غايتو نشيل ونتلفت فى مطار هيثرو ….!! ونسوان واقفات يبيعن فى السوق الحره ذي بنات ام لعاب …ابتسامه كده لو ماداير تشترى تشترى بس العين بصيره واليد قصيره ..(إسترليني كمان اخير الدولار) ….المهم قالو البوابه رقم 5 والجواز ده لافي من مكنه لى مكنه …بس يدخلو ليك تحت حاجه كده تسمع ..تييييت… يولع أخدر …ويدوك لىهو زول بتكلم معاك مافى….. ومعاها ابتسامه حنينه كده نهاية كل معامله ….وأمنيات برحله سعيده ….بس ياها دى الإجراءات…!!!
اها الطياره وصلت مطار الخرطوم حاولى الساعه خمسه ونص كده ..وانا مشتاق شديد للبلد….. (البسمعك يقول ليك سنتين ياعلوب …) غايتو نزلنا من الطياره ..وقالت كده السموم لفحتنا بعد الترطيبه الكنا فيها دى ….اها نزلنا لقيت لى ذي تلتاشر نَفَر كده لافين تحت الطياره ….ساااكت كده بس بدون سبب…!! (انتو ديل منو ….!!؟ وبدخلو هنا كيف ..!! ) ياربى بكوسو ليهم فى حاجه رايحه …!!! والله ماعارف …!! .المهم كانو جنبى كده فى الطياره أسرة سودانية الظاهر مطولين من البلد يعاينو بالشباك ساااكت (حباب السياح ) وعندهم بتين صغار بس (توم اند جيرى) يورجغن الرحله دى كلها…..!!! اها فى سلم الطياره واحده منهن قالت لى أمها
اوووه.. مام… اتز سوووو …هوت ..!!!… بت اللذينا …!! انت شفتى حاجه…!! أبقى مارقه بس …!!! كلها يومين وتعوسى …!!!
المهم يازول جانا البص ابجضوم داك وخمونا ليك شماعه على الصاله …اها اترصينا فى الصف …وفى ناس كده يحدرو لينا ساااكت …انا قلت ياربى يكون فى زول قال ليهم علوب ده مشى اجتماع المعارضه ولا شنو !!! المهم وصلت ليك الزول بتاع الجوازات ده اديتو الجواز شالو يعاين فيه مساااافه كده ويقلب فيهو …التقول (دكشنرى ) ..!! قال لى هو انت ذاتك مشيت كيف ماخاتمين ليك كرت الالزامية …!!!؟ إلزامية شنو كمان … !!! هسه ده كلام ده ..!! هو انا مشيت وجيت إلزامية شنو تانى …!! قلتا ليهو ياخ الكرت ده ببرزو ….مابختمو …اريتنى كان ماقلتا ….!!! اها كييييف أقول لي كده …!! شكلو داير ليهو معاى سبب …!! قال لى كمان داير تورينا شغلنا …!!! وتانى رجع للفحص والتدقيق …! ان شاء الله بس ماتكون ملاريا…..
لا حول الله ده استقبال شنو ده …!! زهجنى زهج …..!!! قلتا انشاءالله يقول لى مابندخلك …!! ارجع محل جيت …!! ياخ الزول ده قدر الشوق الفينا جهجهو …!!! المهم ختم لى الجواز داير يقدو ……لا وكمان فى ورقه جديده كيتن فينى …!!! (خلاص قرض ليهو صفحة) ….!!! ياربى يكون زهجان من لندن المشيتا دى ….!!! غايتو ده لو وريتو صورة ( ليزا ) كان طبلنى … …!!! انتو صحى الناس دى مصرصره كده مالا ..!!!؟ تكون السخانه..!!؟؟ ولا فى زول مات …!! ولا فى شنو ….!!!؟ ( ياحليلك يالندن ….) والله الصاله فرن بس …(غايتو اتفلهمتا ياعلوب …) اها مشينا على السير نعاين العفش بالخرم داك ….!!! بس منتظرين العيش …..!!! والجماعه اها جا …!!! لا ماجا …!! حليلنا نحنا حياتنا نصها معدنها جا ولا مجا ….الكهربا جات ولا ماجات …..!!! العفش جا ولا ماجا …..!!! المهم امكن قريب ساعه كده حتى الشنط جات …!!! غايتو خميت الشنطه (الحمد لله هى واحده بس) ….ألقاها ليك مشختنها بى صليب كبيير بالطبشيره التقول انا البابا …!! هيا ياخوانا دى شنطه ولا سبوره …!! الطبشير ده شنو !!!!!! ….طوالى ساقونى بى هناك ….وانا عارف مافى اى حاجه …قالو لى افتح الشنطة دى …(مجرم بس ) ..!! قمتا فتحتها…. قال لى عندك اجهزه كهربائية ….!!!؟ ضحتكا ضحك ….قلتا لي افرض عندى…!!! هى وينا الكهربا …!!! (ماقدر يرد على ) يقول شنو ذاتو !!!…قلتا ليهو أبدا ….المهم لما ليك فى الشنطة دى صاتا من اولا لى آخرا مالقى حاجه …!!! قال لي …يالله امشى ….!!! قرب ينهرنى ….!! ياخ انا زايرك فى بيتكم …!! المهم ضايرتا شنطتى شلتها …..قلتا الحمد لله افراج ….!!! وماشى طالع …. لمن ليك فينى بتين …!!! مساخة السنين ( إكمال دورة القطامه بنجاح )
