والله لاعرفتو بكا ولا عرس …كنتا مع حافظ صاحبنا فى المحل …قال لى علوب ياخ ماتمشى معاى ناس منعم ديل عندهم وفاة …انا كمان ولا كضبتا ..دى فاتحة كمان …!! ولا سألتا المات منو …!! طوالى معاهو …!! نحنا كمان ناس حارة ..!!! والله دخلتا الصيوان ده اتفاجئتا…!!! اول حاجه الكراسى دى مرصوصة ومعاها الترابيز ..!! قيدومه راسا عدييل …!! والعربات دى بى بره تتطاقش …!! يازول شلنا الفاتحه انا ذاتى ماعارف الميت منو …المهم قلنا نقدم الواجب ….!! قعدتا ليك جنب حافظ ده بس أعاين …!! يازول عمم وجلاليب ….طن ..!! وسرامس الشاى دى مجدعه ذى الكشتينة..!! والونسة والضحك والقرقرابه ….!! اها موضوع هيثم مصطفى بقوهو مساعد لمدرب الهلال ده الأكثر تداولا ..!! وسيرتو لافه اكتر من المرحوم ..!! الموضوع التانى عن واحد كده مسؤول كبير قبضوهو فى سنار ….!! نمره تلاته قالو الاماراتية حتختصر رحلاتا لى رحلتين فى الأسبوع للخرطوم ..(ديل طبعا جماعة الصين والأسبيرات) ….وناس كده بتعلق انو الشتا السنة دى حيكون صعب ..(ديل الماعندهم موضوع ..!!! ) .. اها دى العناوين الأكثر تداولا فى صيوان العزاء ..!!! مافي اصلو زول جاب سيرة المرحوم …!! ومافى سيرة غاز وبصل وحاجات ذي دى ..الظاهر الخبر لِسَّه ماوصلم ..!! والجرايد دى كلها لافه اكتر من برنامج تحت الطبع ..!! ( ده غير الرياضية) …والجماعة قاعدين ليك دواير دواير …!! والشاى والقهوة لافين ..( يكونو نسو الفشار..!!! ) اها وناس كزام ديل متحزمين تحلف تقول المات ده منهم . …قلتا لى حافظ صاحبى ده …انت المات ده منو هو ذاتو ..!!!؟؟ قال لي كيف ياخ …ده ماحاج الرضى ابوسفنجه ..!! قلتا ليهو يازول ..!!! ده ابوسفنجه ذاااتو …!! (طبعا ده راجل معرووف ..(قروش الجن والجنبو …) سامينو ابوسفنجه قالو زمان كان شغال فى لوري سفنجه .. .. !! (غايتو فى ناس كان الله ده من فوق رحما بى (دكتور شول ) تاااانى يجيبو ليك سيرة (السفنجه) …!!( خليكم فى سفنجتو دى …!!!) اها الزول ده هسه بكون عندو ذى أربعين شاحنه كده ومصنع غير المغالق والبيوت وعمارتين فى السوق العربي …!! قلتا ليهو ايوااا ..عشان كده البكا جايب دخل ….!! المهم يازول اولادو ذاتو تحس بيهم مستعدين للحدث وما متأثرين شديد …!! قالوا الحاج ده سنينو الأخيره تعب كده ..!! وعيان .!! وطواالى راقد ….والأولاد ديل ماشغالين بيهو كتير كل واحد مشغول مع الست الهانم بتاعتو والعيال ….!! وكلو بياكل من خير المرحوم ..!! عشان كده البكا شكلو كده احتفال بنهاية المعاناة وعودة الشرعية ….!!
والله لكن هى جنس مناظر ..!! اول حاجه لاحظتها انو عدد الواقفين يشيلو الفاتحه يتوقف على عمة المعزى وحجمها ..!! فكلما كانت الجلابيه بيضا مكويه ..!! والعمه مفلفله وملويه ..!!…..زادت درجة الأهمية ..!!! وكان عدد الوقوف بالميه ..!!! اغلبهم من غير اهل المتوفي …!! (ديل بكونو ناس الشيكات ..!!)..!! يعنى جا واحد مسكين كده ..!! وقفو ليه ذى اتنين كده وبعد تلتله ..!!! واحد قريب المرحوم من الدرجة الرابعة ..!! والتانى جابو الدرب ..!!! وقفه ذاتها تحنن !!! تحسا بيها تعبااانه …والله خلوهو يشيل الفاتحه على روحو دى….!!! اها وقتين مواعيد الغدا قربت المدرجات دى اتملت فل ….صوانى تقيله …الضلع ده داير ينط من الصينيه …والمويه معدنية …!!! (المويه المالقاها المرحوم) …غايتو بس فاضل الساوند سيستم ….!!
اها والنسوان ديل بجن بى جنب الصيوان داخلات يعزن …توبى وتوبك ..وغويشتى وغويشتك ..مباراة فى الدهب
والتياب …قالو تياب البكا دى تشكيلتا براها ..(تكون بتتمصر من البكا ياربى) … !! ومفتاح العربيه ده اهم حاجه يكون بى علاقه كبييره ..!! تكشكش معاها الايفون والجلاكسي … ..!!
والغريبة جوه مافى اى صوت بكا الظاهر مكتفين بالأسى والنحيب …..!! والله كان ده فى حلتنا كان وووب واحى دى تجيب الطاشى …مع وصف حى ومباشر لمااثر الفقيد ..!! ( ياربى مالقو بكايات بالايجار يحررو بيهن البكا ده .. ) يازول انا اتضايقتا ضيق شديد ..!! قلت لى حافظ يااخوى خلينا نتخارج من الصبحية دى …!! لو قعدنا شويه جماعتك ديل حيجيبو ندى القلعة ….غايتو يالمرحوم ماتستاهل …جيت بى سفنجه …ومشيت بى سفنجه …وبكاك فضل ليهو الكمنجة …..!!! …. …..وأولادك بلقوهو فى اولادهم …نسال ليك الرحمة …ومبروك عليهم (السفنجه ) ..!!!
error: Content is protected !!