غايتو امام الجامع حقنا ده غايتو بس استغفر الله من حقو ..!! خلانا ذاتنا نمشى صلاة الجمعة دى ويدنا دى فى قلبنا ده …ياخ الراجل ده مما دخلنا بس شغال فينا ….نار حامية …!! يوم تصلى جنوبكم ….!! الجحييييم ….الوييييل …!! مشتهى يوم يجيب لينا سيرة الجنة دى والله …!! عقدنا نحن ذاتنا .. انا قلت الزول ده انا لازم انبهو..!! وانبرى ليهو …تانى قلت انت ياعلوب جنيت ولاشنو …!! هسه يطلعو ليك تلاته كده والله يكفروك عدييل كده …يقولو ليك داير الجنه مش كده ياعلوب ..!!!؟ الجنة ياكافر …..!! الجنه انت سويت ليها شنو …جاهدتا ليها ..ولا خرجت فى سبيل الله ..ولا اطلقت اللحى …ام صمت الدهر ..!!
ماهو غايتو واحد من اتنين اما الجماعة الدرسونا حصة الدين من زمان ديل غشونا …!!؟؟ لأنهم كلهم وبالإجماع فهمونا انو الدين يسر وليس عسر ….وابسط مما نتخيل ..!! وانو الدين هو ان تخالق الناس بخلق حسن …والدين هو المعامله …!! اى والله عديل كده اختصروهو كلو فى كلمتين …!! ( الدين المعامله) …!!! والرسول ذاتو (عليه الصلاة والسلام ) قال أصلا السبب الرسلوهو من اجلو انو يكمل مكارم الأخلاق ..!!عديييل كده..!! ده السبب الرئيسى …!! اها فى شنو تانى …!! ولا كمان أمكن يَكُون الزول بدوهو الحاجات الساهله دى دى وهو صغير اول مايكبر يخشو ليهو فى التقيل…!! اها ياتا فيهم …!! (اى واحد يمشى يقرا ليهو كتاب كتابين يجى يفتى فينا ….!!). وبعدين الراجل ده مركز لينا مع كتب الحرب والقتال دى تركيز شديد خلاص …!! وقصة كده انا ماقادر أفهما والله …!! ياربى أمكن أكون انا غلط … …!!؟؟
يازول والله انا لاغلط ولا حاجه …يعنى حبوبتى دى مثلا حافظا ليها تلاته سُوَر مما شفتها بتصلى بيهم وحجت بيت الله ومرا بشوووشه ..ومابتزعل إنسان ..ولا بتتكلم عن زول … وطيييبه شديد ..!! (الله يرحما …). يعنى لو ماعرفت ….شروط واحكام البيوع والأساس …وقرائن الأحوال في القياس …ماحتنافس فى الجنة ولا شنو ..!! زوله ناجحه فى العمل الصالح …!! فى شنو تانى ..!! (وفى ذلك فليتنافس المتنافسون …!! ) ..!! والله يا حبوبه أقول ليك كلام ….فى زول دخل الجنة دى بى (كلب ) وواحده مرقت منها بى (كديسه ) …والله جد ..!! ابشرى يافاطنه ان شاء الله الفردوس الأعلى …!! مش ياهو ده ظنك …(الكريم لايخيب الظنون …) ….ديل مكبرين اللفه ساكت …!!
بعدين ذاتو ياخ صرصير الوش ده شنو…!! طالع فى المنبر ده بى عصايتو يشيل ويرفع فيها …ويعاين لينا شذرا …أيها الضالين …ستدخلوها نارا حامية …!!! بعد شويه ….السعيييير …بس كلامو كلو كده …ياخ نجضتنا نجاض …!! ونحن تحت ذي المساجين نتلفت ..!!! يازول انت مشاكلنا ولا شنو .!!!؟ والله الحديث القرينا …واااضح وصريح …تبسمك فى وجه اخيك صدقة …(اها كمان ده بتغير …!!؟؟ ) طيب الناس دى ماتلقط من الصدقات دي مجانا اصرف بسمه تاخد عشره …هسه لو كان عرض من سودانى اشترى بى جنيه وأتكلم بى عشره كان اشتركتا ….
المهم قلت الليله غايتو لو الامام ده كتر لينا من (التهديدات) دى والله انا …بتكلم …!!! ولم يخيب ظننا ..!! الخطبة كلها كانت عن النار …!! البخشها منو والمابخش منو …!! ياخ هى مباراة ….!!؟ وهو الكشف ده ماسكو انتا ..!! ولا هو الحاصل شنو ذاتو …!!!!؟. اتقى الله فينا ياخ …..!! اها فضل ليهو يقول كان ماجيتو صليتو معاى انا هنا صلاتكم دى مانافعة …!! لانو هبش ليك الباقين كلهم قال ديل أئمة ( التيسير ) ..!! طيب مالو ..!!؟؟؟ …!! وادانا ليك فكرة كده بس انو الحياة دى مفروض يانصوم ..!! او ناكل قرض …!!! بس …!!! قال مابتستحق ..!! (الغريبه بطنو الشايفا انا دى ماااابطن قرض ..!! )..ياخ ربنا ده ذاتو ماقال (وأما بنعمة ربك فحدث ) …!! ولا انت الآيات الذى دى بتفطها ..!! يعنى نخلى كلام ربنا ونتابع كلامك ده ولاشنو قصتك …!! مالو يعنى لو لبست نضيف وأكلت نضيف وعشتا نضيف …!! طالما مش ماحرام …!!! المشكلة وين !
