الليله صحيت من الصباح قافلا معاى قفله شديده ….!! ساكت كده بدون سبب ..!! تكون دى ياربى العطالة النحنا فيها دى ولا الحاصل شنو …!! والله ماعرفت ..!!؟ غايتو استحميت كده وشربت لى كباية شاى …اها قلت النشتت نشوف رزقنا وين ..!! اليومين ديل عندى شاشات تلفزيون كده بشيلم من الشركة وببيعم بره غايتو بنلقى لينا فيهم حاجه كده ..!! والله كتر خيرو أمجد شغال هناك وهو البظبط لي الحاجه دى ….(ياخ الاصحاب ديل ذيهم مافى ..) ..!! لكن والله شدة ماقافله لمن ماداير اطلع ذاتو …!! المهم قاعد كده جاتنى مشاعر اختى دى تتدبا …انا بعرفا لما تكون عايزه حاجه …!! قالت لى ياعلوب ياخ بصراحة عندنا عرس صاحبتنا شديييد وانا دايره لى حاجات ..!! قلت ليها خير يامشاعر حتى لو صاحبتكم براحه (عجبتنى شدييييد دى ) …قولى دايرا شنو ..!! قالت لى لا ..!! حاجات بسيطه كده ..!! يعنى فستان كده وجزمة ..!! يعنى اى جزمة كده مناسبة …(البت عايزه تصغر الطلب …!!! ). وانا جيبى ده الوقت داك فيه خمستاشر جنيه …لكن طبعا ماداير اكسر بى خاطرا قلت ليها جدا ياشوشو ..!! نحن عندنا كم مشاعر …!! غايتو ضحكت كده وخجلت حبه ….!! هى طبعا بتعرف الظروف !! لكن انا حمدت ربنا انو اختى لو احتاجت تجينى انا .. ..هسه دى براها ماسلامة …!! غايتو طلبا ده خلانى اتنفض وأقوم امشى اشوف شاشاتى دى وين …!! وطوالى على شركة ناس أمجد …!! اها امجد ده بى حسره كده قال لى والله ياعلوب المدير موقف اى شاشات تطلع من غير كاش ….!! انا طبعا كنت بشيلم بى سعر الشركه وبدفع حاجه بسيطه والباقى دين ….!! وببيعم بدفع قروشهم وبطلع حقى ..!! اها حسّيت بيهو اتأثر كده ..!! قلت ليهو ولايهمك ياامجد ياخ يعنى إنتا بيدك شنو …!!! بعدين مديركم ده خلى يتفرج فيها براهو ….!! انشاءالله ماتتباع ليهو …بجينى راجع …!! وضحكتا كده …!! امجد حسا انو ضحكتى دى جواها حسره ..!! لانو حتى ماشاركنى ليها ذي كل مره ونحن متعودين على (الخستكه ) دى وبنضحك مع بعض ….!! (وقد كان على حق ..) لانو انا شعرت فى اللحظه دى بى مراره كده شديده …..!! وطوالى أتذكرت طلبات مشاعر ..وحاجات البيت ..!! وقلت فى نفسي يعنى لو ماجبتا الحاجات دى انا البجيبا منو …!! ومشاعر ذنبها شنو انها ماتكون ذي صاحباتا …لابسه ومبسوطة ….!! وانا أصلا معجب بيها اختى دى لانها قنوعة جدا ومامتطلعا اكتر من اللازم وبت فاهمه ….!! لكن هسه ذنبها شنو !!! طلعت من امجد وانا حزين وحسيت انى مغلوب على امرى وأول مره احس بالقهر …!! قلت فى نفسى ياعلوب الاحساس بالقهر ده شعور المهزوم وانت ماكدا …!! لكن ياربى اعمل شنو يعنى ….!! اسرق …!!( أتذكرت مقولة قالها ال باتشينو أشهر وأعظم ممثل عرفته أمريكا ..مره قال (عندما كنت صغيرا أردت ان امتلك عجله وطلبت من الله ان يهبنى لها وانتظرت طويلا ولم تأتى…..فسرقت العجله وطلبت من الله المغفرة …!!! ). ..ماعارف ليه أتذكرت القصة دى فى الوقت دا …!!! وبينى وبينكم وقفتا فيها كده ..!! وقلتا فى نفسي ..!! هسه الناس البتسرق دى فى حد سألهم ..!! ماياهو ديل سايقين العربات …وبيوت ..!! ومتجدعين….!! لا وكمان فى ناس بتحترمهم وتكسر ليهم فى التلج ..!! ليه كده انا لافى كايس لى حق فستان وجزمة لى اختى ..!! ديل أفضل منى فى شنو …!! انا ماقريت ياخ وخلصت الجامعة بى طلوع الروح ..!! وامى دى العندها والماعندو دفعتو …!! وفى النهايه اجيها مدلدل يدينى كده ….اعمل شنو لكن…!!! اسرق ..!!! اها كلمة اسرق ..دى صحتنى من حالة التساؤلات والحيره دى ..!!! استغفر الله ..استغفر الله ….غايتو استغفرتا كده …وبقيت ماشى بس ماعارف انا ذاتى ماشى وين …!! المهم تلفونى رنا …غريبه ديل ناس البيت …!! بس اسمع ليك امى بتكورك فى التلفون سجم خشمى ياعلوب الحقنى ..!! فاطمة قالو تعبت ووقعت فى المدرسة ….!!! فاطمة اختى (كوركتا كدا ..!! ) بس بقيت ماشايف قدامى ..!! لاحول الله …!! انشاءالله خير يارب …!! بس من محلى داك واقرب امجاد …قلت ليهو سريع عليك الله ودينى المدرسة ..!!! هو ذاتو استغرب ..!!! لكن حسا بى منزعج كده قال لى قول بِسْم الله يازول مدرسة شنو ..!! قلت ليه فاطمة اختى قالو وقعت فى المدرسه. عيانه …!! اها الراجل فهم حالتى كده وقال لى كدى هدى وبرااحه قول بِسْم الله ووصف لى المدرسة دى وين ….!!؟؟ وقعد يهدى فينى !! المهم وصلنا لقيتا ودوها المستشفى …!! ومن محلى داك بنفس الامجاد للمستشفى..!! لقيت ناس البيت كلهم هناك …!! المهم طمنونى حبه قالو هسه هى كويسه ..!! سألت الدكتور ..!! ؟ قال لى مافي حاجه …!! البت دى دمها ضعيف شويه ..!! وادانى ورقة قال لى تجيب الادويه دى فورا …!! شلتا الروشته وعلى الامجاد نفسها …!! قلتا ليهو اقرب صيدليه عليك الله …!!! وتذكرت فى هذه اللحظه انو جيبى فيهو خمستاشر جنيه ..!!!
