى بست فريند …هكذا عرفتنى ليزا ….!!! المهم اتطايبنا واتقالدنا …!! واخدتا قعدتى معاهم وبدت تسألنى ليه اخبارى مقطوعه …!! قربتا اقول ليها والله بس اللغة …!!!
ورصت ليها انجليزى كتير كده فهمتا نصو ..!! طوالى قلتا ليها اتعشيتو…!!؟؟ (ده شنو السؤال البائس ده ياعلوب) …قالو ليك جايين فى ورشة عمل عن الاثار السودانيه ومعالم الحضارة …شنو اتعشيتو وفطرتو …!!!
طوالى غيرت الموضوع وسألتها عن أحوالم فى السودان ….قالت …(ات واز امييييزنغ وي أر براود تو سى زا كوبلينغ اوف نايلز ثرو زا ويندوز اوف هوتيل …!! ) زس إز انبليفابل …!!! ( توتى دخلت غينيس ) على القسم نحن القاعدين هنا المنظر ده ماشفنا …!! وهى دايرا تطير من الفرح …!! انت شفتى حاجه ….!!! بكره نوريك المويه القاطعة …!!
…المهم اخدتا قعدتى معاهم وأدتنى جدول أعمالهم ..وقالت تلاته يوم وح
تنتهي من البرنامج الرسمى وهى حتقعد تانى اربعه يوم عايزه تشوف السودان ….!! قلتا ليها تشوفى النبى ….!!! ياهو ده السودان …!! …نحن الشفنا عملنا شنو يعنى ..!! انتو الخواجات ديل جادين …!!؟ اها سألتها قبل ما امشى قلتا ليها الجماعه امبارح جوكم الساعه كم ..!!!؟؟ قالت لى ماجو خالص ….!! أحمدك ياالله …!!! المهم ودعتها على أمل لقاء بعد ثلاثة ايام ليبدأ البرنامج ألشعبى …خليكم معانا فى جولة ليزا …!! وياليزا هوى هوى !!..