اها ديل لازم يتأكدوا انو دى شنطتى ولا سارقا …..!!! والله جد …!! لازم يشوفو الرقم ويطابقو مع الشنطة ….يعنى انت حرامى حتى يثبت العكس …!!! المهم بعد التحرى أطلقو سراحى ….!!!! )
اها بس عينى من هناك لى ناس مشاعر وفطوم وعبير والحاجه واصحابى ناس جعفر وإبراهيم وخليل وأبو النور …يادوووب كده روحى ردت …!!! يازول جو على من هناك دايرين يشيلونى شيل ….صدقو فاطمة بكت ….!! ياحليلك يافطوم …(اها دى والله مش تجيبنى من لندن ….تجيبنى من اى حته….) بس والسلام …وناس امى ومشاعر والاحضان والاخوان …وحمد لله على السلامة …والبلد نورت ….وأنور صاحبنا بالأمجاد مغسله واقفه بره …!!والعجلات مدنها اورنيش …!! والترتر يقول ياغربتى ….وصورة الحوت معلقا بى ورا …وابتسامتو ديك البطمن … وبالخط العريض …زاد بى لهيب الشوق …!!! ( انتا الناس الجوه ديل ماشافو ضحكتك دى ياجان ) …!!! المهم كلنا اتخمينا وركبنا وقالو لى ريحتك (لنضن… لنضن ) ياعلوب … وانا داخل فى الدور التقول لى سنه….. وكمان بسأل من الاحوال كيف …!!! قالو لي مافى اى حاجه ياها السخانه… والكهربا..!! وفتحو غسال جديد فى الحله…..!! لكن طبعا ذات العذوبة والجمال …وشغلو الشريط فى العربيه وربوها احتفالا بالعوده …طلعنا شويه قلتا ليهم…..!! انتو الكهربا دى قاطعه ولا الدنيا دى مضلمه كده مالا ..!! جعفر قال لى اهاااا قمنا للحركات الماياها ….الكهربا شغاله الليله ياعلوب…..الظاهر لندن دى بوظتك ….!!! غايتو ضحك وونسه لحدى ما وصلنا البيت …!!! اها الجيران ديل بالصف جو يسلمو على …التقول فزتا فى (زا فويس ) ….بعد داك طلعتا الهدايا للاخوان …علاقات مفاتيح لى ناس جعفر فيها ساعة (بيغ بن ) جعفر قال لى قبلناها الا الفيك اتعرفت….!! هى وينا المفاتيح البجيبو ليها علاقه …الا انور أتكيف قال دى بتعمل جدعه مع الأمجاد ..!!! قلتا لى ياجعفر انت قايلنى لندن دى انا مشيت ليها سفير ..!!! وفقعناها ضحكه ….!!! صدقو جعفر حضنى شديد قال لى ياعلوب ياخ والله كفايه جيتك لينا راجع …بالجد دى أحلى هديه …!!!! واخد ليهو سكته كدااا وعاين لى ….!!! قال لى كنت خايف ماتجى …!!! وبكى ..!!!
المهم فضلو ملصقين فينى …وفرحانين بى جيتى …ودايرين احكى ليهم عن الرحله ….قلتا ليهم الا بكره… الرحله طويله وأنا مرهق …..!! خليل ضحك لما انتكى قال لى اول مره فى حياتى اشوفك مرهق …!! لافى فى الخرطوم دى ذي كلب الحر….!!! صحى لندن بوظتك …!! لكن كلها يومين (والبنج ) ده بفك وترجع تستغفر …!! بالمناسبه كنّا عازمنك فتة فول الا بننتظر اليومين ديل يعدو على خير …!!! قلتا ليهو لا لندن دى (حقنتا ) بتاخد أسبوع ….!!! وضحكنا حتى الغشيان (اها دى فى لندن مافى )……!!
بعد داك ..ديل مشو ….!! استلمونى ليك ناس مشاعر وعبير وفطوم والحاجه…. اها ياعلوب ان شاء الله اتبسطتا ولندن كيف ….!! واشتقنا ليك موت …!! والصور جاتنا..!!حال السرور …قلتا ليهم النصيحه لندن سمحه …لكن انتو ألقاكم وين ….!!! وطلعتا لى امى توب (شبردبوش ) الماخمج والله دايرا تزغرد …!!! شالتو قالت توب لندن ده الا المناسبات الرسميه …!! المهم وناس عبير وفطوم ..لبسات ..ومشاعر طبعا متابعة النت ده كان غشيتا بتعرفنى…(لازم ماركه …) اها دى اكتر زول كلفنى بس الحمد لله اتبسطت …وعملو لى داك يا الشاى المقنن أتذكرت (لاتييه ليزا ) بس بالجد ده طعمو أحلى ….ياحليل ليزا.. تانى الا فيس بوك ….
المهم رغم الحال …تنفست آمنا مطمئنا فى ذلك المساء السعيد….!!! عوالم لندن تلوح فى الأفق….!! وواقع السودان يلف المكان…. !!! والله يسوى الفيها خير …!!! النقوم ننوم … !!! ونقوم عليك ياخرطوم …!!! ارقدو عافيه……
error: Content is protected !!