أصبحنا وأصبح الملك لله …مارق من الصباح بعد العودة تلاقيني ليك ( أمونه ) بتتذكروها..!!؟ الفرتقت الحفله ديك …!!! اول حاجه ادتني نظرة تقييم عام للوضع معاها شوية تأمل …وقالت كده انبهلت …هيا ياعلوب البقيت تمشي (لنضن) …!! غايتو (لنضن ) هملت …!! واصبر يااخوي إنتا ادوك درب هناك ولاشنو الجضيمات ديل شايفاهن اتنفخن ….!!! لاحول ولا قوةً الا بالله…خلااااص أمونه شربتني ….!! بس دورتا ليك فيها قل هو الله احد ….قل هو الله احد ….!! الله اكبر عليك …الله اكبر عليك ..بالله شوفو جنس الكلام ده ..الله لاكسبك ياامونه ولا غزا فيك بركه ….!!! طبعا باقي كلاما ذاتو ماسمعتو انشغلتا بمضادات الراجمات دي ….!! بالله ده كلام ده ….خلاص جينا …!!! اها دي بداية اليوم ،…!! طوالي جليتا ومشيت …!! ذي عشره خطوات كده كبسني حجر طرتا فووووق ونزلت النوع داك البتحسا بيهو بعد دقيقتين ونص (بنج نصفي ) ألم ألم ألم غريب …(قلتا مامشكله خير تكون دي عين أمونه مرقت …) غايتو اكلتو في حناني وواصلتا المسير …
لاحول الله …!!انا الجابني راجع هنا شنو ..!!! ماكنتا مع ليزا في أمانة الله نرتشف القهوه علي ضفاف التيمز…..استغفر ياعلوب ….!!استغفر
اها طوالي علي المواصلات ٠٠٠!!! لقيت ليك الجماعه ملمومين منتظرين الحافلة …قلتا انت ياعلوب ماتبدا في تطبيق النظام الانجليزي في الجماعه ديل ..!! واهو تعمل نقله…!! اها قلتا ليهم ياخوانا رأيكم شنو نعمل صف ونركب بهدوء والاولويه تكون للجا اول …وبما إنّو انا جيت اخر زول حاقيف نهاية الصف …!!! والله ياخوانا بس طيره وبتكورك ..!! اول حاجه زول ذاتو أتلفت عاين لي مافي ..!!! ولا الزول ده بقول في شنو ….!!ولا أي رد فعل …!!! بس مجنون بتكلم ..!!
اها بفضل الله واحد هناك اتبرع قال …الله يعينم شباب اليومين ديل من (البنقو ) الكعب ده …!! (في اول رد فعل للمبادره الإنسانيه الطرحتها دي ) نطا واحد قال ليهو انت غلطان حقت (الصف ) دي بتكون (خرشه) ….!!! وانا بس ساااكت أعاين ذي الما قلتا الكلام ده ….!! اها تقومي يالحافله تجي ..!! بسسس قلتا ليهم حااااضر … الليله النوريكم الخرشه الجد جد…!! اصلو ما فيكم فايده …!! وقلتا كده وداهمتا ليك الحافلة بي يديني ورجليني …عصروني اتنين كده… !! قاومتا بشده.. ولزيت لي واحد من الزعل (ده الطلعني مسطول ) وركبتا وإحساس بالنصر لكبريائي الذي تمزق قبل قليل يتملكني…. !! واتوهطتا ليك في نص الكرسي الجنب الشباك واخدت لي نفس طوييل ..اااح ..!! وقشيت العرق ..!! وشعور بالنصر ..!! لم يدم طويلا ….!!!
حسّيت بي واحده من رجليني ديل سااااقطه…!! أبرد من التانيه….!! عاينتا كده تحتي …طوالي قلتا للكمساري دقيقه عليك الله انا نازل نسيت لي حاجه ….!!وقفو لي نزلتا …اتاري جزمتي اتقلعت وانا بركب ….!!! ينعل ابو الزفت ذاتو ..بقيت أتكلم براي (وجزمه آه وجزمه لا ) وجنس بهدله ..!!المهم رجعتا لي محل (الجزمه ) مالقيتا …!!قلتا معقول زول يشيل ليهو فردة جزمه..!! لااا لايمكن ..!! اها وقعدت اتلفت واكوس …بس ألقي ليك (كلب )شايلا متكل بيها جنب الحيطة ويعضعض فيها …!!! (ياربي يكون عرفا من لنضن ) المهم جريت عليهو كبستو طوبه بقي يتكلم براهو التافه ….!! وفكاها وجري …شلتا ليك
جزمتي منو ود الكلب….(السماح ياليزا حيواناتنا ديل الا طوبه… هم ذاتم عارفين كده ..!! ) ….عاينتا للكلب من بعيد يطنطن ساااكت …شكلو قال لي اصبر ياعلوب بلم فيك في زقاق …!!! شفتي كيف ياليزا انتو لِسَّه ماوصلتو لي مرحلة تبادل اللغات دي …
اها يازول حلفتا ما أمرق ذاتو …!! شلتا جزمتي في يدي ورجعتا البيت …لقيت الحاجه في خشم الباب قالت لي بركه الجيت الغاز كمل والكهربا قاطعه …!!! قلتا ليها هاك جزمتي دي ولعو بيهو الفحم …!! اخدت ليها ضحكه عارفاني بتاع حركات قالت لي انت شربتا ليك حاجه ولا شنو …( حتي انت يا أمي ) قلتا ليها ابدا بس بنقو وخرشه وكلب …والتحليه بي (أمونه ) …!!
دخلتا البيت اصبعي ينتح وراسي ينتح …واحي ياعلوب سيفك بسوي التح …..صدقو الجزمه الجديده لقيتا اتقدت …!!!شكلي تاني حارجع للكلب ..!!!!
error: Content is protected !!