فطوم اختى الصغيرة جات من المدرسة تعبانه ووشها ده مخطوف جو معاها صاحباتا متكلّنها تكيل …لَقِيتُم انا جنب الباب داخلين بيها البيت ….اتهجمتا شديد ..!! فى شنو يافطوم مالك..!!؟ لقيت خشما دا ناشف وعيونا دى ماقادره تفتحن ..!! سالتا البنات فى شنو ..!!؟واحده قالت لى لا لا هى كانت كويسه والله… لكن بعد شوية كده وقعت فى الواطا …اها انا هنا خلاص الفينى كملت..!! قلتا ليها وقعت كيف فى زول لزاها ولا فى شنو ….!! ديك قالت لى ورب الكعبه برااااها وقعت والله مافى زول لزاها …انا هنا حسّيت انو فاطمة دى مابراها… المهم شلتها من جنب الباب دخلتها جوه… عملنا ليها عصير شربت منو حبه قالت مادايرا …!! مع انها بتحب العصير ..!! وعندها شوية حمى ..المهم مشاعر اختى ذاتا اتخلعت شديد ..!! وامى كانت مافى جات من بره تجرى كلموها البنات ..سجمى فاطمة مالا ..!! طمناها كده انو مافى حاجه ..بتكون مرهقة بس ولا ملاريا …فى شنو ماتتخلعى ياحاجه ..!! لكن انا بينى وبين نفسى كده قلقتا شويه لانو وانا شايلا من بره حسّيت بى جسمها ده ماطبيعى ..المهم طوالى مشيت بيها المستشفى ..بعد تعب جات دكتوره كده شافتا قالتا يفحصوا ليها الملاريا ..المهم طلعت مافى ملاريا ..قالت خلاص ماف حاجه ودوها البيت بكون تعب بس ..انا ما اقتنعتا ..بالليل مشينا بيها لى دكتور وصفوهوه لينا …لقينا صف طويل عريض وقروش …كشف طويلة عريضه ..!! لكن طبعا كلو يهون فى سبيل فطوم..!! المهم الدكتور شافا كده وكشف عليها ..حسّيت بيهو مامرتاح ..قال البت دى لازم تعمل كم فحص كده كتبم فى ورقتو من التحاليل ..ومن هناك على المعمل أخدو كل العينات وقالوا النتيجه بكره ..المهم غايتو دفعنا العندنا كلو وسقناها البيت وهى لِسَّه ماحاسى بيها كويسه… رغم انو كتب لينا حبوب كده قال بتخفف الالم وبتنزل الحرارة ..ولا هى ولا نحنا نمنا ..المهم انا طبعا بقيت بس مشغول على البت دى ..تانى يوم مشيت جبتا النتائج ..قلتا لبتاع المعمل خير فى حاجه ….!!!؟ قال لى أبدا ماعندها حاجه دمها نازل شويه لكن مافى حاجه مقلقة ..لكن شوف الدكتور بقول شنو …!! انتظرنا المسا مشينا للدكتور شاف النتائج ..كشف عليهاتانى قال البت دى لازم تعمل رسم للقلب ..!!!؟ انا هنا اتبرجلتا ..!؟؟ فى شنو يادكتور خير انشاءالله…!!؟ قال لى لا بس انا شاكى فى حاجه وان شاءالله خير …قلتا ليهو شاكى فى شنو ….!! امى دى أصلا ماقدرت تقيف ..!ومشاعر عايزة تموت من القلق ..وفطوم المسكينة تعاين لينا وما مقدرة خطورة الكلام ..اها طوالى على رسم القلب قالو بى مليون ونص ونحن من امبارح دكتور وتحاليل مليون ..ده كلام شنو ده ..!!!مشيت طوالى بعتا الموبايل …!! وعملنا التخطيط اتضح انو قلب فطومة الصغير فيهو مشكلة …والسبب انو اللوزات بمرور الزمن بتأثر على القلب ..!! الدكتور قال البت لازم تتعمل ليها عملية لإزالة بعض الترسبات فى صدرها والناتجة من التهاب اللوز لانها بدت تؤثر على عمل القلب وإذا لم نتدخل جراحيا الان الأعراض دى قد تتحول الى حالة اكثر خطورة بس هى لحدى الان تحت السيطرة …!! ….اطمأنينا شويه لى كلام الدكتور ده ..!! لكن مشاعر اختى قعدت تبكى شديد لمن خلعت فطومة ذاتا ..قالت مشاعر مالا بتبكى ….!! قلنا ليها ابو صاحبتا مات ….!! صدقو فطومة قالت ليها ماتبكى يامشاعر مالناس كلها حتموت ….!! اها هنا انا ذاتى بكيت لحدى ماطلعتا من عيادة الدكتور …!! بكيت شديد …!! ياربى نحن ناقصين ….!! دى مصيبة شنو دى ..بس بى سرعة استغفرتا …ورجعتا للدكتور قلتا ليهو اها العملية دى انشاءالله بسيطة المهم طمنى وقال لى دى عمليه اكتر من بسيطة وإذا بقيتو عليها ..وصف لى مستشفى كده قال لى انا بجى هناك بعملا ليها المهم شكرتو ورجعنا البيت ومن الصباح مشيت المستشفى الوصفو لى ده معاى الأوراق شافوها كلها قالو لى تمام ..العملية بتكلف خمسين مليون
