دى مالا بتعاين لى كده ياربى تكون معجبة …!!! معجبة شنو كمان ياعلوب ..انت كاظم الساهر …!!! لكن صحى هى مالا بتعاين كده …!! عملتا نفسى مشغول….. ومره مره بديها طله …!! والله البت عقدتنى عديل ….تركيز شديد ..!! ياربى أقوم اسألها أقول ليها فى شنو مالك انتى مشبهانى ولا حاجه …!!افرض قالت لى انت ذاتك يشبّهوا ليك شنو !!! امشى وين انا ….!! لكن حاجه غريبة …!!مش ..!! قلتا فى نفسى كدى ياعلوب غير مكانك ..!! لو تانى البت دى عاينت ..طوالى تنبرى ليها ….المهم طوالى مشيت طاولة تانيه ..والله الحيطة دى أتلفت كان هى أتلفتت …!! وأعاين ليك ليها القاها مركزه مع واحد كده فى التربيزة البعدينى ..الله لاكسبك اتاريك كبرى المنشيه ياعلوب ….غايتو زهجتا زهج …قلتا هسه ده أحسن منى فى شنو..!!؟ عاينتا ليهو كدااا ..وإذا عرف السبب بطل العجب ل
لقيتو ليك جادع ليك الايفون 6s ومفتاح العربية السمين فى الطاولة والقهوة والعصير قدامو …والجزمة تتلامع ..والحلاقه والخلقه….ايوااا يعنى دى ياها عدة الشغل …..!! طيييب بسيطة مفتاح العربية ده انا بجيبو والايفون بقدر عليهو ….مشيت اشتريت ليك جراب ايفون اصلى حشرتا فيهو موبايلى الصينى ده …!! وعلى وسوق الحرامية جبتا لى مفتاح برادو …وقشرتا جيت تانى يوم …قهوتى قدامى والعصير …والحلاقه …بس وقَعَدت منتظر النصيب ..والله ياخوانا امكن ساعتين ..!! سمكة ساكت قالت النشوف السنارة دى مافى ..!!فى النهاااية …كده قنعتا داير أقوم بس فى واحده كده من بعيييد أدتنى ليك نظرة ..!! انا اتشليت ..!! البت طياره بس …وانا الفينى كملت… شلتا ليك جريدتي عامل فيها بقرا ..وأعاين بى طرف عينى …!! صدقو البت مركزا معاى …!! لا وكمان معاها بحليقه واسبهلال ….(اتاريك ماهين ياعلوب ساكت جادع روحك .) .شلتا ليك مفتاح العربيه حكيت بيهو راسى كده بالجنبه انو الود بفكر وبحل فى الكلمات المتقاطعة ..ومنها المفتاح ياخد وضعوا اكتر …هى ضحكت ..!! وانا ابتسمتا
بس شايفا ليك من بعيد كده اشرت لى ….!!( امممممك الشرك قبض ..).😉.كمان ياعلوب التقليه ماللدرجه دى …!! أشرتا ليها كده من بعيد باصبعى على نفسى …يعنى انتى قاصدانى انا ….!! أدتنى اشاره بى راسا انو ايوه انت …وحركة باليد …يعنى تعال …!! انا كمان بكضب..!! طوالى شلتا ليك موبايلى ومفتاح عربتى المافى …واتيممتا طربيزتا …وخليت ليك القهوة والعصير ديل فى محلهم …جدعة كده ….يعنى الود ممكن يجيب غيرهم …بس ومشيت ليك تنقش …!! تنقش…!! عليها ….!! والله لو قلتا ليكم ماأظن تصدقو … تتخيلو لقيتا ليك دى فرحة بت جيرانا ….فقعتا ليك ضحكه فى نص المحل …هى لكن ياعلوب سويتا كبيره…!! قسما بالله ماعرفتك ..ده شنو ده …لا لا لا مابصدق …!! انتا ياعلوب سويت ليك عربيه من ورآنا …ودى شنو الحلاقة دى ده منو الزعمطك كده …كَر على ياعلوب …بعدين من متين يااخوى بتشرب قهوتك فى المحل الغالى ده …..نحن بى سببنا …!! جيت انا مع صحبتى نلاقي خطيبا هنا وقالت لى تمشى معاى عشان كان لاقانا واحد من اولاد اهلى …انت مالك يااخوى …!!!؟ بالله فكفكفت ليك كلاما ده ذي الكلاش طق طق طق طق ….. قلتا ليها انا جاى انطعن حقنة زيك كده الله لاغزا فيك بركة …مالقيتو غير المحل ده ….!!! بس عليك الله يافرحة والله كان كلمتى مشاعر اختى بكتلك …!! وانا مدلدل مفتاح البرادو …عاينت ليهو وتانى انشرطت بالضحك ..قالت لى غايتو مابسألك ..! لكن قسما ياعلوب لو ماعزمتنى غدى هنا خليها مشاعر والله الحلة كلها تعرف …!! غدى…!! انت عارفة القهوة والعصير ديل هنا بى كم ..!!! بس طوالى اتذكرتا ليك قهوتى وعصيرى الخليتم ..مشيت عليهم ألقى ليك البت بتاعة المحل لفحتم ليك وداخله بيهم يشهد الله انا نصهم ماشربتو …!!؟ تشربى السم اليقطع مصارينك …عايز اكورك ليها شفتا الناس ..!! جليت الفكرة قلتا هسه الناس يقولوا ده جا من وين الجعان ده …والله ياخوانا متابع ليك الصينية دى داخله على المحل ذي الشايلين جناى …الله ينعل ابو ده محل …وانا ذاتى استاهل ..!! قلتا لى فرحة اها مفتاح العربية ده هدية منى ليك …!! أمانة فى ذمتك فى زول اداك هدية قدر دى …بس ساعدينا بالسكات …!! بس فى اللحظة دى صاحبتا وخطيبا جو من بعييد…وانا جرى على الباب …اها مايفوتكم من اللخمة قميصى انشرط فى خشم الباب ….عليكم الله دى مصيبة شنو دى الليله …قهوة وعصير وحلاقة وجراب موبايل ومفتاح عربية من سوق الحرامية وقميص ….يشهد الله سوريا ماخسرت قدر ده …..!!! الله ينتقم منك يافرحة.. ويافرحة ماتمت …
error: Content is protected !!