يازول مالك معانا ..!! والله شككتنا انك داير تكرهنا الطيبات دى عشان مانجى بى هناك نعمل ليكم زحمه …
ياخ عقدتونا ذاتو والله ….ليه مصعبين الحكاية شديد كده …!! انا مرات بمشى الصلاة دى بى بنطلون وقميص والله فى واحد كده بحدر لى حدره التقول انا جاى بيتم..!! مابيت الله ده …!! بعدين فى داعى للتجريم ده ياخ …الله ده ماعارف الجوه شنو …!!؟؟ يعلم مافى الصدور دى مامرت عليك …!! انت مالك ومال الناس …يعنى خلاص انت أحسن واحد …!! بعدين هو الامام ده وقت منفعل كده ولايخشى فى الحق لومة لائم وشايتنا ضفارى كده ومعتبرنا قرايب ابو لهب لزم …!! وحانى علي حالنا ده !! مالك ماتجيب سيرة البصل …!!!!!؟؟؟ (ولا ده بجيب دموع …!! )
والله وقت يقول ليك …هؤلاء السفهااااء الذين يلتهون بمتابعة كرة القدم ويتركون صلاتهم …الجامع ده يتهزا !! انت اول حاجه القال ليك تركناها منو …!!؟ جيت معانا البيت ..!! بعدين ان بعد الظن اثم ياخ …!! اها لو تابعنا الكورة وصلينا برضو ..!! يكون موقفك شنو …!!! تكون بس أتحرجتا شديد ..!! بعدين السفهاء دى شنو…!!!؟. يازول ماتنتقي ألفاظك..!!!؟
ياخ فى ناس هنا الله ده من فوق هداهم ..بقو يجو الجامع ده يصلو…!! عليك الله ماتطفشم لينا بى نوع كلامك ده …!! ياخى انت ماسمعت (بالمؤلفة قلوبهم .). .خليك من المسلمين عديييل ديل ..!!مالك ياخ …
اها كمان وقت يقبل ليك على النسوان ديل …(لما يستعدل فى الوقفه ) وتحلف تقول مره بتخش الجنة دى مافى …!! ساميهن حطب النار …!! كل مره يقول لينا ديل تلاته ارباع النار منهن …!! ياخ حرام عليك …!! ديل مافيهن أمك ..وأختك ..ومرتك …لو عندك مشكله فى البيت حلها هناك ….( السلام من الداخل ). هسه فى داعى للنبيشه دى …
قول الله يهدى الجميع ..!! قول ليهن ماهى شروط الزواج …!!؟؟ وريهن متى يجتنبن الصوم ….!!؟؟ اشرح ليهن كيف يخرجن للمسجد …!!؟؟؟ بس لامى فيهن ياكاسيات ياعاريات …النار ..النار ..ياخ ماقالو ليك انو فى جنة برضو…!! وريهن يخشوها كيف ….!!! وريهن الاسلام قال المراة تخرج كيف الى الشارع ..!!؟؟ فى شنو ياخ …!!
عليك الله بى حليفتا امشى شوف امام الجامع الجنب حلتنا ده كيف ..!! واخد ليك دوره وتعال …اول حاجه الناس دى كلها بتحبو …ولطيييف ..!! يسلم على اى زول والخطبة ذاتا تفتح النفس …والجامع ده مليان فل …شغلو كلو جنه ونعيم بس …اها بوريك حبه حبه كان دايرا تخشها تعمل شنو …مقرر ذاتو ماتقيل تنجح بارتياح …صلى …..!!! وزكي … (لو عندك ) …حج (لو قادر .) صوم ..(لو نَصِيْح ماعيان ) ..شوف (لو ) دى ذاتا كيف ..!! وأتأمل …!! ده كلو تسهيل وتبسيط للاجراءات والامتحان بس دايرنك تنجح بأى طريقه يلزوك لز (انت جايبا لينا ورقة الفيزياء بتاعتك دى !! ) وديل كلهم الناس بتعملم من غير كلامو ده …اها بعد داك بخش ليك فى العضم …واصل اهلك وأرحامك ….!! وشوف العيان امشى ليهو ….!! وسلم على الناس ….!! ماتمد يدك للحرام …..!! بر ابوك وأمك …اعطف على الصغير ..احترم الكبير …ارحم اليتيم …زور العيان …قول الكلام الطيب الحلو …..! وبس ياهو ده ! عليك الله هسه الكلام ده صعب ….شابكنا …النسوان فعلن والنسوان تركن …!! ياخ فى حاجه فى سَنَن الوضوء اسمها الفور والدلك …والله لو كنتا بس وريتنا معناها شنو كنتا عملتا لينا نقله …!!! شابكنا ..!! امشوا جاهدو فى بورما…!! هو نحن ياخ قادرين نمشى المينا البرى ..!! خليها بورما ..!! ..ياخ الدين ده إنتا ماكلموك قالو ليك حسب الاستطاعه …ونحن هسه فى مرحلة القلب واللسان وأضعف الإيمان …!! انت لو قادر عليك الله طوالى امشى ..!! قشه ماتعتر ليك ….بالتوفيق ياشيخنا ….ياخ الصوم ده كان عيان عفوك منو لحدى ماتبقى كويس ..!! ) …اها ده ركن عدييييل ..خليها بورما ….!! مالك ياخ …ترهيب ..ترهيب …انت صفحة الترغيب دى مشروطة عندك ..
اها بعد الدق ده كلو ..!! قال قوموا الى صلاتكم يرحمكم الله …!!! والله نحنا ربنا ده واثقين من رحمتو …لكن انت الفيك اتعرفت …!!! جد مارحمتنا …
بالمناسبة ياشيخنا انتا غلطتا مرتين فى القراءة ..!! حاول جود …!! (هو صحى انتا فاضى من الحرب ..!!)
( عندما يسجد الناس يمتلئ المسجد بالأسرار ) ….!!! استغفر الله العظيم
error: Content is protected !!