طارق قال لى رأيك شنو ياعلوب انا معزوم عيد ميلاد بت زميلتنا فى الجامعة …ماتمشى معاى …!!؟ قلت ليهو هوي ياطارق ناس انا ذاتى مابعرفم امشى كيف ياخ ….!!! افرض قالو ده منو ..!!! والله اخد ليهو ضحكه كده لما شفقنى …..!! قال لى والله انت متفائل جنس تفاؤل…!! ياخ ديل هم ذاتم مابعرفو بعض …..!! دى بت ياعلوب يشهد الله نحن فى الجامعة كنّا قايلنها بت ام لعاب ….!!! اول حاجه عيونا ديل خدر مع كحلى على بنى كده….!!! ده اولا بالتبادى ….! الحاجه التانيه والله ياهو داك الدم بتشوفو ماشى فى عروقا ….جوووووو …..!!! الحاجه التالته لونا ده لى هسه مافى زول قادر يحددوا ناس بتقول اصفر …جماعة قالو عسلى ….واحدين قالو شفنا الشافا …!! ولى هسه ماوصلنا لى نتيجه …….!!! جاى تقول لى يقولو انت منو ..!!؟ ديل (الهارديسك ) بتاعم ذاتو مابقراك …!! انا سايقك بس تتفرج ..!! ياخ أقول ليك كلام…!! انا ذاتى ماشى اتفرج …!! هو ذاتو عزمونى بالصدفة …!! انا مشترك لى فى جمعيه كده فى الجامعة اسمها (جمعية حماية الحيوان ) …!! يشهد الله انا ذاتى ماعارف بقصدو شنو …!! بس دخلت ساكت كده لقيت ليك الجكس النضيف ده كلو مسجل هناك وسجلتا …..!! وانا الحيوان ده عندى ياكلب ..ياكديسه ياحمار …ياحصان ..!! والأربعة تاريخى معاهم مشرف …!! اول حاجه انا براى كده بكون كاتل لى ذى تلاته كلاب وسته كدايس …!! تانى مابعرف عنهم حاجه …!! المهم ساره دى معانا فى الجمعيه وعزمتنا كلنا …..!! بيتم ذي مية طابق كده والعربية ذاتا البتجيبا الجامعة لى هسه انا ماعارف ماركتا شنو..!! ولاحظ انها بتتغير من وقت للتانى …!! يشهد الله اللبسه اللابسا السواق انا كنت قايلو ده ابوها ….!!! اها ماشى ولا عايز (تترمتل ) قبلك هنا …!!! انا الوقت داك سارح مع الكلام البقول لى فيهو ده …بس بلعتا ريقى ده وقلت ليهو يازول انا جاااهز قلت نمشى هسه دى نمشى …!!! ود اللذينا !!! ماعامل مجنون…!! اها ياعلوب عليك الله أحسن لبسه عندك ..!! ماتشرط عينا …!! الساعة سته نتحرك الناس ديل بيتهم فى (المنشية ) يعنى على بال مانصل العيد ميلاد ذاتو يكون خلص ……
يازول انا من الساعة تلاته فى الحمام ..!! قلت لى مشاعر اختى ..القميص والبنطلون ديل تكويهم كما لم تكويهم من قبل…!! والجزمة دى براى قعدت فيها غسيل بره وجوه …!! واستحميت مرتين …!! وبقيت جاهز… !! اها جانى طارق
شادى ليهو عربيه كده ماعرفتها عربيه ولا فضيه حاجه كده هجين بين الرقشه والعربيه ..!! المهم انحشرنا ليك فيها ودورنا …!! طارق قال لى امانه الليله ياعلوب ماحتشوف نور …!!! يازول وصلنا ليك بعد ساعة كده …!! العربيه تدخن وتتترتح وماقادره تمشى …!! غايتو المهم وصلنا المنطقة لقينا بقالة الفوزان (شوف الاسم ذاتو ) مش (طعمية الزين ) …!!