انتو الناس البغتربو ديل بغتربو كيف ..!!؟؟ شى السعودية..!! وشى الإمارات..!! وشى قطر …!! واحدين لافين فى أوروبا …!! وجماعة وصلو أمريكا …انت ياعلوب المقعدك هنا شنو …!! لا لاقى شغل ..!! ولا فى قروش ..!! وغاز مافى ….!!وتمشى اى مكتب حكومة يتنهرو فيك …!! وطوالى رسوم ..!! رسوم …!! بس تدفع يوم واحد ماقالو ليك هاك ..!!!
.كمان لكن اعمل شنو…!!؟ يعنى نغترب كيف ذاتو …!!؟. الجماعة تتصل عليهم فى الخليج ..يردو عليك (ده لو ردو) بى ردود كده تطمم البطن ….!! والله الفرص بقت ضيقه ..!! البلد ذاتا هنا بقت غالية …!! مابعرف النفط اثر على التوظيف ….!! والله الواحد بس تقول بسمع فى ندوة …!! انتو مشيتو كيف ذاتكم …!! خلاااص يعنى اتصلوا بيكم قالو ليكم تعالوا ياخبرا نحن عايزنكم …!!! يازول انا ذاتى مادايركم ..!! الله معاكم .!! انا ماشى أوروبا البقولوها دى …!! ياخ والله كان مرقنا من السخانة دى بس سلامه …!! اها أتذكرت ليك مره منتصر صاحبى ده قال فى ناس تديهم تلاته الف دولار يختوك فى بطن اليونان وبعد داك ممكن تشتت اى حته دايرا فى أوروبا دى …!! رحلة بالبحر مضمونه ماذي بتاعة سوريا دى …!! قال فى كم نَفَر مشى …!! قلت ياعلوب هو انت هنا راكب التونسية ..!! ماتركب البحر ده ..!! فرقت شنو …!!
بس بقيت أفتش على الجماعة ديل ..!! والله صحى اللي بسأل مابتوه ..!!! لميت لى فى واحد (شفت ) كده قال لى ماعندك اى مشكله الجماعة ديل على مسؤوليتى وورانى ليك صور كده للمركب بتاعتم والله تايتانك بس ..!! يازول مجهزة ومظبتا شكلها ذاتو يطمن …!! انا ذاتى ارتحت ليها …!! قلت بس جاك زول يااوروبا …!!! أمريكا ذاتا خليناها ..!! قال اللوترى قال ..!! وهو نحن كان عندنا حظ بجيب لوترى ماكان لقينا لينا شغل هنا فى (الكتاس ) ده ….!! هسه المشكلة فى التلاته الف دولار دى يجيبوها من وييين ….!!! اها الحاجه الله يديها العافيه شافتنى مهموم كده وقلبا حسا ..!! قالت لى انت مالك ياعلوب اليومين ديل شايل الهم كده وصحتك ذاتا ماشه فى النازل …!! قلت ليها والله يامى انا داير اسافر اشتغل بره …!! قالت لى سجم خشمى ياعلوب وتخلينا لى منو ..!!؟ قلت ليها ياحاجه انا ما مسافر عشانكم..!! انتى شايفه البلد دى بقت صعبة كيف …!! انا مالازم كمان أتحرك واعمل حاجه ….!! والله قربت تبكى ..!! قالت لى ياعلوب انت الولد الوحيد ياهو مع أخواتك البنات ديل تخلينا كده فى السهله وتمشى …!! انا مابموت ياعلوب كان انت مشيت …!! اها وقَعَدت تبكى …!! والله انا ذاتى لمن بكيت ….!! قلت ليها البجيكم شنو ياامى انا ما ماشى عشانكم انتو وعشان اخواتى ديل …!! انت شايفه براك ..شغل ذاتو مافى…!! والبلد دى بقت غاليه كيف ….!! قالت لى الله كريم ياعلوب انت قايل الرزق ده عند زول ….!! الله الخلقنا ده مابقدر يدبرنا…!!؟ البركة فى لمتكم دى جنبى انت قايل دى هينه …والله ياعلوب ياولدي فى مغتربين كان قالو ليهم نشيل قروشكم دى كلها بس نديكم قعده ذي دى جنب أمكم الا يجو صادين …!!! قلت ليها يا أمى انشاءالله اجيك شايل الدولارات دى وأفرحك ..قالت لى هو انت مافي …!!؟؟ الدولارات بسو بيها شنو …!!! الله يرضى عليك ياعلوب خليك معانا هنا …!! انشاءالله ربنا يقسم ليك شغل …!! هسه طلعتك ونزلتك فى البيت دى وتراكا راجل البيت ده مع أخواتك …!!! ما بالدنيا كلها …!! نطت مشاعر اختى تسمع فى الكلام ده قالت ليها مالو ياامى كان لقى ليهو شغل مايسافر …!!؟. الناس دى كلها ماسافرت…!!! على الأقل يمرقنا من الحالة دى …(المجرمة دى الظاهر قفلت على الجلاكسي والفساتين …!! …). اها أمى وقت شافتنى كده قالت لى الله يسهلا عليك ياعلوب ..!! لكن والله انا مادايراك تتغرب ياولدي …!! ونحن من بعدك نضيع …!! ياكا الولد الوحيد الخلاك ابوك الله يوسدو البارده وفات !!! قلت ليها ولايهمك ياحاجه انت قايله شنو..!! العالم ده مابقى قريه صغيره ( رجعنا تانى لى كلام التلفزيون ) والله كل يومين اجيك …!! غايتو قبلت كده على مضض ..!! والله والدموع دى فى عيونا …!! الله كريم عليك ياعلوب الا انا نفسى مقبوووضه …المهم طمنتها كده …!! وصدقو المسكينة عندها دهيبات كده أدتنى ليها عشان نشترى الفيزا انا طبعا فهمتها انو ماشى الخليج عشان ماتتخلع وأول مرتب حنرجع الدهيبات دى فى فى محلتا …..!!! قالت لى الدهب يطير …انا دايراك انت فى رويحتك دى …!!! وتانى بكت !!! والله قربت اقعد ..!! تانى قلت اجمد ياعلوب ..!! بكره تعوضا بالتقيل …!! المهم …!! جرى على الراجل قلت ليهو دى ألفين دولار …!! وألف دولار لمن أصل هناك والله أديك ليها …اها منتصر قال ليهو انا بضمنو…غايتو عاين كدددا …ووافق بعد تعب …!! قال حنمشى ليبيا عن طريق الفاشر ومنها بالبحر لليونان ..!!! اها ودعت ليك ناس البيت ..أمي دايرا تموت من البكا …ومشاعر ذاتا والله بكت بكا …!ا. اول مره أشوفها تبكى كده ..!! وفاطمة اختى بس ساكته تعاين لى لما شفقتنى ..!! وأخواتى الصغار ديل بس يعاينن ..!! صفاء الصغيرة دى قالت لى ياعلوب جيب لي معاك تلفون ..!! قلت ليها تعملى بيهو شنو …!!؟؟قالت لى أكلمك بيهو لو فى زول شاكلنى …!! وهو ذاتو فيهو لعبات جوه !!! والله فى اللحظة انا ذاتى بكيت. ..!! بكيت ..بكيت لما ماقدرت …!!! اها ياخوانا العفو والعافية …!! واصحابى ديل بس كلهم معاى …! والله متأثرين شديد ..!!غايتو ابراهيم ده والله لمن بكا…ومعمر بس يعاين فى الواطا ..!! اها انشاءالله ربنا يوفقك ياعلوب …ومع السلامه ياعلوب …!! وحتوحشنا …!! اها فى اللحظة دى شفت ليك حلتنا دى اجمل مكان فى العالم بقيت أعاين فى كل تفاصيلا …شوارعا ..بيوتا …دكان ( يس )..الغسال …شفع الحلة …الجامع …كل حاجه …كل حاجه …!!
المهم بسرعة ركبت العربيه وهو كلهم طبعا فاهمين انو حامشى جده عن طريق بورسودان ويازول ناس معمر ديل معاى لحدى المطار …السفريات الداخلية …مادايرين يفكونى غايتو ودعونى …معمر من البكا قعد فى الارض ..!! ومصدق (عطر الصندل ) صدقو جا المطار …!! وانا حضنتو .. !! يشيل ويصور فى اللحظات الاخيرة بالموبايل والله ماتقول مصدق المستهبل داك عيونو مدمعات ..بحبنى جدا ..(بس هو ملعون …!!) حضنى شديد وقال لى خلى بالك من نفسك وأعفى لى ياعلوب… !! وانا ركبتا الطياره ماقادر اشوف من الدموع…اها وصلنا الفاشر ومنها الى ليبيا رحلة شفنا فيها الويل اها في ليبيا قالو الرحلة حتبدا يوم السبت الساعة اتناشر بالليل …فعلا لقيت المركب دى والله كبيرة لكن ماظنيتا الشفتها فى الصورة ديك مافى اى علاقة …!! لكن نعمل شنو ..!!؟ البقت بقت ..!!!اها ولقيت ليك سبعين علوب ذيى كده واقفين …!! يازول اتوكلنا ركبنا ودورنا …وكل مالمركب دى تمشى لى قدام اتذكر ليك ناس أمى وصفاء وأخواتى وأبكى …والدنيا ليل والناس دي كلها صانه ..!! بس صوت الموتور ده مدور …!! وأصوات الجماعة اسياد المركب ديل بقولو فى كلام كده بعرفوا براهم …..!! وانا بس ماسك المصحف الأدتنى ليهو أمي وضاميهو …!! والدنيا ضلاااام وبس ماشين …!!! فجًّاة المركب دى كلها اتهزت …..!! والمكنة دى صوتا بقي عالي شديد …والبحر ده هاج…..
