انا اول مالاقيتا فى الدكان عرفتو ده مايومى …المره دى ماعندها شغله بس تتفرج فى خلق الله ديل وتعلق …!! وانت النبى اليومين ديل الحاصل عليك شنو ياعلوب …!! والله لمن سويت ليك جضيمات ..مشيت الدهب ولا شنو …!!! اها ده كلام ده …!! الله لاكسبك ولاكسب يومك خلاص ..شربتنى الوليه .. !! …ياخ دى مرة شنو الشوم دى …!! اصلو ولا رديت عليها ..!! قل هو الله احد…!! قل هو الله واحد..!! واتخارجتا طوالى …!! يوم بدايتو نحس ..!! بس ركبت الحافله كده يادوب ماقعدتا … اسمع ليك واحد كده يكورك لى من جوه الحافله ..علوووب …!! لا حول ولا قوة الا بالله ده اخير محاسن بتاعة الدكان .. ..!! ده كمان اسمو (الربع البراى ) …(اسمو كده ) …!!! اتخيلو هو محشور هناك فى كورنة الحافلة ..وانا قدام …!! قال لى شنو …!!؟ مالك ياعلوب زهجان كده ولايهمك ياخ والله ياها الحاله
عامة كلنا مترمتلين ومالاقين شغله ..!! هسه فى داعى لى جنس ده ..!!! الحافلة كلها اخدت خبر انو انا عاطل ..!! بالله شوف المتخلف ده ..!! ياخ انا اشتكيت ليك ..!! ياخ مالك علينا من الصباح ده …..!!! طوالى نزلت المحطة البعديها مباشرة ومشواري لِسَّه لحدى الخرطوم …!! بس عايز اتخارج من اللغم ده ..فعلا نزلتا ..اتخيلو الزول السقيل ده حصلنى بالشباك …!! ياحليلك ياعلوب بقيت من هنا لى هنا ماقادر تمشي …!! الشحم ده ماكويس …!! الكلام ده وهو جوا الحافله وانا نازل لحقنى ليهو بالشباك …!! الشحم انشاءالله اليشوك بيهو شحدت ربى !!! انتو الناس دى جنت ولا شنو ..!! خلاص بقي مافي موضوع …نزلت والله لمن شتا لى حجر ماشايفو اصبعى داير يتقلع …!!! لا لا ده يوم ماحيعدى على خير …وفعلا مش نزلت من الحافله كده هانذا ذَا وجها لوجه امام (حريقة ..) اى والله
اسمو كده ( حريقة ) ده كمان حالة خاصة…!! طالع من بيتهم بس يتأمل ويعلق وينقل الأخبار دى وظيفتو فى الحياة …!! والله مما شفتو كده عيونى طششن ….!! طبعا طوالى جا على..!! عملت نفسى بتكلم بالتلفون …..!! والله البشوفك ماسك التلفون يقول مستشار فى زين …!! (اها دى قولة خيرو …) شنو ياعلوب ياخ ماتدينا نظره …(الله يديك قطر يخمك ) …اهلًا اهلًا ياحريقه ..بس والله مشغول ومستعجل شويه …!!! مستعجل مالك لاحق البورصة ..!! ماتقيف تدينا حنك حنكين ..!!! (اللهم طولك ياروح ) ياخ انا صاحبك …!!! وطبعا ماداير ابوظا مع حريقة دا بالذات لانو ده كان اخد موقف تانى الامم المتحدة مابتحلها….!!! بمشى من دربو ده الفينى والمافينى بتونس بيهو ..!! علوب كيف ..!! ولابس شنو …!! وبَقى سمين ولاضعيف…!! والليلة فطر بى شنو …!!! انا ناقص ياخ …المهم سلمتا عليهو كده وطوالى اتخارجت بى رجلينى لحدى المؤسسه أتذكرت كلام المره العواليق دى …!! سويت ليك جضوم وسويت ليك زفت ….!! قلت النمشى شويه…!! غايتو ناس اصلو مابتريح …!! تضعف…!!! مالك ضربك سكرى …!!؟ تسمن …!! يازول اعمل حسابك من الضغط …..!!! تحافظ على وزنك ..هو ده مالة لابزيد ولاينقص (مقرش ) ….!!! دى حالة شنو دى …!! غايتو ده اصلو الليله مايومك ياعلوب … (محاسن ..والربع ..وحريقه )….فى يوم واحد دى مصيبة شنو …!! المشكلة انو الليله عندى معاينة شغل فى شركة…!! لكن عرفتها بايظه…!! زول يلاقى العصابة دى من الصباح معقوله تمشى معاهو …..!! المهم اول حاجه وصلت متاخر شويه عن المعاينه ….!! قلنا مامشكله السودان كلو متاخر …..!!! اها اول مادخلت لقيت لى تلاته بنات مرصوصات ..!! غايتو فى واحده كده لو ماكملت الابتدائي حتتعين حتتعين …!! حلا ذاتا مبالغ فيها …!! قعدت فى الصف ده معاى ولدين تانين …!! اها جا دورى دخلت لقيت لى اتنين كده قاعدين واحد عاين لى بى قعر النضاره …!! اتفضل ياعلوب ..!! أتفضلت ..!! قال لى بتفهم شنو فى علم الادارة ….!!!؟ غايتو رصيت ليهو كلام كده من القريتو وحبة تحابيش كده …!! قال لى خبرتك التراكمية شنو فى المجال ده …..!! هسه ده أقول ليهو شنو …!! كنت مدير الكوتشينه …..!! (خلاااص يعنى من كترت الشغل البجيب ليهو خبرات )…!! قلت لي أبدا والله انا اتخرجت وعندى طموح أبدا معاكم خبرتى العمليه …!!! لكن أكيد عندى خبره معرفيه …..!!! ( كيفتنى معرفيه دى شديد ..!! طلعت كيف ماعارفا …) المهم قالوا لى خلاص امشى ولو عزناك حنتصل بيك ..!! رقمك عندنا …..!! عرفتها اتقدت ….!!! اهابعد بعد ساعة بس اتصلوا بى قالو لى
نحن متأسفين مؤهلاتك كويسه بس نحن بنبحث عن خبرات ….!! (خبرات يال DHL … !! ) من الزهج قلت ليهو انشاءالله تلقوها …!!! بالمناسبة فى بت كده كانت معانا والله (خبراتا) كويسه عارفكم بتاخدوها …!! الظاهر زهج قال لى ده ماشغلك ….!! والله ياخوانا جيت بعد يومين لقيتا قاااعده وشغاله …!! …هو يوم جاب محاسن والربع وحريقة …!! معقولا نلقى فيهو طريقة …!!! الله فى …!!!!!
error: Content is protected !!