المغتربين اليومين ديل في البلد ..ياحليلم ….بحب شوقم للسودان ده ومرات بشهونا لي ….!!! متكيفين كيف ….!! قالو السودان مبالغه ..!! والجو حلو..!! والاكل لذيذ …!! ( تاكلو في البيتزا دي وتجو هنا تقولو لينا لذيذ ) …!!! يازول مما جو لافين ..!! …!! وفواتح تقيله …!! وشفعم ديل جديع شديد …!!! لقو السهلا دي ….!!! الله يحفظم …!! والله منورين ياكم شيالين التقيله وسادنها ارض جو ….!! لكن بعد مرات في واحدين (صعبين) خلاص …!!! وواحدين بلاقو صعوبة …!! وكلهم عزاز علينا وشالو نوم عينينا …!! اها دي تلاته مشاهد مختلفه مرو علي الأسبوع الفات ده
المشهد الاول …
صاحبنا (اليسع ) ده اغترب ليهو سنة وااحده بس…!!! اها دي اول اجازه …مشينا استقبلنا في المطار ..(وارد السعودية) جاي من ( عسير ) ..!! والله ياجماعه من خشم الباب الزول ده يتبسم …!!! داير يقلب هوبا من الفرحه …!!! …!! يشيل ويتلفت …!!! ويسلم علينا في الدقيقة تلاته مرات …!! ياحليلو …!!! مدور ليك فينا…. ياسلاااام بالجد مشتاقين…..!! السودان عظيم ياخ ….!!! قلنا ليك نحنا ذاتنا مشتاقين …!! تاني بعد شويه ….ياسلااام شوق شديد والله ….!!! ماكترتها شويه اليسع اخوي …!! …في شنو مالك ….!!!؟ تاني يقوم ليك …. بالله الشجره دي خليتا (سغيرة) شوفا كبرت كيف …!! قلنا كويس .. بعد شويتين …بالله كيف (يس ) سيد الدكان ياخ مشتاق ليهو شوق …!!! قلنا ليهو نحن شاردين منو داير مننا قروش ..!! ياسلااام …اها وعمك خدر ….!! خدر ياخ …!! سيد اللبن كيف هو بالله ….!!! منتصر صاحبنا من الزهجه قال لي كيف يعني كيف ..!! ماياهو (خدر ) سيد اللبن..!! بقي ( روب ) ولا شنو مافهمتا …!!
اها بس ياها الحاله دي …!!! ونحن طبعا مستغربين ياربي الزول ده عاشق …..!! ولا شايف ليهو حاجه نحن ماشايفنها ..!!! ولا الحاصل شنو …!!؟ قال الشجره كبرت ..!! اها وبعد كبرت في شنو يعني …!!! حيعرسوها..!!
الظاهر رامي الشوق عمر سنه ده قالو صعب ….!!!
يجينا ليك بالليل….!!! يا الله ….مانفسي الا في فتة فول كاااااربه من محطة سته ….!! لا ياخ …!!! هسه نحن راجنك تعزمنا..( سولتير ) ….!! داير ترجعنا سته محطات …!!
….!!! قلنا ليهو غايتو لو حتستمر بي حالتك دي حقو ترجع ( عسير ) حقتك دي …!!! لانو بالجد امرك بقي (عسير …) …!!
الزول ده لِسَّه البنج مافكا منو ….!!! حندي تاني تلاته يوم ( يبل ) شوقو ده …!!! يا استغفر …!!! ولا قطر ( عسير ) ….!!
المشهد التاني …
ديل ناس (افراح ) بت جيرانا اختم ( تماضر ) مقيمه في
( ايرلندا ) راجلا دكتور هناك ….!! جات الاجازه مع عيالا …!! وخلو الدكتور هناك …!! الأولاد طبعا كأنهم بتفرجو في فلم من أفلام الخيال العلمي …!! جنس اندهاشا …!! مافاهمين اي حاجه …!! بس بعاينو …!!! ولغة التواصل …صفر …!! مرات كمان بحاولو يعرفوهم علي الأهل ….!! سلم يا رامي ..!! دي حبوبتك (دار الجلال) …!!! (ولا بقول ليهم بتقولو في شنو …) ..شوفو الاجابه… .Mam I miss Dad…. !! ( الود ده رجعي طوالي لي ابوهو ..!! ) والله لو جبتي لي ( دار الأوبرا ) هنا ماحيشتغل بيك ….!!! خلي (دار الجلال) …!!!
بعد شويه البعوضة لمت ليك في الشفع ديل ….مزمزتم مزمزة الميرندا ….!!! عرفتم ليك جايين من ايرلندا ….!! اها ركزت معاهم ….وتركت بصماتها واضحه فيهم …!!