بتاع البقالة طوالى قال لينا هداك البيت المولع الظاهر ده (وهل يخفى الحجر ) الظاهر الجماعة هنا معروفين …!!! المهم وصلنا للقصر الأميرى ده ….!! بيت قدر حقنا عشره مرات …!! ولقينا ليك العربات الواقفة بره اقل واحده.. برادو …..!! وقفنا عربيتنا ورا الحيطا فى شارع مضلم ومشينا على البيت …!!! ناس الهدف ديل واقفين بره انا قايلا مستشفى …!!! عاينو لينا كدااا ذي بتاعين الجمارك …!! المهم سمحوا لينا بالدخول اول حاجه المسافة من خشم الباب لى جوه البيت أطول من الزلط لحدى بيتنا …والشجر بس ضاربينو اورنيش ..!! يسو كدى ….!! شكلو ذاتو فرحان …!! والله العظيم موية حوض السباحة انضف من اى مويه شربتها… ولونا كحلى …!!! وانوار كده ماعرفتها مركبا وين …!! المهم يازول وصلنا بالسلامه …!! فى بنات كده سلمو على طارق …!! وجات ساره ….لا اله الا الله ..!! دى شنو دى ..!! …البت دى ماأظنها شافت الشمس اقل حاجه سنتين …!! والله جد ..!! وموسيقى هاديه كده شغاله …!! وجماعه لابسين ابيض فى ابيض ذي بتاعين المسلسل لافين فينا يقسمو فى الشربات ….!! الصينيه فيها أربعة ألوان ….!! داير اشيل لى كبايه طارق غمز لى ..يعنى ماتشيل …!!! يشيلك الله ياخ العطش
كاتلنا …!! مالك علينا ..!! قمت جليتا ..نعمل شنو …!! قلت أمكن خايف تحمينا العشا …لحدى ماقال لى فى
أضانى ..انت هسه شفت ليك كبايه ناقصة …يعنى كلهم ماشالو …!! دايرم يقولو الشرفانين ديل منو ..!! المهم بلعتها و سكتا …!!! وقدمنى لى سارا دى …قال ليها ده علوب صديقنا …والله البت دى بدون خجله قالت ليهو عزوز…!!!!؟؟؟ قال ليها ..لا … علووووب …!! قالت لى اهلًا ياعزوز …تاااانى ..!! ماعرفتا المعنى شنو…!!؟ ياربى ماقادره تقول علوب ..!! ولا خايفه الاسم ده ينط فيها …ولا عايزه تدلعنى ..!!! والله ماعرفت …!!!؟؟ المهم يازول انا كأنو بحضر لى فى فيلم …!! البنات ديل لابسات ذي المجلات …!! وجو وليدات كده مجبصين بى بناطلين وفنايل والشعور دى تتلامع ….!! واتاريهم كلهم اولاد وبنات بتعارفو شديد ..يازول سلام كده وونسه…..!!! ونحن قاعدين فى الطربيزه ذي حرس الجامعة …!
بس بعد شويه كده اسمع ليك صوت كده ماعرفتو راجل ولا مره أتكلم بالانجليزى …!! وفى النهايه كده بس سمعت اسم ..ساااارا …!! والصفقه دى دورت…!! طوالى صفقنا…!!! وانا ماعارف نحن ذاتو صفقنا ليه …!! التقول الهلال جاب قون …..!! ولقينا ليك الناس دى بدت تتحرك لى مكان تانى غير ده ….!! طواااالى قطرناهم ..!! مشو بينا لى حته تانيه فيها كيكه واقفه طول العمود وملبسنها ذي العروس …!! وفى راسا شمعة …!!! وفجأة كده صوت فنان بغنى بالانجليزى دور فى السماعات …هابى بيرث دى تو يو …!!! مدورو واحد لابس ليهو سماعات قدامو كبانيه انا قايلو طيار ..!! وكلهم يغنو معاه..!! فجاة كده قلب مصرى …!! وسنه حلوه ياجميل …وارقص ياجميل فى الساحه …!! وبرضو يغنو …!! وانا ساااارح فى الناس ديل أعاين ….!!! بس فجاة الحته بقت ضلما انا قلت (أمممك ) الكهربا قطعت …!! اتاري هم القطعوها عشان يطفوا الشمعة …!! وساره قالت كدى ونفخت …اووووف .. …!!!( شمعة لاقت شمعة) وتانى ولعو الأنوار وتصفيق وصفافير …!! وتهانى ومقالده ومطايبه ….!! وكل واحده تجى مادا بوزا تاخد ليك سيلفى معاها …!! حتى الأولاد مدو بوذم …..!! ونحن قاعدين فى طربيزتنا بوزنا ده بس مفتوووح اها …!! نعاين فى جنس الحلمه دى …!! اها يازول كل واحد يدى ليك سارا دى حاجه كده فى يدها ويمشى …شى كيس صغير ..!! وشئ كرتونة مغلفه..!! وشى دبدوب …!!