عندنا بت خالة امنا كده بتها فى أمريكا اسمها أميمه وكانو ساكنين قريب مننا قالو جو اجازة بعد كمين سنة كده وامى كلمتنى وقالت لى لازم تمشى تسلم عليهم …قلتا امشى ومنها نشوفا هى ذاتا …!! وجات كيف من أمريكا
المهم مشيت سلمتا عليها عندها ولدين وبت وولد رابع ولدوهو هناك ….اها دخلتا من الباب لقيت ليك الولد الصغير ده بدردق فى الواطه دى ذي (الدبيب ) قالو مما جا السودان بس عاجبو التراب ده …قلنا كويس …!! شده وتزول …!!
اها الوسطانى ده …برود شديد …!! التقول ابوهو خواجه ….سلم على بى طرف اصابعينو ولاكلف نفسو ادانى نظرة …ماسك ليهو موبايل يطبز فيهو …والحلاقة بالجنبه والاضنين .. والسلام بالانجليزى (..هاى هللو ..) أمو خجلت حبه قالت ليهو ….عاصم …زس إز يور انكل …(هى يااميمة البقيتى تتكلمى انجليزى ….) انتو قايلنو قال
ليها انتى بتقولى فى شنو ..!!! ولا عبرا بى كلمه …!! انا قلتا تشوتو بالخشبة الجنبها دى …..!! والله ولااااحاجه ….!! حلات كمان عقبت …غايتو عاصم ولدى ده ماعارفاهو طالع لى منو ….!! ( قلتا ليها بى سرى يكون طالع لى جدو جورج بوش الأب ….) وهو مركز مع موبايلو ماشايف زول …!! المهم انا اتضايقتا شديد …وقنعتا من خيرا فيهو…..!!والتانى الكبير داك داك اصلو مامرق من جوه حاضن البلاى ستيشن قايل نفسو رونالدو … !! قلتا النشوفا هى ذاتا خبرا شنو…(واميمة دى طبعا كانت معانا هنا واتربت معانا فى الحلة دى ..ماخلت ليها طين ماوحلت فيهو .!! ) قلتا ليها بالله كيف يااميمة اخباركم مع الغربة دى …اتخيلو قالت لى شنو……..
…!!! والله الغربة الا عندكم هنا …معقولة بس مافى اى صيدليه فاتحة (تونتى فور اورز ) ..twenty four hours اممممك ….. (مايفوتكم هى بس كملت الثانوى……!!! وبالجلاله …وقادا انجليزى …) قلتا ليها ليه خير انشاءالله فى شنو …!!؟ قالت لى معز ده الظاهر الجو غير معاهو الجو …وبطنو قال واجعاهو ….قلتا ليها عادى بكون اكل حاجه ولا شرب ليهو شى مانفع معاهو …..والله الساعة الضحكت ….هههههههه موية قاصد..!! صح …!!! موية شنو
ياعلوب نحنا مما جينا ممنوع اولادى ديل يشربو غير مويه معدنيه وأكلهم ده ذاتو جبنا جزء كبير منو معانا …عاارف عزو ده بموت فى الماكدونالدز …قلتا ليهو بس ده مابنقدر نشيلو ليك معانا اعتبر نفسك الفترة دى من المارينز….!! مش مرات بدربوهم على الصبر …هو بالمناسبة بحب أفلام الأكشن شديد …قام قال لي خلاص يامام …deal…..!!! امسسسك (جابت ليها مام) مام دى طبعا ذى الفرق بين يمه وماما عندنا اها ناس اميمة عبرو للأدوار النهائية البعد ماما طوالى وتحولت أميمه المنكوشه الى مام وبعلها العظيم الى داد …!!! طبعا المغسة دى شقتنى ..قالت بحب الماكدونالدز…!! انتى ماكانت الطعمية بالشطة دى أكلتك المفضلة… وبعدين يعنى كان عدم شراب الموية حقتنا دى بقى نوع من التدريب العسكرى …معناها نحن جنرالات عديييل …بالله ده كلام ده …..
المهم بعد شوية جات البت من جوه …تتلولو …. …مركبة النضارات من البحليق فى الموبايل …والتقويم يتلامع فى الأسنان …(انتو أسنانم دى البحصل ليها شنو …!!؟ ) اها دى أصلا ماسلمت على ذاتو …ولا عاينت لى حتى …!! تكون قايلانى عمو الجناينى …اها طوالى على أمها ….(اوووه ماى قود ..مام ….!!! إنترنت فيرى سلو …ميد مى كريزى …) يعنى الانترنت بطئ اصابنى بالجنون …..(الجن يايمه اليكوسو ليهو الفقرا … ) …انا خلاااص قربتا ابكى …ندقها ليك الشبكة دى الدايرا تجننك دى ياست ابوها ….اها أمها ذاتا ما اظنها فهمت …(المره دى الانجليزى دخل الحوش ) ..لكن لانو البت بتتكلم وعايزا تبكى وبتأشر على الموبايل …أمها فهمت لغة الإشارة دى ….شبكتا ليك اوكى اوكى ..خلاص حنصلحو …!! اها نصلحو دى قالتا بالعربى منها تستهدف الموبايل ولا الانترنت المهم البصادف فيهم …وشبكتا ليك …..يلا يابيبى . (قو انسايد..). go inside (اظنها دى بس الحافظاها) ….المهم البت طوااالى … قو انسايد …!!! (الليله انا يا إخوانا البمرقنى من MBC 4 دى شنو ….!! ) اها بس ياهو ده المنظر وده العنوان ودى الحاله ….سألتها من عبد المنعم زوجها قالت لى انهم جو براهم لانو منعم very busy ….(ماشى كويس ياعبد المنعم ….بقيت منعم …!! بعد شويه حتبقى مافى ….!! ) المحيرنى انو جماعتى ديل مشو أمريكا دى لوترى …….بالناسبة طبعا اللوترى وقع لى اميمة المسلطة دى وهى الساقتم ….ياربى يكون (دادى ) (منعم ) ده لى هسه مااستلم القرين كارد ….!! قال مشغول ..!!؟؟ النمشى نحضر التلفزيون نشوفو مرشح فى ياتو ولايه ….! ياحليلك ياعبد المنعم يالبقيت داد …بعد ماكنتا بتاكل الجراد …اها يااميمة…صيدلية twenty four hours مافى ..فى (حلبه وحرجل …) فى راس التلاجه ..متذكراهم …ولا نجيبم ليك delivery …
غايتو رجعتا البيت بطنى دى طاما ..كوركتا ليك فى نص الحوش لى امى ….هااااى مااااام …امى قالت لى مشاعر شوفى علوب ده اظنو جنا ….قلتا ليها الجن بنداوا كعبه الاندراوه …وريتينا يااميمه …!!!
error: Content is protected !!