خدارى وبى حالى ماهو دارى جاااافانى ……!!! احبوووو …….ياسلاااام الليلة صحيت من الصباح بس بغنى فى الاغنية دى ….!!! ده صباح شنو حلو ده …… الظاهر اليوم دى حيعدى على خير ..يازول اخدت لى دش كارب ..وقشرتا قشره طن ..والريحه الماخمج …المناسبة شنو ….!! والله انا ذاتى ماعارف ..مش مرات كده فجئتن بجيك احساس ذي ده من غير سبب بس ياهو الليله معاى …..!! يازول ناس البيت ذاتم لاحظو ….أوزع ليك في صباح الخير دى ذي التسالي …مشاعر اختى هناك بتنفض فى الطرابيز …عاينت لى كداا وقالت لى …وصباح الخير دى شنو الليله مالك محموم …!!! ولا عبرتها …!! ناديت ليك فطوم دى ياها حبيبتى فى البيت ده وشلتها ليك فوق …اها يافوفو دايرا شنو …!! الليله يومك …قالت دايرا (بلاى استيشن ) طوالى نزلتها (بلاى ستيشن ) مره واحده هو نحن لاقين غاز تقولى لى استيشن …المهم الحالة الانبعاجيه لِسَّه معاى والدنيا لونا بنبى …اها تلفونى فى الوقت ده رنه ..!! عاينت لى الرقم كده والله آمنت عديل كده صحى الاغانى لا تأتى فرادى …اتخيلو الضارب لى منو …سحر !!! …ووووووب انا من سحر…!! والله صحى سحر ..!! والله من الكبكبة قربت أدوس زر الاقفال لحقتا نفسى فى اخر ثانية …الوووووووو اهلًا ياسحر والله تلفونا نور …!! صوتا ده جانى من هناك ذي الكمنجة …علوب كيفك ..!! (غايتو علوب دى في خشم سحر بيت شعر بس ) قالت لى ..ياخ من غير مقدمات انا مغروضه فيك شديد ..ممكن !!؟؟ قلتا ليها ممكن …!!؟ عليك الله ماعيب عليك ياسحر !!! ممكن دى شنو ..!! قولى غصبا عنك !! فورا !! كلام ذي ده ….شنو مغروضه دي ..انتى يوم غرضك مايجى …!! والله اخدت ليها ضحكة على القسم عبارة عن مقطوعة موسيقية ….فى شنو ياسحر …!! قالت لى مابنفع فى التلفون خلينى اشوفك وبكلمك ..طيب باى …بااااى …انا ماقلتا ليكم اليوم ده مابشبه كل يوم يوم بدا بى سحر…حيكون كيف يعنى ….وطوالى دورت ليك خدارى تانى …وجاااافانى …ياسلام …سحر دى بالمناسبة كانت زميلتنا فى الجامعة كان اسمها (سحر واحلى من القمر) بت نجاااااضة وبعد ده كلو جنس ظرااافه هى ولذاذه …وبعدين واثقة من روحا شديد لا فى عويج خشم ولا جرجير كلام زوله وااااضحة وأصليه
…والعيون متل الفناجين دى ياها هى ذاتا …ياخ سحر دى لمن كانت تجى شاقه شارع الجامعة ده الحركة بتقيف لحى مايمر الموكب …الحاجه الوحيدة الكنت محظوظ فيها انو سحر عندها نسابه معانا…لانو راجل بت عمتا متزوج بت خالة عم امى …!! لكن انا اختصرتا المشوار ده كلو ودخلت فيها من الحته دى …والله الجماعة لمن يلاقونى بتونس معاها لمن بفهمو حاجه وانا داسى حتة النسابة دى يعنى عامل فيها داخل بي نسبتى مش نسابتى…!!