والناس دى بقت تكورك …يالطيف …يالطيف …!!! والجماعة المدورين المركب ديل بقو يتجاروا هنا وهناك …!! وانا خلاااص دخلتا فى حته صعبه واتذكرت ليك أمى ..!! وناس البيت ..!! واصحابى ..!! بس شغال ألطف يارب …يارب لطفك …عشان خاطر امى ياالله …!! يارب لطفك …!! والمركب دى بقت ذي القشه فى البحر …!!تمشى فوووق وتجى تحت …!! والمويه ترش فينا …!! ومابتشوف قدامك ..والناس دى بس ماسكه فى القداما ..والمالاقى حاجه يمسكا بس ماسك فى الجنبو …وأمرنا بيد الخالق …!! منظر الله لاوراهو حبيب …!! لكن الله ده ما مابنقدر نشكر فضلو …غايتو بعد مساااافه كده الأمور هدأت ..وواصلنا الرحله وبعد ساعات شفنا ليك من بعيد كده نور …أمممك اليونان ظهرت …!! الساعة ذي أربعة صباحا …المهم المركب دى وقفت كده …الجماعة قالو لينا حتنزلوا هنا فى الحته دى ..وحتجى عربيه تاخدكم ..يازول حته مافيها نفاخ النار…!! والبرد شديد ..!! قالوا عشان مايقبضونا ناس حرس الحدود …قلنا اى حته …!! مش مافى بحر ..!! طوالى نزلنا …ومن التعب الناس نامت ماصدقت لقت واطه …انا غايتو نمت طوالى فى الواطه دى …الله يمسيك بالخير ياامى ختت لى فرده كده فى شنطتي قالت اتغطى بيها ..!! ومشاعر اختى تضحك قالت ليها هو ده شنو ياامى …!! هو ماشى لي بلد الغتا ده شنو كمان …!! والله بكيت بكا لما اتغتيت بيها ..!! الظاهر قلبها كان حاسى …!! اها صحيت لقيت ليك الجماعة المعاي مكومين …والمركب مافى …!!؟؟ حسينا انو فى حاجه ماتمام ….!! لحدى ماجا زول كده سايق ليهو جمل ….!! هى ياخوانا اليونان كمان فيها جمل …!! غايتو سلم علينا كده شكلو من البدو بتاعين الصحراء ديل قال لينا …(عالسلامه ..ليلتكم زينه …شنيا أحوالكم ..قداش الوقت ليكم ..بزاف ..(أمممك …ياربى ده عصام الشوال ) قلنا ليهو دى مش اليونان …!!! والله الراجل من الضحك داير يقع من جملو ده …قال لينا …(كيفاش وصلتو برشا ..عالسلامه… أنتم فى قفصة شمال تونس …!!!!) والله ياخوانا الحاله الجاتنى اصلو مابتتكتب ولا بتتوصف …!! ( وقعنا ضحية احتيال لعصابة متخصصه فى تهريب البشر ..!!!) ده الفهمنا ليهو الراجل ده ….!!! تاااانى تونس ….طوااالى ياعلوب انت راكب التونسيه ..لا حول الله …
غايتو حنت علينا منظمة كده جو شافونا وكشفوا علينا ….ورجعونا السودان …!!! جيت داخل بيتنا الساعة اتناشر بالليل لَقِيتُم كلهم نايمين الا المشوطنه مشاعر دى صفافير الواتساب تجيب الطاشي ….!! بس شافتنى كده جدعت الموبايل …!!هىيي علووووب …!!! وحضنتني شديد التقول مالى منهم أسبوع .. ..فرحت بى شديد ….!!! حتى ماقالت لى مالك الحصل شنو …اها أمى صحت بالكركبة دى والله ياخوانا لمن شافتنى لمن دايرا تقع …!! أدتنى حضنة لو قسموها على كل العالم لشعر بالدفء …!! وبكت جنس بكا …بكا شديد خلاص …!! لكن شعرت بيهو بكا فرحة المره دى …اها والكواريك والجوطه لمن اخواتى الصغار صحو نطو فينى …!! اها وفاطمة اختى دى سامنها على حبوبتى حنينه خلاص ..بس تبكى …!! مادايرا تنزل مني تشيل وتعاين لي …حاسى بيها دايرا تطير من
من الفرحة مبسوطة شديد ..شديد ..!! وجات صفاء صغيرة البيت دى ..واحلى زول …بس تهبش فينى وتضحك …!!!حاسه انها بتحلم ..!! والله حسّيت الدنيا دى كلها بتضحك …!! وامى جابت لى بالليل داك عشا وشاي بى لبن مقنن ..ريحتو براها تدوخ …..!!! قالت لى هسه كنت حلمانه بيك ياعلوب طالع ليك فى جبل …!! أتذكرت المركب ..!! حضنتها شديييد …!!وبكيت كما لم ابكى من قبل …أحمدك ياربى الجبتنى راجع ….!!! وزول فيهم ماقال لى ليه جيت ..!! بس المهم انى جيت راجع … وشغالين فينى سلام واحضان …تانى لاكين انا بفوتكم …!!!!! ماظنيت !!! وتنقدا الرهيفة ….!! صفاء عاينت لى كدااا …!!وقالت لى …..جبتا لى معاك ….التلفون…!! حضنتها حتى نامت …!!! حاجيبو ياصفويه ….والله حاجيبو !!!
error: Content is protected !!