التاريخ يعيد نفسه ..!!وما أشبه الليلة بالبارحة ..!! خلااااص ذهب الظمأ وابتلت العروق …!! مشاعر والحاجه ركبو مكنة العيد..!! اختلفت المسميات ..!! والهدف واحد ه (جيبي الغلبو اللقاط …) المره دي كمان جابت ليها لبسات لي عبير وفطوم…!! قلنا خير وبركه فرحة عيد …!!! اها جرادل الخبيز دي في شنو …!!! ماكنتو بتعوسنو براكن …!! اليومين ديل فتحية جارتنا اهم زول (أراب ايدول الحله ) النسوان بالصف واقفات للخبيز البتعملو … واي واحده فيهن كان كربت نصها بتعمل أحسن منو …!! (طلعتي انت المفتحه يافتحية ) والتسويق (بالواتس اب ) قال ليك ماعرفتا دي حلتنا ولا كلفورنيا
ومشاعر كمان قالت الستاير دي الا يغيروها (يغير لونك انتي) ماهسه غيرناها …!!! شايلا سعافتا البتشبه شعرا ده ..!! ولافه …!!! والحاجه كمان مرضة الملايات دي يمرقا منها الجليل الرحيم …
علوب جيب حلاوه …!!علوب قروش الخبيز …!!علوب دايرين شيالات (وانا مالاقي البشيلني ..) …!! ده غير جلابية علوب …
لكن بالجد رغم الحاله دي البركة في الأجواء السعيده دي …غايتو اكتر حاجه عاجباني فطوم قالت دايرا الجزمة البتنور ديك …يكون قلبها حسا انو الكهربا حتتلحس …(ولايهمك يافوفو دي والله لو في سد مروي لازم نجيبا …)
الكارثة انو تالت يوم في العيد عرس إيمان بت جيرانا ،..ده كلو كوم ولبسة مشاعر كوم …!! الحاجه غايتو قافلا علي توب لندن …وعلوب قافل علي اللانام ولا اكل الطعام …عيدكم سعيد..!! وأيامكم كلها أعياد …كل سنة وأنتو طيبين ..
error: Content is protected !!