والاخوان شابكنى يامعلم ..!! ياسيدا ..!! يا اصلى ماعارفنى قبول خاص …!!! المهم طبعا لغيت اى حاجه وطوالى لى سحر ..!! هى شغالة فى شركة كبيرة كده فى العمارات …اديت الجزمة تانى لميعة وياسحر جاك زول ..المهم وصلتها لقيت ليك أسمى ده معلق بره تقول حرامى …المهم اهتمو بى ودخلوني على الساحرة …لا حول الله …ده شنو ده…!! انا باقى لى زمن ماشفتها …لكن جنس حلا هى …مبااالغه …زادت سماحة بت اللذينا ونحن كبرنا وكبرت أحزانا ..يازول استقبال حافل وسلامات وأشواق وعودة لى ذكريات الجامعة وانا طاير من الفرحه … اشفط فى الليمون الجابوهو لى …قربتا اشيل منو حبة لى مشاعر اختى أقول ليها ده ليمون وليمونك ليمون …يازول والقهوة جات …انا ذاتى قلت البت دى تكون خاتا بالا فينى ولاشنو ..!! والله لما اتصلحت فى القعدة وجاتنى حالة تقله كده..!! اول مره احس بى روحى مهم كده وانا قدام برشلونة دى …!! المهم يازول بعد شوية كده دخلت ليك فى الموضوع قالت لى طبعا عايز تعرف انا عايزاك في شنو …!! قلتا ليها عايزاني فى شنو ده ده ما المهم ..!! المهم انك عايزاني …!! وفقعتا ضحكه ..!! هى لما تضحك عيونا دى بتصغر شوية كده …آمنت بالله بس شفتو السحاب داك وقت مرات كده يشاغل الشمس ويغطيها ويزح منها …!! بس ده ياهو المنظر …حكاية مامعقولة …قالت لى انت لِسَّه فى شقاوتك دي …شوف ياسيدى …والله لما قالت لى ياسيدى دى أتخيلت بس نفسى معرس سحر دى وقاعد فى البلكونة وهى من هناك جايبا لى شاى المغرب …!! اها بعد السرحة الإعلانية دى رجعتا للبرنامج ..قالت لى شوف ياعلوب انت اخو وصديق وزميل عزيز …(اها انا اخو دى اصلها ماريحتنى بس مشيتا …) سألتها ابشرى ياسحر فى شنو …قالت فى الحقيقة هى حاجة محرجة شوية بس ذي ماقلتا ليك انت اكتر من عزيز …(تانى رجعتنى خط التمنتاشر …) قلتا ليها طبعا طبعا أكيد …!! اصلو ماتتحسسى ياسحر نحن اكتر من كده …(طلعة استطلاعية ) قالت لى اى والله وانا لو ماكده ماكنت انت الوحيد القصدتك …شوف ياعلوب انا فى الحقيقة فى زول متقدم لى وانت بتعرفو وكنت عايز اعرف معلومات اكتر عن الزول ده ورأيك بهمني شديد .!! (الله لاكسبك …!! ) هسه ياهو ده الموضوع والله من الزهجة جقمتا لى جقمة ليمون بس الحنضل ( ظلمتك يامشاعر ما احلى ليمونك ) ….ده منو ده كمان ..!! قلتها بى لهجه كده التقول انا خطيبا …لما هى ذاتا استغربت..!! قالت لى قول بِسْم الله هسه أمكن يعجبك …!! (قلت ليها فى سرى اى ثعلب يختفك يصنف عدو …!!) ببساطة الزول ده اخو بت خالة عم أمك …المتزوجا ود بت عمتى !!! ااايوا عرفتو ده دكتور مدثر ..!!! قالت لى بس ياهو ذاتو …اها دى أقول ليها شنو دى …مامتعلم تبقى فضيحة …!! عاطل ..!! فضيحة اكبر ….بشاغل البنات …!!! ياها العواره ذاتا ..!! طوالى قلتا ليها مبروك …والله لما عيونا فتحن التقول بس راجيانى أقول ليها كده !!!ماتتخيل ريحتني قدر شنو الله يخليك ياعلوب فعلا اصيل …(اصيل بالصا …) (الاصلة التاكلك انت ومدثر بتاعك ده ..!! ) عملتا فيها مبسوط وقلتا ليها تستاهلى …وطوالى عملتا فيها مهم عاينتا لى ساعتى كده ( مايفوتكم الساعة واقفه ليها شهر ) وقلتا ليها اوووو انا لازم امشى هسسه دى عندى مواعيد مهمة شديد …!! قالت لى لا عليك الله لازم تفطر معانا …قلتا ليها لا خلى مع فطور العريس ..!! اخدت ليها ضحكة مع حبة خجلة كده انا بس نفسى تشوفو جضوم سحر لما تخجل ..!! تتذكرو حلاوة قطن الزمان ديك بس بالكربون …!! الله لاكسبك يامدثر الدكاتره ديل اصلو كده حظهم ذاتو عالى يقرو الطب ويعرسو البنات السمحات ..!! والبنات مايصدقو تحلف تقول عيانات ….المهم ودعتها وتشكر فينى للباب …وطوالى بقيت مارق امشى وين ذاتو ماعارف ..!! قال عندى مواعيد مهمة هو انت كان مهم قدر ده ماكنتا عرستا سحر دى يافقر ….ماشى ليك في الشارع وأغنى قالو لى أنساهو وامسح من خيالك ذكرياتو ….اصلو يوم يبدأ يبدا بى خدارى دى لازم ينتهى بى سوادى ….قالت مدثر …!!!؟ مدثر بى شنو ….!!!!
error: Content is protected !!