لاقيتو ليك فى نص السوق العربى فى نص النهار بعد سنوات من الغياب ….!!! اووو يا باشمهندس ازيك وكيف حالك …!!! طوالى دخل فينى …علوووب الله لاكسبك … (عبارتو نفسها الكان بقولها لى فى الجامعة …) ازيك ياعلوبتى..كيف حالك ..ووقعنا ليك فى بعض احضان وسلامات ….وأشواق !!!
ياسلاااام …!! عصام ياخ …!! اصحاب الزمن الجميل …عصام ده رغم انو كان بقرا فى هندسة مامعانا لكن ياخ جمعتنا ليك صحبه شديده فى الجامعة…!! زول ضكران خلاص ..وأخو اخوان …وراجل حاره …يازول والله قربنا نبكى …!!! ازيك ياعصام ياخ ..وأحوالك …والله الشوق بحر وين انتا يازول …!! قال لى والله قاعدين فى السودان الحار ده ..!! الا مابنقدر نفوتو …غايتو الا واحد فينا يفوت …!! اها انا هنا قعدتا أتلفت ….لانو ده زولى وانا بعرفو ….ده قاصد الحكومة عدييييل اصلو كده لا بلف لابدور …!! لانو نسيت أقول ليكم عصام صاحبنا ده كان من اكبر الناشطين السياسيين فى الجامعة عندو ركن نقاش اقل حاجه فيهو ذي خرتمية نَفَر كده ..سامينو القشاش لانو كان بقش القدامو والورا…!! لكن هو عصام الجن ده ماكان حريف جنس حرفنه كان شفتو …!! اول حاجه صوتو ذاتو عجيب ومقنع …!! بعدين بلعب بالكلام ده ذي ماهو عايز…!! بقيف كده وسط الدايره …!! وبخت ليك يدينو ديل فى راس الكرسى كده قدامو والكرسى بكون قاعد عكس وعندو شنطة قديمة كده بكون جادعا فيهو …ويدور ليك …!! بنهز الحكومة دى نهز …!! وعبارات ذاتا ساحره… وبعرف متين يرفع يدو ومتين ينزلا ..(.ميسى بس …) ومتين يتكلم ومتين يسكت …متين يعلى ومتين يوطى …!! يازووول ركن النقاش بتاعو ده هلال مريخ الأعمى شايل المكسر والجكس ده بالصف واحدات ولا شغالات بى السياسة دى الشغله بس جايات مخصوص لى عصام ده ….وواحدات ولا داساتنها مكسرات عدييييل ..قالن شخصيتو آسره وصوتو ساحر …والله عندنا صاحبتنا كده لما تقول ليك عصام ده أيقونة …!! (لحدى هسه انا ماعارفا قاصده شنو بى أيقونة دى ….) المهم ده باختصار عصام …زول لطيف وجميل خلاص …!! ودوغرررى ….
وجنس رجاله هى ..!! بعتقلو فى الشهر عشره مرات وبجى من هناك مدور…المهم بعد المقالده والمطايبه دى ..قلتا ليهو ياعصام انتا لِسَّه مدور فى الجماعة ديل ..!! قال لى …ولى بكرة …!! فى النهاية الناس دى لازم تستعدل ….يا نحنا ياهم …!! انت خفتا ولاشنو …!!( وضحك ضحكتو العجيبة ديك ….) والله ليك وحشه ياعلوب ياخ طبعا انتا ياكا ذاتك لابتجدع لابتجيب الحجار …!! قلتا ليهو ياعصام ياخ انا فاضى للقصص دى ..!! كوم البنات العندى فى البيت ديل يمشو وين …!! انا لو غبتا يوم واااحد ماخلاص انتهوا ……!! قال لى يعنى انا مقطوع من شجرة ولاشنو …!! بى ضحكة كده…!! قلت ليهو العفو ياخ ..لكن انت يسو ليك شنو ..!! كان فطموك بالسياسة دى …طوالى قال لى انا راضع من شطر البلد دى وضراعا… وياها امى وشمسى وشعاعا …..!! (طبعا بيت الشعر ده بكون جاهو هسه دى ..!! وخلاص قال كده وعايز ينداح …!! قلتا ليهو يازول أقيف أقيف انت بالطريقة دي حتعمل ليك ركن هنا ونحن ماناقصين …براحة علينا …..!! المهم ادانى اقتراح ناكل لينا حاجة …!! قال لى فى مطعم هنا فى الكورنا المقابلانا دى فيهو مره كده ساميها (عزة السودان ) عندها ملاح اصلي …نمشى ناكل لينا معاها لقمة ونسمع خبرك ..(لاحظو حتى عزومتو ثورية …) المهم مشينا على المحل طوالى ….!! اها اول مادخلنا سلامات تقيله ماتديك الدرب ….!! مرحب عصام …!! ازيك يالضرس…!! حباب عصام الدين …ست المطعم ذاتا فضل ليها تزغرد…!! (يمرقنا الله الليلة هو ده مطعم ولا دار الحزب …!!) المهم اتغدينا وصحى الملاح خطر ..واتونسنا وشربنا الشاى …وقدمنى لى بره وأختا تلفونو واخد نمرتى وبقيت مارق ….
