( علوب …اسمك مختلف …لكن حلو …!! )…!! بس كده ….!! رسالة فى الفيس بوك من الصباح …!! قريتا كده ذي سبعتاشر مره ..!! الراسل ..واحده اسمها ( عطر الصندل …!!) … والله ياخوانا جريت جرى على صفحتا فعلا لقيت ليك البروفايل ده ذاتو لمن ريحتو فايحة …..!! غايتو اول يوم تجينى رساله حلوه ذي دى …..!! وصورة البروفايل دى رغم انها عيون بس مافي حاجه تانى ظاهره … لكن عيون ذاتا تحير ..!! اها هسه ياعلوب ترد ..!! ولا تتقل شويه…!! ولا تتصرف كيف بس …!! يازول تتقل شنو …!! البت كبت العندها الدور عليك ياعلوب …!! (تكون دى صورتى الاخيرة الجدعتها فى الفيس دي جنب البحر …!! والله هى ذاتا لكن ماصورة غريبة ..!! ياخ ليك حق تعشرقى ياعطر الصندل وتتكسرى كده …!!) المهم قلت اديها رد كده بشحتف ذي رسالتا دى ….!! طوالى يازول كتبت ليها …(الصندل لانو مختلف وحلو …!! بشوف الناس حلوة ….) لوووووول …عجيب يا ابو علوه…رد صاقعة ..!! المهم قريت ليك رسالتى انا ذاتى عشره مرات كده وطوالى عملتا send ..!! لمن قلبى ذاتو دقا …!! اها بقيت بس منتظر متييين ترد …!! يازول وقت مرت ساعتين ماردت قلقت شويه …!! ياربى أكون زدت المحلبية شويه …..!! لكن هى كمان ماقالت لى اسمك حلو تانى تقول شنو ..!! اها افرض ياعلوب هى قالت ليك اسمك حلو …تقوم تقول ليها انت ذاتك حلوه …!!( الله ينعلك دايما متسرع …) اها طارت ..!! والله دخلت لى فى زهجه كده …الغدا ابيتو…!! بس كل مره كده أدى ليك الفيس ده نظره ..ألقى ليك محل الرسايل ده خلا … وبقيت مركز مع الإشعارات ….!! اها ذي الساعة سته كده اسمع ليك تيت تيت تيت …📢والله لما الموبايل ده وقع منى …..!! بسرعة فتحت ليك الرسائل ..ألقى ليك صاحبنا ( مصدق ) هو المرسل ….(كيف يامدير … الليله العشا فى الجان الساعة تسعة نتلاقى هناك فولة كاربه .. تمام يافرده …! الجن اليركبك ياخ …ده وقتو …!! ولا رديت على ذاتو ….!! (أقول ليك عطر الصندل تقول لى فول الجان .) المهم غايتو بس اليوم داك كان أطول يوم فى حياتى …كل دقيقتين كده افتح الفيس أعاين فى صورتا بتاعة البروفايل طبعا مافى صوره بس عيون كده بكتلن عديل …!! اها رسالة واحده مافى …!! بس ذي الساعة اتناشر بالليل كده …تيت تيت ..(أمممك رساله ) …!!🕛فتحت ليك الرسائل والله داير أغمر …!! عطر الصندل send you massage …..اركز ياعلوب جاك الموت
بس أعاين فى الأشعار ده قلت استمتع بيهو شويه قبل ما افتح …!! لكن ماقدرت وفتحت الرسالة …شوفو جنس الكلام ده …(انت الأحلى ياعسل ….) …!! خلاااص انا الفينى كملت …!! بقيت اشوف الاوضه دى لافه بى ..!! طوالى رديت …(العسل انت والشهد انت وكلو انت …) ..!! وارسال سريع ..!! دقيقتين كده جانى الرد عباره عن .ضحكة ….هههههههههه…بس كده ….!!! ياسلااااام …!! انا ذاتى ضحكت …!! وطوالى رديت …(ضحكتك ذاتا غير) ..!! وهى رد ت (..لأنك غير …..) ….وبدا السيل ….
انا …ممكن أتعرف عليك اكتر …
عطر الصندل …ياطماع …اصبر شويه
انا …ماقادر انت عملت فينى شنو..!!!؟
عطر الصندل …انا دى …ليييه كده …!!! ( معاها صورة الوش داك الخجلان )☺️
انا …عليك الله ياخ..!! والله ماقادر اصبر ..
عطر الصندل …لا لا ياود ياتقيل …لا لا يامدلعنى …!! لا لا لا لا انا بالى طويل ..وانت انت عاجبنى….
علوب ….اموت انا ياخ ….والله كأنى سامع صوتك وانت يتغنى …!! (حاولت أرسل صورة الزول البرقص داك …من الرجفة رسلت صورة القرد المندهش 🙊
عطر الصندل …هههههههه …So funny …انت بتجنن ياعلوبتى..!!
(جابت ليها علوبتى) …(وبالإنجليزي كمان …). اها الوقت ده انا أزرار الموبايل بقيت شايفا طشاش ….أقول شنو هسه انا ..اكتب شنو !!؟ ايواا …ياعطرى انت وياحياتى كلها …!!!