اها لما قالو لى خمسين مليون دى انا داير اقعد فى الواطا ..!! تانى.. قلتا ليهو كم ….!!؟ قال لى خمسين مليون …!! قلتا ليهو ماكتيره …!! والله رد على بكل برود ..والله ده العندنا …..!! طلعتا من المستشفى وانا ماشايف قدامى …
اها والخمسين مليون دى دى هسه يجيبوها من وين ….!! المهم جيت البيت كلمتا الحاجه وقلتا ليها انا لازم اتصرف …وطلعتا من البيت …!!! (الى أين سأتجه..!! وأين اذهب …ماعندى اى فكره ) ….أسرق …!!؟ أنهب …..!!؟ اقعد كده أعاين لى فطوم وهى بتموت …..أعمل شنو بس انا هسه …!!؟ امشى الزكاة …!!؟ اشحد …!!؟ يااااارب ..احساس قاتل مابحس بيهو الا سيد وجعة ….لطفك ياكريم …..!! امى اتصلت على قالت لى انها جهزت خمسة مليون ..قلتا ليها من وين ياامى ..!! اتضح انها لم تترك قطعة دهب واحده فى البيت حتى حلق مشاعر والسلسل كانو ضمن البيعة …!!! والله تمنيت وقتها ان تنشق الارض وتبتلعنى …ماقيمة هذه الحياة ..أين نحن …هسه لو مشيت للدكتور ده وقلتا ليهو والله نحن ماعندنا غير الخمسة مليون ديل …ومادايرين بتنا تموت …ممكن يقول لا …قلتا انا حامشى ليهو وأقول ليهو كده ..!! تتخيلو فعلا مشيت …وصلتا العياده كان معاه واحد كده تانى انا ما انتظرتا خشيت عليهو طوالى عاين لى كده من تحت النضاره …قال لى انت ماشايف معاى زول …قلتا ليهو والله يادكتور انا كمان اختى ممكن تموت …!! اها الراجل التانى ده أتدخل قال ليهو يادكتور ياخ الحاله واحده
مافى مشكله …اها غايتو أتمالك أعصابو كده وبآخر نفس قال لى خير ان شاءالله ….نعم …!!؟؟ قلتا ليهو والله يادكتور نحن ماقدرتا نجمع غير خمسة مليون …وبصراحة ماعندنا شئ تانى حابى نرهن ليك بيتنا وتعمل لي فاطمة العملية نحن جاهزين …!! اتلفت لى صاحبو ده قال لى بالله شوف يابروف نحنا بنعاني كيف ..!!! انت يابنى قريت بره اليافطة دى دكتور ..!! ولا مكتب عقارى …شوف ليك دكتور تانى يكون مزنوق فى بيت …!! حاجه عجيبة …انا هنا خلاص الدكتور ده نفضتا ايدى منو …وصورة فاطمة بس هى فى راسى ماقدرتا أقول حاجه ..قلتا ليهو جدا ..وحسبنا الله ونعم الوكيل ..حسبنا الله ونعم الوكيل ..دى الكلمة القلتها …!! وطلعتا على طول ..وانا طالع من باب العيادة كده اسمع ليك زول بنادينى يا أستاذ يااخونا ..اتلفتا لقيتو ده الزول الكان قاعد مع الدكتور ده ..قال لى ماتشيل هم انا بروفيسور مختار…!! وانا حأعمل العملية لى فاطمة اختك دى وبدون اى مقابل ..انا غايتو اتبكمتا …!! قلتا ليهو بالجد يادكتور ولا انت بتهزر ..!! ولا الحاصل شنو قال لى دى مش مسائل بهزرو فيها ..بكره الساعة تسعة جيب لى اختك فى مستشفى الحياة قول ليهم عايز بروفيسور مختار …وكتب لى ورقة كده ادانى ليها …مشيت البيت داير أطير من الفرح قلتا لى امى العملية بكره …احتفالنا بالعملية كانو فاطمة حتتخرج من الجامعة …( انها الدنيا عندما تعطيك ظهرها ) ..!! امى عايزا تقع من الصدمة ..جبتا القروش من وين …!!! قلتا ليها من …نعم الوكيل …..!!!
عملنا لى فاطمة العملية وفاطمة قامت بالسلامة واشترينا خروفين واحد كرامة فاطمة والتانى وديناهو هدية لى دكتور مختار ..الراجل رفض بى شدة وقال لى ياخ فاطمة دى امى الله يرحما ..(اتارى امو ذاتا طلع اسمها فاطمة).. صحى انت مختار …تسلم فاطمة الجابتك ….وحسبى الله ونعم الوكيل …
error: Content is protected !!