لاحولا ولا حولا ..ده شنو ده ..!! وده كلام شنو ..!! انعل ابو الطب ذاتو …!! دى دكتوره ولا طياره..!! ولا الحاصل شنو …!! اها مشيت اليوم داك بى وجع ضرس النوع البحميك النوم داك ..طوالى حولونا لى دكتوره سلمى …وياااخ انا من سلمى وعيون سلمى …وحلات سلمى ..دى جات من وين دى …قيامه وربطت ..سماحه…سماحه ..سماحه فايتا الحد ..والله ياخوانا دخلتا كده ..قالت لى اتفضل ..ومعاها ابتسامه كمان …!! يشهد الله انا فلجه ذي دى فى حياتى مالاقتنى (قوس النصر ) ( اصلو اى بت عندها فلجه بتكون ماعاديه ) ….مش ذي هنايه ديك فى الحله ..سنها مترومه عاملاها لينا فلجه (الكلام ده تقوليهو لى زول ماعندو حديده ) ..عليك الله خلينا ….!! اها نرجع للسنيوره ..قالت لى خير فى شنو ….!؟ والله انا ذاتى نسيت جاى لى شنو ..!! بتصدقو …هى ذاتا لاحظت انو انا انا مابراي …المهم طوالى قلتا ليها ..ضرس ..ضرس ..قالت لى خلاص اتفضل اقعد فى الكرسى …اها مشيت طلعتا فى الكرسى الكبير بتاعم ده …!! والله البت دى الساعه القالت كده لبست (الجوينتيات ) ديل ..بس مرت الامير وليم داك بتاع بريطانيا ..!! اسمها منو ..!!؟؟ ياخ الولدت قبل شهرين دى ..!! وليم يطير …!! خلونا فى الوطنية دى ..المهم انا مشنقل فى الكرسى ده وقالت كده جات على …شايله ليك المعالق بتاعتم دى ..قالت لى افتح خشمك ..شهيدى الله انا فى اللحظه دى كنت عايز ارورى واقطع لى مسدار ..!!
غايتو لما هبشت حنكى ده ..شفتو الزول الكفتو شيطان …!!! بس دى ياها حالتى…..
وبدت ليك تعاين وانا فاتح خشمى ذي الأبله …وشحدت ربى اصلو التفتيش الدولى ده ماينتهي …وصدقو الضرس الحمانى النوم قاعد مكرفس ذي الحمامة اصلو ماقال بغم ..!! (ماعامل فيها عنتر تنبح الليل ده كلو ….!! ). مالك صنيت ( جاك الموت ياتارك الصلاة ) المهم بعد داك رجعت مكتبا ..قالت لى تعال ..جيت ..!! قالت لى شوف ياسيدى ..! اها انا وقت قالت لى ياسيدى داير يغمى على …قالت لى ده ضرس العقل بايظ ومنتهي …!! (هو انت خليتى فيها عقل ) قلتا ليها اها ..!!؟ قالت لى فى حلين ..!!؟؟ اننا نقلعو خالص …او نكتل الجذور ونخليهو منظر بس …قلتا ليها والله الراى رايك ..(التقول داير أخطبا …) بى قلبى قلتا ليها تقلعيهو …!! ترميهو ..!! تكتلى الجذور …تقتلينى انا
ذاتى ..!! المهم اى حاجه منك …!! اها قلتا ليها وكتل الجذور ده بياخد زمن …!! قالت لى ايوه ذي تلاته جلسات …قلتا ليها بسسسس نكتل الجذور …!!! (سلمى تلاته مرات .) .ياما انت كريم يارب …قالت لى اوكى ..انت اسمك منو ..قلتا ليها علووووب ..قالت لى خلاص ياعلوب ..(قربتا أقول ليها عيديهو تانى ..!! الا خجلتا …) انا حاكتب ليك جلسات للجذور …وهو الالم ده من زمان ولا جديد …(قلتا ليها بى قلبى الالم بدا هسه بى شوفتك دى …) لا أبدا جدييييد لنج ..غايتو اخدت ليها ضحكه كده ..انا كأنو أدونى درب …صدقو ظهرت نونات …!!! (ده ياهو البسموهو يديك لمن يرضيك …) غايتو انا شفتا دعايات صابون بدره أشكال وألوان ذي بياض (اللاب كوت ) بتاع سلمى دى مالاقانى …ولا الأسنان ولا العيون …أقول شنو وأخلى شنو …المهم شلتا الورقه وطلعتا منها أغنى لما وصلتا البيت …اللليله وين انا البى العصر مرورو …والدكاترة ولادة الهنا ..
غايتو ده احسن مرض بجينى فى حياتى ….قلتا لى ضرسى ..عافى ليك سهر امبارح كلو ..طلعت فعلا راجل ضرس …ويايوم بكره ماتسرع ..صحيت من الصباح قشرتا واتريحتا ..والضرس ذاتو اليوم داك ماقال بغم ..(يكون خدران من عيون سلمى …) وفورا الى العيادة رغم انو المواعيد الساعة عشره ..المهم قاعد كده ..ندهو أسمى ..علوب اتفضل ..دخلتا لقيت ليك واحد أربعة فى أربعة …(مصارع بس ..) قال لى انت علوب …!!؟ قلتا ليهو ايوه …!! قال لى خلاص اطلع لينا فى الكرسى ده ..(شوف اللغه ذاتا ). اطلع لينا …!!! يطّلع فيك قطر ….!! قلتا ده هسه الجابو شنو …!! لكن بينى وبين نفسى قلتا ليهم حق …!! ذي سلمى دى لازم يكون معاها (بودى جارد ) يحرسا ويجهز الملعب …!! ويجى بعد داك ميسى ده يتفنن….!!! اها وقت لَبْس (الجوينتيات ) انا قلبى اكلنى شويه ….!! قلت ليهو خير…!!؟ قال لي انت مش عندك جلسات لى كتل الجذور …!!!؟ قلتا ليهو ايوه …!! قال لى وطيب بتسأل مالك ..!!!؟ قلتا ليهو والدكتوره وين ..!!!؟ قال لى الدكتوره مافى بتجى مره فى الأسبوع ..!! انا الحاعمل ليك الجلسة ..!! عندك مانع ..!!!؟؟ (معاها حدره ..) قلتا ليهو مانع فى شنو ..!!! نحن عايزين نتعالج …!!! (وانا المغسه دى من جوه شاقانى…) عاينتا كداااا …!! قلتا ليهو يازول أقول ليك قوله …!! بلا جذور بلا شجره …حقو تقلعو لى طوالى …وهو ماكضب قال لى احسن برضو …!!! (جارى للقلع انتا يقلعك الله ..) طوالى ماكضب جاب كماشتو ديك وجانى وقولة كععععععع سلمنى ليهو فى يدى دى …وحشا لى خشمى ده قطن ..قال لى خلاص مبروك قوم اتخارج …وانا خشمى ملان قطن …قلتا ليهو يبركو فيك خنق ان شاءالله (وهو مافارز كلامى ده …) وانا الجاى لى دكتوره سلمى ..جيت لقيت الحمى ..الحمى يايابا اليلمسوها بالعود شاحد الكريم … ياربى الملاريا مابتودينى لى سلمى دى …!!!!
error: Content is protected !!