عطر الصندل ..بطل يابكاااش ….(معاها صورة الزول الخجلان تانى ) ( وجنبو المبتسم )☺️😊
علوب …..عليك الله ياخ كلمينى عنك وعن نفسك ممكن ..!!؟ عليك الله
عطر الصندل …لا ..
انا …عليك الله عشان خاطرى ..!!
عطر الصندل …مش قلت ليك انت طماع …!! انا عطر الصندل ..ماكفايه😔
علوب …والله كفايه ..!! لكن عليك الله قولى لى انا مش علوبتك ..!! انت منو ياخ ..!! مماتتخيلي انت عملتى فينى شنو بالجد كده انا ارتحت ليك شديد ..ونفسى نعرف بعض اكتر…!!
عطر الصندل …عارف حننتنى …!!!! شوف ياسيدى انا أسمى مرمر وانت ممكن تستنتج أسمى الحقيقى …بدرس صيدلة …كنّا عايشين فى الإمارات وهسه مستقرين فى السودان …ساكنين الرياض …وبس ..!!! قصرنا معاك …!!!
انا ……انت لكن بتقصري …اموت فى الصيدلة …وأحب دبى ذاتا …وادردق فى الرياض…
عطر الصندل …هههههه… ياود روق حبه ..
علوب …اروق كيف انت خليتى فيها روقه انت ماعارفه عيونك دى عملت فينى شنو..!!؟
عطر الصندل …عيونك فيها شى يحير …!! عيونى دى هسه سألتك ..!! 😍
علوب …قولى كتلنى…جنننى …عذبنى ..!!
عطر الصندل …ههههههه😂 you are soo cute
(رغم انو دى مافهمتها كويس لكن البركة فى الضحكة ام دموع دي ..)وطوالى قلت ليها ياخ انا عندى طلب ..ممكن..!!؟؟
عطر الصندل … تامر ياسيدى …☺️
انا ….ممكن بس اشوف وشك ده كامل …!! العيون ديل جهرونا ..انا أسف لكن أكيد انت بتثقي فينى ..
عطر الصندل …لا انت زودتها خالص بقي …!! اووووف.😁
علوب …خلاص ..خلاص ..!!ماتزعلى بس والله انا ماقصدتا حاجه ..!! بس عشان أعرفك اكتر …انا أسف زعلتك
عطر الصندل …لكن ياعلوبتى انت عارف الصور دى حساسه شويه ..ويعنى….!! كده
علوب …والله بمسحا طوالى …!! انا بس كان نفسى اشوفك بس مااكتر …على كل انا اسف وبعتذر…!
عطر الصندل …مابحب الراجل البتاسف وبعتذر كتير ..!!😁
علوب….. هى لكن أقول شنو …بس انا خايفكك تزعلى …انا ماصدقتا لميت فيك ..(تانى قمتا للعك ياعلوب هى قالت ليك مابحب الراجل البعتذر ويتأسف كتير …فى داعى لى ماصدقتا لميت فيك دى )
علوب ….خلاص خلاص ..انا بس داير اعرف الشخصية اكتر ده من عشمى الظاهر اتفائلتا اكتر من اللازم وطلعت مابستاهل الثقة دى …
عطر الصندل …..عارف …!! تانى حننتنى …!!!😍 توعدني انك تمسحا …!!؟ ولا أقول ليك مابرسلا انتو كلكم الأولاد مستهبلين…😜
علوب …والله لا ..انا غير ..عليك الله ياصندل انت براك بتشوفى …!!
الصندل …امممممممم….😉عارف ياعلوبتى…رغم انو ماعملتها قبل كده …لكن صدق حاجه كده خلتنى اثق فيك ..دقيقة بس …..
اها دى كانت أطول دقيقة فى حياتى ..(والغريبة الساعة جنبك تبقى اقصر من دقيقه …) اها وانا قاعد بس مبحلق فى الموبايل والثواني تمر وظهرت الأميرة …….!!!!
والله ياخوانا دى أسوأ ليله فى حياتى كلها ….ودى اكبر كارثة تمر بى فى عمرى …!! الصورة الجات طلعت صورتى انا ومصدق صاحبى الحيوان ده فى البحر …!! ومعاها صورة الوش الكبير داك البضحك ومشتت الدموع… والتانى داك البضحك ولسانو طالع …والتالت داك البدردق فى الواطه من الضحك….!! عطر الصندل طلعت مصدق الجبان الحقير …!!! لا وكمان مرسل لى رساله كاتب فيها ….ههههههههىىى. ههههههوووو والله ماقادر اكتب من الضحك 😂😭😂😭…تعيش وتاخد غيرا ياعلوبتى ههههههههه.😂😭😂 ماقادر ماقادر ….الفولة فاتتك ،،،،!!!،اتخيلو بالبساطة دى ….غايتو بعد فقت شويه عزلت اكبر block ردمتا بيهو مصدق فى بروفايلو الاصلى والمزور باسم عطر الصندل التى تحولت لطعم الحنضل …!!! والله انا حالف الا ما الاقيك يامصدق …ولى هسه مالقيتو كل مايشوفنى بخلى لى الشارع ….!! حتى فى الفيس ماتلقى انيس …لو ما أدبتك يامصدق ماببقى أسمى علوب ..!!!
error: Content is protected !!