الحاجه ومشاعر داخلات ومارقات ذي الحرس الجمهوري …. أمي قالت لي مشاعر ..اها بعدين نمشي نجيب شنو كده ماعارف من سعد قشره….!!! وديك (السنيحة) دي (مشاعر ) تقول ليها ياأمي الصواني دي كلها مانافعه
لازم نجيب واحدات جداد ( الجداده أنشالله التبيض ليك في نص راسك ده شحدت ربي ….!!انت دافعه حاجه..!! ) والحاجه كمان بتأمن …!!! ومشاعر تنط من هناك لازم اي (جك ) بي كباياتو …!!! (مادايرا ليك كلب بي جريواتو ) لا ومواصلة في الاقتراحات …المره دي يا أمي نعمل (تانج ) بس مع الابري والليمون والمنقه… مافي داعي للبرتكان واهو الجوافه بتكفي …!! (نسيتي الخوخ والكمثري ياشوشو….!!! )
علوب ده ما شغال في ال UN …!!
عليكم الله شوف الناس دي بتعمل في شنو…!! وتتشهي كيف …..!!! مطعم بس مطعم ..!! ده مابيت …!! اها ده الحوار المدور بره استعدادا لشهر العبادة ..وانا راقد جوه اسمع سااااكت ..!!عليك الله شوف النسوان ديل ..!! اصلهن ماقالن النستشير علوب الحيدفع ده كلو …!!! ايازول والله العصاير البقولن فيها دي كل واحد تجي سيرتو انا اتمطق ..!! اتذكر الدفع يبقي لي طعمو ملح ملح …
معقوله لكن حر وكهربا …وعمرة عده كامله …!! وفدان فواكه …!!! الراقد ليها شنو ياعلوب قوم اتخارج يبدو ان الميزانية حتكون ضاربه …!! ( هي الكبيرة ضاربة ) المابخلي دي تضرب شنو ..!! المهم اتنفضتا قمتا ..قلتا للحاجه انتو في شنو بتتباحثو كده ..!!! قالو رمضان ..!! طيب مالو رمضان ..!!!اها في شنو …!! قالت لي أجي كيفن في شنو ياعلوب في الحاجات ..!!وفي العدة ..!!!وفي الأكل …قلتا ليها ياأمي انت عارفا رمضان ده فرضو ليه ….!!؟ رمضان ده عشان الناس تحس بمعاناة الآخرين ويشكرو الله علي النعمة …!!! رمضان ده ياحاجه عشان الناس تتذوق طعم الجوع وتعرف الناس الجعانين ديل قدر شنو بيعانو …!! قلتها كدا بروحانيات عاليه قلتا ااثر فيهم ..!!! يازوول وعجبتني القصة حسيت باني الشعراوي بس …!! وداير ادخل لي في ايه آيتين وحديث ..اقلل من الخساير الجايه دي …!!! لكن هن ادني فرصه بالله الاتنين شبن فيني هيييي هيييي ياعلوب كان عندك باقي خطبه هداااك الجامع …..!! قوم اتلحلح طلع (الضحاكات ) خلينا النمرق …!! دي كمان مشاعر (تضحكي بي سن واحده انتي ) …أتأكدتا إنّو مافي أمل …طوالي طلعتا الضحاكات ….!!! وبكيت …!!!
اها دي ضربة البداية ياربي النهايه كيف …!! الله كريم علينا .. ..خلي الناس تنبسط …!! ورمضان كريم عليكم تصومو وتفطرو علي الف خير ….نتلاقي في رمضان ..
error: Content is protected !!