اها انا راقد كده جوه الاوضة سامع ليك عمورى ود جيرانا الصغير ده بتكلم مع الحاجه قال ليها رسلتنى ليك امى قالت ليك متين حنمشى لى ناس هنايه ديكا ……اها قدر ماحكا راسو ونحتو الاسم طار ليهو …..!! وبعد مجاااابده ومناهده … ..قال ليها… قالت ليك متين حنمشى لى ناس المره ديك …..!!( براى ضحكت .) .لكن استغربت لانو امى عرفت المقصود دون ان يفصح الصغير …طوالى ردت عليهو …قول ليها بكره العصر …اللليله جايننا ضيوف …عمورى قال ليها نحن ذاتنا عندنا ضيوف كتااار ….!! هنا تحركت عند الحاجه قرون الاستشعار ….وطوالى استفسرت ..!!! ضيوف من وين ..!!؟؟ عمورى تانى قعد يرترت …!! اها هنا امى ماتنفع معاها الرترته فى الحتات الذى دى .. دايرا جواب سريع ….وشدة ما الشمار كتلا (يطول لى فى عمرها ) قالت لى عمورى اقعد حبيبى مالك واقف …..!! هيا عمورى البقيت زول ..عمورى طوااالى أداها قعده …..وهى قعدت جمبو …ضيوف منو ياعمورى ….!!؟؟ قال ليها امى قالت من السعودية …اها هنا الحاجه صلحت قعدتا …لا يعنى جوكم بى شنطم ولا براهم…!!؟ وعمورى يعقب ….لا لا لا ماشايلين شنط لكن هم شايلين حاجات …!!! طوالى اسمع ليك امى …يامشاعر …!!! مشاعر …(زول ردا عليها مافى ) ….طوالى استعملت الاسم الحركى …يامقاشر …البت دى طارت وين …!!!؟ جاها الرد من بعييد ااااى يا امى انا بغسل فى شعرى …يغسل طعمك انت ( قايله مستغفره ) (انه قلب الام يفلق ..ويداوي ..!! انت شعرك ده بغسلوهو كل يوم…. ان شاءالله يتحتا يرقد فى بطن الواطا دى (خايفه عليها من الصلعة والبوره) مشاعر تتجاوز …!! وترد بعد مساااافه …فى شنوووو ..!!؟ كنتا دايراك تجيبى الشربات لى عمورى ده …..!! 😳😳اها انا جوه اضنينى ديل وقفو …شربات ..!!!؟؟ وعمورى ..!!؟ عمورى شنو كمان البجيبو ليهو الشربات …(وإذا عرف السبب بطل العجب …) يبدو انو عمورى سيتعرض لعملية استجواب كامله ولابد من تقديم حوافز …!! والله امى بى جلالة قدرها مشت المطبخ جابت عصير للولد ده ،…هو كمان ماصدق شنقل ليك رجلينو الوسخانات ديل فوووق فى الكرسى ..وبدا يشفط فى العصير ..اها جقم ليهو جقمتين لمن عيونو دمعن …وبدأ الاستنطاق ..!! وبى حرفنة تضاهي المخابرات الامريكيه …يعنى سؤال كده كأنو مامقصود ..ماقلتا لى ياعمورى الضيوف ديل من وين …!!؟. ماقلتا ليك من السعوديييه ..!!! (عمورى حسا بالعظمة ..) اها قلتا لي جابو حاجات ..حاجات شنو …!!؟؟ كراتين ولا شنط ولا شنو ..!!!؟ عمورى قال ليها لا لا جابو غويشات …!! اها هنا الوالدة اوشكت ان يغمى عليها …..وبى سرعه كوركت …!! اجرى تعالى يامشاعر ..الظاهر صحبتك خطبوها …(صحبتك دى قاصده بيها صفاء اخت عمورى …) انتى اقعدى عديها لي غسيل شعر …(اها انا هناك يادوب جمعتا …) امى حللت معلومات عمورى انو الضيوف ديل جماعة جو يتكلّمو فى صفاء ..(ومثل هذه الأخبار على جمالها تزعج النسوان العندها بنات …ولم ياتى عريس بعد) مشاعر ذاتا يبدو انها متابعة الحوار عن بعد ..لانها انضمت للجنة التحقيق مع عمورى من اخر حاجه …( الظاهر الشمار ده جينات …) غويشات لى منو ياعمورى ….!!؟ هنا السؤال لى مشاعر
