سعيد الدرويش احد علامات حلتنا البارزة اصلو لا بسأل زول ولا بتكلم مع زول ..جلابيه واحده ..وطاقيه تخفى شعر مبعثر وملامح معجونة بى جدية وطيبة وزهد ….بس تلقاهو ماشى جاى مخيت الشارع ده خياته …مما قمنا لقيناها كده حكمة الله بسلم بس على الشفع الصغار ديل وبضحك معاهم اظنو عارف انهم بريئين… ومابياذو زول ..ماشفتو يوم فى حياتى بياكل ولابشرب قدام زول …بنات الحلة بستبشرن بيهو… قالن البضحك ليها سعيد طوالى بعرسوها …(وانا أقول مالن بتجارن كده قدامو ) وهو وحاتكم ولا بتلفت يعاين ليهن …بس بعاين قدامو وبى اهتمام كده وتركيز كأنو سايق عربية …مافى زول عارف سعيد ده جا من وين ولا ماشى وين ..لكنه مع الزمن صار جزء من نسيج هذا المحل …وركن من تفاصيل هذا الشارع …وعلامة من علامات الحله …اها يوم الجمعة الفاتت جيت راجع من الصلاة لقيت ليك سعيد ده متكوم كده فى ركن …وذى النايم …قلتا فى قلبى ياربى سعيد ده مالو الليله..!! دى ماعادتو ياربى مالو ..!!!!!؟ المهم مشيت عليهو كده وقفتا جنبو ..عاينت ليهو كدااا ..!! رفع راسو عاين لى ….وذي داير يقول حاجه لكن ماقادر …قعدت جنبو فى الارض قلتا ليهو مالك ياسعيد …!! انت حاسى بى حاجه…. عيان ..!!!؟؟ تانى قلتا هو هسا حيفهمنى كيف ….!! قمتا أشرتا ليهو كده بى يدى على بطنى وغمضت عيونى يعنى انتا موجوع .. ..وهو بس بعاين لى …لكن حسّيت بالحزن ده فى وشو …هى ياخوانا الزول ده مالو …وهسه يسألو منو عن حالتو… ده الشخص الوحيدالماعندو زول يسألوهو منو …والله حننى شديد الليله …!! مشيت البيت جبتا لى اكل ..!! قلتا امكن جعان …عاين ليهو كدااا … ولا تعليق..!! ولا مدّا ايدو عليهو …تتخيلو كمان زحا الصحن ده بى يدو ..يعنى القصة مااكل ..وبعدين ياأخوانا …. الزول ده مالو الليله …!! انا فى قعدتى دى جا مارى بى ود جيرانا اسمو انور ..ناديتو .يا انور ..انور ….أتلفت على وجانى قلتا ليهو والله غلبنى عدييل انتا سعيد ده مالو ….!! انور انتبه انو فعلا اول مره يشوفو قاعد ..قلتا ليهو لكن نعرف كيف هسه …كدى نحاول نرفعو نوديهو المستشفى …فعلا حاولنا نرفعو كده ..!!! واريتنا كان ماحاولنا …!!! والله سعيد ده فضل ليهو يبكى بس ..الم …الم شديد ظهر فى ملامح وشو ..عرفنا فى حاجه ماياها ..طوالى جبنا لينا عربية قلنا مافى حل غير المستشفى فعلا انا وأنور وسواق الامجاد رفعناهو …لقينا رجلو دى وااارمه والرجل التانيه فيها اثار ضربه شديده …اتأثرنا شديد …..!! المهم هو يعاين لينا كده لاحول له ولاقوة ..وصلنا المستشفى ..الدكتور شافو قال الزول ده ضارباهو عربيه …ويبدو رجلو واحده انكسرت والتانيه فيها اثار ضربة قويه ..مسكين سعيد ضربتو عربية وسابتو كده مرمى ومشت …..!! لاحول الله ….بالله ديل بشر ديل …!! هسه الزول الضربو ده ينوم كيف ..!!
المهم جبصو ليهو رجلو… ولفو التانيه ..وقال ممكن تاخدوه البيت ..!!(عن اى بيت تتحدث يادكتور.).!! الزول ده بيتو الشارع … اها حكينا للدكتور قصة سعيد….!! والله الدكتور ده قرب يبكى ..!! قال خلاص بنرقدو هنا انا متكفل بكل مصاريف علاجو ..لكن عايزين زول يوقع لينا هنا انو مسؤول عنو..!! طوااالى انا وقعتا ..(.ده ماسعيد كمان …) سعيد عاين لى كده شديد ادانى نظره لن أنساها فى حياتى كلها شكر وتقدير وامتنان ولم ينطق بحرف …وأشر لى كده انو خلاص يعنى انتو امشو شوفو شغلكم …قلتا ليهو لكن ياسعيد ونخليك لى منو وانت بالحالة دى ..(قلتها ساكت كده دون اى توقع لرد فعل منو …) تتخيلو الإجابة كانت شنو أشار باصبعة الى السماء …!!! آمنت بالله . ….سعيد القايلنو مرمى الله طلعنا نحن المرميين … ..نم سعيدا ياسعيد
وأبشر بطول عذاب يالضربتا سعيد فللسعيد ربا يحميه …!! اها انتا البحميك منو …يوم يجئ ربك والملائكة صفا صفا ….مشكلة الناس لافين ساكت ومغبيين ماعارفين انو الدنيا دى مسؤول منها ملك …وكلنا عبيدو انا والدكتور وسعيد …والسعيد من يعرف الطريق ..سعيد بى رجلينو المكسرات ديل ..شد الرحال الى الله …ونحن الماكلين وشاربين ديل …نضله احيانا …هسه بالله منو السعيد نحنا ولا سعيد …..
error: Content is protected !!