وانا فى اللفة كده جانى ليك واحد ختا يدو فى كتفى ..قال لى انت علوب ….قلتا ليهو بالحيييل …قال لى اها شد حيلك نحن من الجهاز ودايرنك فى كلمتين …..(اممممك ..!! امانه ماوقع راجل ..) قلتا ليهو فى شنو انشاءالله خير ..قال لى لما نصل هناك بتعرف …(والصقر ان وقع كتر البتابت عيب ..) اها دورتا معاهو …وانا طبعا فى اللحظة دى راسى ده مافيهو غير امى وأخواتى البنات ……!! اللهم اجعلو خير…المهم المسافة كلها زول بتكلم مافي ..وصلنا ليك هناك طوالى نزلونى ..!! دخلتا ..!! قالو لى اقعد هنا لحى مانناديك ..!! اها القعده الياها… تمت ليها ساعتين ..!! ناس داخله وناس طالعه وانا قاعد ذي الارنب زووول بقول لى (هش ) مافى …!!
اها بعد داك دخلونى لى واحد كده …شغال يكتب سااااكت اصلو راسو ده مارفعو عاين لى ..!! (ياربى دى قصيدة ولاشنو …!! ) المهم بعد ما انا زهجتا وتعبتا ..! اخيراً رمقتنى عيونو …..اهلًا اهلًا ياعلوب واقف مالك ماتقعد …(بعد مارجلينى نشفو ..) ماصدقتا قعدتا ..قال لى تشرب حاجه …!!؟ قلتا ليهو لا شكرًا …قال لى طبعا مابنعزمك اكل ..شايفك تقلتا فى ملاح التقليه …(ابو الزفت طلع الملاح ذاتو عارفو ..) .قلتا ليهو (ايوه ..!!! لا …!!! شكرًا ) …التلاته كده مرقو مع بعض ..قال لى شاى مابطال …!! قلتا ليهو الحكومة كمان بقولو ليها بطال …!! أكيد مابطال ..والله الزول ده ضحك جنس ضحك …قال لى والله ضحكتنى …لا لا كده غلط..!! أكيد ممكن تقول بطال..!! وتقول اى حاجه …البطال مشى البطال …!! قلتا ليهو كيف يعنى ….!!؟ اتصلح فى قعدتو كده وقال لى …يعنى ياعلوب كونك تقول رأيك..!! ده حق مشروع …لكن كونو تهدد أمن بلدك واهلك ده ياهو البطااال ….(امممممك تهديد أمن الدولة …) طوالى اتذكرتا ليك رأفت الهجان …ده كلام شنو يازول انتا قاصدنى انا …!!؟ لا ياخ العفو انا بضرب ليك مثل بس وعشان انتا راجل ظريف كده ..انا ماداير أخليك تتأخر معانا هنا …بس لو قمتا اتعاورتا وعملتا فيها مناضل وثورجى وقَعَدت تلف وتدور…!! اها انا مابقدر اعمل ليك حاجه …!!! (يازووول والله انا راسى لفا …..) هو فى شنو ذاتو …!!! والجاب الثورة والنضال هنا شنو…!! وانا مالى ذاتى …!! قلتا ليهو انت ياجنابو الظاهر غلطانين انتو دايرنى انا ولا أمكن فى علوب تانى …قال لى وهل يخفى القمر ..!! نحن دايرنك انت ذاتك علوب ود محجوب ده انتا ولا انا غلطان ….!! قلتا ليهو ياهو ده أسمى…قال لى نحن مابنغلط …!! الا مع البسوى الغلط ..!! قلتا ليهو وانا سويت شنو …!!؟ قال لى شوف ياعلوب هم سؤالين اتنين تجاوب عليهم هسه تقوم تمشى ..تتلكلك …!! على نفسها جنت براقش …!! ( هى يالبرقش …!! دى مصيبة شنو دى الليله) …السؤال الاول تلاته فى واحد …!! علاقتك شنو بى عصام السنوسى …!!؟ وكنتو بتقولو فى شنو جوه المطعم …!!؟؟ والورق الوراك ليهو ده فيهو شنو …!!؟ اها صعبة دى …(الله لاكسبك ياعصام ..يادوووب وقع لى الجماعة ديل دايرنى فى شنو ….) أخدتا لى ضحكة كده وقلت ليهو لا كان كده براءة …اول حاجه عصام ده صاحبى من ايام الجامعة ولى ذي مية سنة كده مالاقيتو ..!! اتلاقينا صدفة كده فى السوق …وعزمنى على الغدا …ده كل الحاصل ..