اتارى دى الهدايا والله انا من الخجله داير أتلب فى حوض السباحه ده لانو جينا مطلقين يدينا …!!! اها يازووول اتاريها دى المناظر بس …!! قالو ال DJ. حيبدا…!! انا قلت بسسس انا لى زمن داير اشوف ال DJ ده ذاتو هو منو وشكلو كيف …!!؟ طلع ياهو الراجل ابو سماعات بتاع الكبانيه ده …!!! وقال كده دور… What’s up …ققققققك ..!! انا داير انط من الكرسى …!! ويازول الجماعة ديل كلهم قاموا اولاد وبنات …!! والله بغنوا مع الزول ده حرف بى حرف …!!! ياحليلنا نحن الانجليزى كلو عديناهو (بريزنت كونتينيوس تينس …) …!!! وبدا ليك الرقيص العجيب …!! لا لا دى ياها السينما ذاتا …!! والتورته واقفه ذي الأسد زول هبشا مافى …!! أتذكرت ليك عيد ميلاد ود جيرانا قبل فترة وديت ود اختى الصغير قال معزوم .!! قبل الشمعه دى مايطفوها ..!! الكيكه دى كانت فى خشوم الشفع ديل ..!! وواحدين هناك يبكوا قالوا ما حصلناها وغايتو جنس بشتنه …!!
المهم تانى رجعتا للأجواء دى ..!! طوالى سارا مسكت المايك …وشكرت الناس على الحضور وقالت هى اسعد زول فى الدنيا بى حضورنا ( ياربى انا معدود مع الحضور ده …!!؟ ماظنيت….!! ) وقالت سعادتا بتكتمل انها حتعرفنا بأعز حبايب عندها (بوسى ) ..( وبونى ) انا قلت قطع شك ديل أخوها وأختا الصغار وبينى وبين نفسى قلت شنو الدلع والمسخرة الأكثر من اللازم دى يبوظو الشفع بالاسامى دى !!!! اها طلعت بوسى دى (كديستا ) وبونى ده (كلبا …) والله جابتم ليك اول حاجه الكديسه دى شدة مابيضا تقول غتست فى روب ومرقت …!! وبونى يعاين ذي الزول ….!! هيااخوانا عليكم الله هسه ده كلب وكلب ناس حاج التوم المضهب داك كلب …!! لا وكمان داك كلب لئيم ..!! بعد المغرب أبقى راجل امشى جنبو …!! وبونى حلات الدنيا على …!! والله يعاين فى الواطه دى عيونو مارفعا …جنس أدب …!!! شايلاهو سارا شيله انا لمن كنت صغير ماشالونى ليها ..!! …!!! وخجلااان من الناس الكتار ديل وبوسى فضل ليها تقول لينا نشيد ….!!! لاحولا ولاقوة الا بالله …!! بالله هسه دى بلد يقولوا فيها أزمة غاز ومافى بصل …!!
واغرب حاجه أهل سارا اصلو ماشفناهم…!! اتارى جو وقت الضلمه ديك باركو العيد واختفوا فى واحد من الطوابق دى وخلونا …!!! اتذكرتا ابو الود الوديت ليهو ود اختى عيد الميلاد…!!! يكورك لحدى الأولاد ديل ماطلعوا من البيت …!! حميتونا النوم …!! ماخلاص…!! الزفت ده انتهى …(الزفت ده عيد ميلاد ولدو ..) تكون المره اصرت يعملو عيد الميلاد وهو مجبور …..!!
اها يازول جات الساعة حداشر كده …قالوا حيكون فى بوفيه مفتوح وأوفر نايت …قلت لى طارق نحن حدنا المفتوح ده ونبقى مارقين …!! والعربيه ام دخاخين دى فيها توصلنا وفيها تقطع وننقطع بالليل ده …!! فعلا ضربنا العشا ده وأول يوم اشوف الجداد ده مهيون ومكرفس مالاقى البفكو ..!! واللحمه مدفقه عايزا البياكلا …والرز مشتت ….!! حسّيت بى غصه فى حلقى انو فى ناس الليله نايمه بدون عشا …!!
قوم ياطارق ارحكاكا ….سارا خلص عيد ميلادا …قوم ياطارق ارحكاكا …نشوف البلد وين أعيادا …!!!!؟؟؟
العمر كلو ياسارا …!! ياربى تميتى كم سنة …!!
error: Content is protected !!