شفت الدنيا دى وقتها أضيق من خرم الابره …!! وأحسست فعلا بالقهر …!! دى هسه اديها بتاع الامجاد ده (ده لو كفت )….ولا اجيب بيها الدوا …!! دوا شنو كمان آلبي خمستاشر جنيه إنتا كمان ياعلوب !!! اعمل شنو انا هسه ..!!! ودائما الفرج ياتى من السماء عندما يسخر الاصيلين …!! يبدو انو الراجل بتاع الامجاد ده حسه بى وهو متابع لهذه الرحله …!! ولم يتردد …!! قال لى لو ماشايل معاك قروش هسه خلينا نشترى الدوا وادينى بعدين ياخ الدنيا ماطارت ،…!!! كلامو وقع لى كالمطر ….!! المهم اشترينا الدوا وفاطمة اخدت ليه درب ….!! وقالو ممكن تمشى البيت ..!! بس تتغذي كويس وترتاح …!! وركبنا كلنا الامجاد على البيت …!! ونزلو الجماعة دخلو …اها قلتا لى بتاع الامجاد لازم تدخل شويه …قال لى ندخل بى وين …!! نحن كان دخلنا الشغل بفوت…!! كتر خيرك ..!! غايتو دخلتا ماعارف اتصرف كيف …!! أقول ليهم الليله مفلس ماعندى ولاتعريفه …!! وديل المتكلين على …والله ما اعملا …!! رجعتا تانى لبتاع الامجاد قلتا ليهو شوف يابنى العم انت راجل اصيل وماقصرتا معاى ..انا الحقيقة ماعندى قروش ليك ولا الدوا الاشتريتو لى ده هسه …لكن أكيد عندى قروش حامشى أجيبا …!! فأنت دحين هاك الموبايل ده بس خلى معاك ..وادينى رقمك انا بتصل بيك وبديك قروشك وبشيل الموبايل …!! اتخيلو قال لى شنو ..!! قال لى ياخ اخجل من الكلام البتقول فيهو ده ..!! نحن وين اصلو ..!!ياخ متى ماجبتا قروشك اتصل بى وانا بجيك اشيلا …!! لكن على الطلاق انا كان شلتا موبايلك ده بس يادنيا عليك السلام…!!! ماقدرتا أقول ولا حاجه شلتا رقمو وقلتا ليهو إنتا رجعتا لى الثقة فى الناس وفى نفسى …!! انتظر تلفونى …!! وطوالى مشى …وتركنى فى حالة من الارتياح انو الدنيا لِسَّه بخير …!!! واستغفرتا تانى ..(ومن استغفر يرزق من حيث لايحتسب …)…!! اتصل بى امجد وصوتو فرحان كده قال لى إنتا المدير ده مشيت كتبتو ولا شنو ….!!! طلع ليك تلاته شاشات تعال شيلا …!! وتملكنى الاحساس كاملا واليقين مطلقا ان هذه الدنيا يديرها الملك ولاشئ غير الملك …!!عفوك ياالله ..!! وجرى على الشاشات ….ضربتا لى بتاع الامجاد اديتو قروشو وعزمتوا غدا…!! قلتا ليهو دى كرامة فاطمة …وجيت سقتا مشاعر واحلى فستان وجزمة …!! وعصرتا للحاجه فى يدها …!! وناس بيتا اليوم داك اتعشو بكل انواع الطيور والأسماك …!! وايسكريم. لى صفاء ..بتريدو شديد ….!!! وتفاح وبركتان لى فاطمة قالو لازم تتغذى …..!! اسرق العجله براك يالبتشينو واطلب المغفرة …!! نحن بنطلب المغفرة بس …!! العجله برسلا الكريم ….!! ماتستعجل …!!! فهمتا يالباتشينو ….!!!
error: Content is protected !!