قال لى بتعرف عنو شنو …قلتا ليهو فى الجامعة غايتو كان معارضة لكن هسه مابعرفو دخل الحكومة ولا لا …حدر لى كده قال لى انتا بتهظر ….!! قلتا ليهو انتو يعنى ماعارفنو …!!!(شاف سؤالى منطقي …) قال لى جميل …طيب الورق الوراك ده فيهو شنو …قلتا لي لو قلتا ليك بتصدق …!! عصام ده كان بورينى مشروع لبناء المدارس من مادة كده مابتذكر اسمها قال اى ده مشروعى الجاي …حتى قال لى المادة دى صديقة للبيئة ورخيصة ومتوفرة فى السودان …بدل فى ناس بقرو فى الشمس …!! بسس …!! حتى ده رقم تلفونو اتصل اسألو …اخد ليهو ضحكة كده تانى قال لى انا راجيك انتا تدينى رقم عصام ياعلوب…. !! المعلومات العندنا انو عصام ده بتلقى تمويل من جهات اجنبية لبناء مدارس تفرخ كوادر ضد الدولة …..!!! المره دى انا الضحكتا قلتا ليهو والله انتو البدورو تودو السما …!! يازول هو ذاتو قال لي بس مشكلتى الوحيدة ياعلوب مشروعى ده بحتاج شوية مصاريف وانتا ذي ماعارف …هسة (عزة السودان ) دى بحاسبا على الملاح ده اخر الشهر …طبعا اخوك مغضوب عليهو اى حته امشى اشتغل فيها بعملو رايحين بخافو اجيب ليهم الهوا …تقول لى تمويل وجهات اجنبية …!!! المهم الزول ده حسا انى صادق لكن مااقتنع شديد …..قال لى شوف ياعلوب انا المره دى بصدقك …لكن المره الجايه كان لقيتك مركز مع الزول ده ماتجينى هنا تقول لى لاقيتو صدفه فى صينية القندول …كلامى ده واضح …!! سكتا انا ماجاوبتا…قال لى شايفك سكتا..!! قلتا ليهو والله انا وريتك الحصل بالضبط ..قال لى خلاص قوم امشى اهلك ..!! اها الساعة كانت واحده بالليل …قلتا ليهو اها بتودونى انتو ولا اشوف لى امجاد …قال لى انتا لو داير المجد الحقيقى تابع لى عصام ده…..!! يازول انا ماصدقتا جرى على الباب ….بالى فى اخواتى ديل وأمهم ..!! اها كالعادة لَقِيتُم كلهم مكومين فى خشم الباب غايتو طمنتهم ودخلتا ….فتحتا ليك الفيس لقيت صورتى كبيره فى واحده من القروبات دى مكتوب فوووق (أطلقو سراح علوب ….!!! ) والله حسّيت انى جيفارا …!!! قلتا أريتني كان بتا مع الجماعة ديل كان حللتا الصورة دى ….!!
المستغرب ليهو هم كيف عرفوا انى هناك …(صحى مافى حاجة بتدسا …) كان نفسى اتصل على الزول الحقق معاى ده أوريهو الصورة دى وأقول ليهو ….خليك من ملاح التقليه ..كدى شوف الصورة دى ..عليك الله ماشخصية …!!!
(والله صحى نضال تكوسو ونضال يكوسك …) المشكلة تلفونى بعد يومين كده رنا ….والله شفتا الاسم براى قعدتا أتلفت …(عصام يتصل بك …) اهاااا هسه أرد ..!! ولا كيف ….(أفو ياعلوب عصام صاحبك تبيعو بى تحقيق) …اهلااااا ياعصام …وتنقدا الرهيفة …. …..اها انا المزعلنى فى الموضوع ده كلو انو فى التعليقات على البوست بتاع (أطلقوا سراح علوب ده ….واحد كاتب …هو علوب مالو اتزنق فى رقشه ولا شنو ….!!!عاينتا للصفحة فوق لقيت عنوانا …(.احترس أمامك كشة …..) كشة تكشك ياعلوب ….!! ويوم نضالك مايجى ….
error: Content is protected !!