عمورى ذاتو لمن حسا انو زول مهم بدا يشفط فى العصير بتاعو بى سرعه ….بكون حسا انو القعده دى حتطول وقافل يشرب ليهو كباية تانى ….!! قام قال ليهم الغويشات لى امى ..(اها الإجابة دى ريحتم شوية .) ..لكن الحاجه عقبت بسؤال …اها الضيوف ديل معاهم رجال …(اصلو هنا عمورى مانطق …) طوالى امى قالت لى مشاعر ..حلاااتو عمورى …فالح جيبى ليهو الحلاوة يامشاعر ..(والله جد جد جابو ليهو الحلاوة ..) عليك الله شوف اللقيتا ياعمورى ..!!! (عمورى جابو سيرة الحلاوة ريالتو سالت …وقعد يتمطق ..!! ) طوالى رجع لى للإجابة ….قال ليهم لا لا مامعاهم رجال ..( وعاد بالأزمة للمربع الاول ..) ياهو بس صفاء خطبوها وجن النسوان ..!! (براهم كده وصلو للنتيجة دى ….) وعمورى بتلفت ذي الطيره …مافاهم انو بيخضع الان لأكبر عملية تحقيق واستجواب …قال احسن يتبرع بى كلام تانى يطول القعده …قال ليهن …والله جابو لينا خروف كبير …(كده بس بدون اى مناسبه ..)مشاعر من غير ماتشعر قالت ليهو الخروف اليبلعك ..!! خلينا فى الضيوف ….لم يتاخر الرد من عمورى …يبلعك انت دى براك ..(امى لما ضحكت ) …لكنها كانت حريصة ان يظل عمورى هادئا حتى يدلى بكثير من الإفادات ..ولكن يبدو ان صاروخ مشاعر أفقده جادة الصواب فعقب …امى ذاتا قالت مشاعر بقت سمينة ..!!! امممممك سادت حالة من الصمت استمرت دقيقة ..انفجرت بعدها مشاعر ..وهى أمك شن عرفا لابسه نضاراتا ديل ..!! متين بقت تشوف …(صدقو عمورى ضحك …!! ) وتدخلت الوالده …عليك الله شوف المره المابتخجل دى تقول على بتى سمينة …مؤكلاها انت يايمه ولا مشرباها …انا هنا شعرت انو هذه الأزمة قد تشتعل وتخرج عن السيطرة..!! طوالى جيت مارق من جوه ..فى شنو ياخوانا ماسكين الولد ده مزرزرنو …وسقطت وقتها عن عمورى كل حصاناته الدبلوماسية …وفقد كل امتيازاته كعميل …حيث فاجأته مشاعر …نزل رجلينك الوسخانات ديل من الكنبة دى … …(ولقب سمينة الذى أطلقته ام عمورى يسيطر عليها …) قال سمينة قال هى ماشافت البقره المعاها دى ….فى إشارة الى صفاء …ايقنت انا وقتها انو الشمار بجيب دمار …مسكين عمورى تم الاستغناء عن خدماتو ..باقى العصير الجديد ماكملو ..هو ذاتو اتخلع لما شاف التغير فى المواقف الدولية دى ونطط عيونو والله لما حنّيت على ..المهم لملم باقى بنطلونو الناصل ده وعايز يتخارج بس …والله انا الضحك كاتلنى
معقوله ديل امى ومشاعر المسكينات ديل …!! (والله صحى مافى مره مسكينة ..) .غايتو ياعمورى كيفتنى فى حنانى والله ياخوانا لحقتو بى باقى العصير فى الباب ..صدقو كتحو ذي المافى حاجه ..وشكرنى بى ضحكة تدخل القلب …خلا ليك مشاعر وامى ديل يهرجن براهن …غايتو فى النهاية صفاء ماخطبوها..!! والجو ديل طلعو أهل أمها جو من السعوديه …والغويشات طلعو دهب صيني …(هسه معلومات ذي دى ويكيليكس بقدر يجيبا …) اها ديل جابوها غايتو البركة فى شحم مشاعر دى …!! وناس امى ماحيقدرو يواجهوهم لانو الشاهد قاصر واستجوابو
جريمة يعاقب عليها القانون ..!! غايتو …قطعنها فى مصارينن …!! وتانى يوم مشن هى وأم صفاء مشوارن ذي الماحصل شئ ..لكن السويتا ياعمورى رقدت ..والبتشربو ينفعك …عفيت منك يااب بنطلونا ناصل …
error: Content is protected !!