(ناس الكجم البعوضة دي عادي بقو يتونسو معاها ….) ..!!وقالو كده طلعو ليك شوال الدوا الجايبنو معاهم من هناك وتحولت الرحله الي مستوصف ….!!!
مسكينه تماضر جايبا التياب والحاجات دايرا ليها حفله حفلتين ومرقه مرقتين قطعوها ليها في راسا …
عندها قرايبا كده فتحو فيها نار قالو ناس( تماضر) خلاص بقو
خواجات (نصاري ) لانها مامشت تعزي في حبوبتم ماتت قبل خمسه سنين …!!
ياحليلك ياتماضر …!! معقوله تجي وترجعي بالتياب دي كده …!!! البركه في شوفة الأهل ….!!! تجي في ساعة الخير ان شاءالله
المشهد التالت …
اها ده غايتو المغسه المغسنا ليها ما أظن تمرق قريب …!!! ليهو كمين سنه كده ماجا البلد …!! اسمو (السماني ) قاعد في ( عرعر ) في السعوديه ….!! والله شهانا العافيه …!!!جانا ليك في البيت قال يسلم علي الحاجه …! قال ليها… وايش حالك ..!!اها قولة ( ايش ) دي الحاجه بطنا طمت ….!! ردت بي اااخر نفس …!! كويسين حبابك …!! اتفضل ..!! دخل قعد …!!! شبكني ليك ..!! كيفك علوب ….اشوفك كبران ماشلا عليك ….!!!!هياااا خوانا …كبران ..!! وماشلا …!!! يمرقنا اللانام لا أكل الطعام الليلة …!!! مشاعر بتعمل ليهو في العصير جوه ..!! نادتني قالت لي ماعرفتنا علي طاش ماطاش ده …!!! هو قال مالو حاسي بي شنو …!!؟ قلتا ليها لا …حمي خفيفه ..!!! فرق التوقيت ….!!! جبنا ليهو العصير …!! قال بالله انتو قاعدين كيف في البلد دي ….!!! معقوله ياجماعه ( الجوال ) حقي مااقدر اتصل عليه ..!! الشبكه عندكم تعبانه شديد…مش ذي ( المملكة ) ..!! يااااادي (المملكة) ..!! اها انا مما قال (الجوال …) بقيت أعاين في ساعتي …!! بس الحمد لله ( جوالو ) رنا …!!! اها قعد يتكلم ….
(ايوه ايوه انا بعتهم ليهو..!! كلفوني خمسمية ريال..!! احسبها انتا بقي بالسوداني ..!!! ) ولسه مواصل….!!! ( أرجوك يا عادل… ( عادل ده الزول البهناك في الخط ) …أرجوك ياخ ماترفعو ضغطنا …!! احنا القروش دي بنلقاها في الشارع ولا القصه شنو …!! ما انا خلاص جبتا اللي اقدر عليه …!! كمان يقول ده مالنوع الكويس …!! قصة غريبة …) …
ولسه مواصل …!! ( قول ليهو (السماني ) قال ليك دايرو ..دايرو ..ما دايرو… في ستين الف داهيه …كرهتونا ذاتو ) …!! ( وانا اتابع عودة اللهجه السودانيه لمجاريها بإعجاب شديد ) …!!! وبقيت مركز معاهو وهو مواصل …
( شوف ياعادل …الله كم ..!! انا حرررم الشغل بتاع الاستهبال
والحنك ده مابنفع معاي …!! وبجيب قطري ..!! ( دخلنا الأجواء السودانيه ) …!!! (قول ليهو نحنا الحركات دي مابتمشي معانا نحن اولاد قلبا ومقددنها.. قوم لف ياخ ..!! ) …!! ( قوم لف …!!؟ الحمد لله ..!! كده وصلنا تب ) …..
الف حمد لله علي السلامه يالسماني…!!! والف مبروك ..!!!
كده يادوووب شبكتك الطاشه دي جات …!!! ماقلتا ( عرعر )
…!! ( الحاجه تتبسم ساااكت …)
…..قال معليش ياجماعه المكالمه دي أزعجتو شويه ….!!! قلنا ليهو والله ( مكالمتك ) فرحتنا …!!
اها قام اتنفض بقي ماشي …!! قال لينا (وضعناكم) الله ….!! قلنا ليهو (وضعناك ) الله والرسول …..!!!! تاني بتجيب سيرة ( الجوال ) ….الله واكبر….!!!! والعزة للسودان …!!! تحيا عرعر ..!!
إقامة سعيدة ان شاءالله …ربنا يرد غربتكم …!!
error: Content is protected !!