ديل راكبات جنبى فى الحافلة طوالى والله التقول مؤجرنها طلب …!! ماخداات راحتن فى الونسه …!! وياريت لو
راكبين (بزنس كلاس ) (جنب السواق ). …والله مدفوسات معانا ورا فى الكنبه الأخيره دى وانا ضارب الركن …(بحب الأركان دى من زمان بتحسسنى بالامان .) .المهم قالت ليها ….والله ليهو حق يبيعا هي أصلا معرفاها عليهو لى شنو …!!!اها انا بينى وبينكم شمار ذي ده الا أبقى صحابى حتى افوتو ….!! القصة برضو بتهمنى …كيف ولماذا يبيع الرجل امرأة …!!!
غايتو طرقتا ليك اضانى دى وطلعتا جريدتي لزوم الاستماع لحيثيات القضية بوضوح …وهن قصة الجريده دى ريحتن شديد ..قايلنى (منصور خالد ) وانا والله الجريدة بالعدلا ولا القلبا ماعارفا ….!!! كل البعرفو انى داير اعرف قصة البيعه دى شنو …وتمت وين (تجارة البشر ) دى …!!! ولم يخيبن ظنى حيث تواصل الحوار …..التانيه قالت ليها والله انا قلبى كان حاسى انها حتختفو منها …(هيا إخوانا بيع وختف نحن فى سوريا ولاشنو ..!! ) اها واصلت فى
الكلام …اصلو الزمن ده الرجال ديل كلهم عينم زايغه ((هىىيي ماتجمعي )….. هسة عليك الله منو الكان بصدق انو (نوال) السهتانه دي يطّلع منها كل ده …( حلو ..عرفنا اسم المتهم …). لا لا لا (امانى ) ذاتا بالغت تتخيلى دى بتسوقا معاها لما تقابلو …!! ماللدرجه دى كمان ..(عقبت الثانيه )….لترد الاولى مدافعة هي لكن ياختى معقوله بس كان ممكن تفكر انو صاحبتا الانتيم تطلع مجرمة كدا …
انتى ماقلتى لى أصلا القصة دى حصلت كيف يعنى ….!!؟؟ استفسرت الاولى (والله بس سبقتنى لانو ده نفس السؤال الكان فى راسى )
وبقيت بس منتظر الرد ..والذي لم يتاخر كثيرا …انت عارفه انو معتز ده (امممممك عرفنا اسم المتهم التانى ) (اها معتز مالو …!! ). قالت ليها انت عارفه انو (معتز ) بعرف (امانى) دى امكن ليهو تلاته سنين (امانى الضحية ) والناس دى كلها عارفا العلاقة دى …والله حلات الدنيا عليهم ..يوم القالت ليهو ياخ الناس بدت تتكلم …!! جا راسو عديل البيت وخطبا …اها والله سمن على عسل لغاية ماظهرت المشوطنه دى فى حياتم (المشوطنه دى نوال ) انتى بتعرفنى طبعا انو هى صاحبة امانى شديد ..ياخ دى مرات بتنوم معاهم فى البيت …وأماني انت عارفاها زوله على نياتا اصلو مافكرت فى حاجه ذي دى …قومى انت يانوال الجن (اختيار موفق للتوصيف ) بقت ترمى الكلام لى معتز انو امانى دى زوله طيبانه اكتر من اللازم …..!! ومرات كده ترمى فى الكلام انها مهمله …وماعارف كسلانه وكلام ذي ده …وهو بقى يسمع ليها ولما حست انو معتز ذاتو شخصيتو ضعيفه عرفت ..كل نقاط ضعفو ..وعملت فيها انو هى المكملة …وهو كمان انبرش على وشو …وبَقى بس متابعا ..وبى كل بجاحه فسخ خطوبتو من أمانى وخطبا ….غايتو عملتا ظاهره …عليك الله هسه تودى وشها وين بس من امانى دى …!!( والله انا ذاتى قلتا كده ..ومستغرب ) … !! ياختى هى بهمها ماخلاص مسكت البطل …لتستفسر الاخرى ….وهسه عليك الله امانى حالتا كيف …!!!؟ ديك قالت ليها والله ذي الزفت ..!! نفسياتا سيئة ….ومامصدقه …بس تقول ليك…. انا لو اى زول غير نوال كان ممكن ..لكن نوااال ماقادره اصدق ….!!! لكن حلفت وقالت انها أصلا قنعت من الإسمو معتز ده …لكن حتوريهو حاجه حتخلى يكلم نفسو …(ابو الزفت امريكيا روسيا قد دَنا عذابها ) اها انا هنا وبكل احساسى اتجهزتا للحاجه دى …..!! ديك قالت ليها والله فعلا لو عرف حتكون مشكله كبيره …لكن بينى وبينك نوال تستاهل وهو كمان …!! بتصدقو البنات ديل فى اللحظه دى قالن للكمسارى قرصه نحن نازلين هنا ……!!!
لا حول الله …ده كلام شنو ده هسه …لكن ماقرصتونى انا كده ..وعصرتو على شديييد …!!!
وينا الحاجه …!!!؟؟؟؟ والله ياخوانا بس فضل لى أسألن ولا انزل معاهن ..غايتو اتسحبن مرقن خلونى مافاهم اى
حاجه …!! ياربى امانى دى عايزا تقول شنو ….!! وهو معتز الجن ده عرس نوال دى ولا لِسَّه ..غايتو الحافله دى دورت مشت وانا محشور فى الكورنه ذي الحرامى …ماعارف ذاتى انزل وين ..نسيت اى حاجة …اريتنى كان ماركبتا هنا ..!! اهم قضية تجارة بشر …ماعرفتا نهايتا شنو…!!! الله لاكسبك يانوال بعتينا انا وأماني فى يوم واحد …ياربى مابلقى امانى دى أسألا الحاجه دى شنو…!!!!
error: Content is protected !!