انا عارفو عمك الزين ده يوم بعملا فينى …طعميتو دى مرتين لقينا فيها حجار..الا نحن ذاتنا بس ناس دنيين …كمان حلات كاتب فى المحل بالخط العريض (طعمية الزين …مش حتغمض عين !!! ). خلاااص يعنى المحل عالمى وروتانا بت خالتو … !! اها اليوم داك اكلت منو خمسه طعميات بس والله مازدهم ..!! ودونى الاخره وجيت …!! حاله …حاله صعبة…..!! شالونى شيل المستشفى ..قالو فقدت سوايل…!! هى وينا السوايل دى ذاتا عشان نفقدا …ياها الميريندا دى ..!! المهم يازول أصحابى ديل ناس معمر وإبراهيم ..تكلونى تكيل على الحوادث …!! المشكلة مافى الطعمية المشكلة كلها فى الحوادث….!!! اول حاجه استقبال ذاتو غريب عجيب..!! ياخ زول جاى ماقادر يتكلم ولا يقيف مش بالله اقل حاجه يرقدوه كده وبسرعة يشوفوا الحاصل شنو …..!!! ؟؟ والله ياخوانا وماطالبنى حليفة لقيت لى لى وليييد كده وبنيه قاعدين قالوا ديل أطباء الحوادث …!!! اول حاجه البت دى ذاتا مارفعت عينا عاينت لى …..!! تكابس فى الموبايل بتاعا الظاهر متابعه ( ذَا فويس ) ….!! والولد ده غايتو حنا على شويه كده سألنى التقول انا جاى أتصور …!! مالك فى شنو …!!؟ وانا ذاتى ماقادر أتكلم …رد معمر …..والله بس استفراغ كده ووجع بطن شديد …!! اها الود والله التقول بحل فى الكلمات المتقاطعة …يرد بعد مساااافه…. وانا خلاص حاسى أنى عايز اموت …..!! ومن متين الكلام ده …!!!؟ ( داير يستفسر الود ) معمر قال ليهو والله قبل ساعة كده ……!! بس ماصدق …..!!؟ وقبل ساعة كنتو وين اصلو …!!؟ بى نهره كده …!! انا قلت خلاص البركه فى الاهتمام ده …! يعنى المعنى جينا متأخرين ..!! (اكلنا النهره دى فى حنانا) …!!! مش طوالى مفروض يحصل الحاله الجات متاخره دى …!!؟ والله ياخوانا قبل على دكتورة الهنا دى …..وبكل هدوء قال ليها والله منتصر بالغ قلت ليهو ياخ تعال سد لى الوردية دى عندى مشوار لحدى هسه ماجا …!!! اها والكونتيسه دى لِسَّه مركزا مع الموبايل ….!! قالت ليه وانت منتصر اول يوم تعرفوا …!! يكون لقى ليهو برنامج وعمل رايح …وباعك …!! مع ضحكه خفيفه كده بين الطرفين …..!!! هيا اخوانا ده كلام شنو ده …!! انا الطعمية دايره تكتلنى …!! أبقى فى منتصر جا ..ومنتصر ماجا …منتصر يطير انشاءالله …!!!اها ابراهيم صاحبى ده زول هادئ كده ..! لكن وقت شاف القصة دى يازول انفعل وكورك ليك فى المجلس الطبى ده …!! قال ليهم ياجماعة كدى خلّوونا من قصة منتصر دى وشوفو لينا زولنا ده …!!!؟ وياريتو لو ماقال …!! بس كأنو منتظرنو يقول ….!! اها ست الموبايل دى الظاهر زولا فى (ذَا فويس ) طلع من المنافسه وروحا محرقاها من القعدة هنا
والليلة السبت ..!! وقالت كده شبت فينا …هىيي هىيي هييي …اول حاجه انتو العيانين …..!!؟؟. معمر قال ليها لا..
وإبراهيم بحدر بس ..!! خلاص ..خلاص …اطلعو لينا بره لو ممكن…! ايه الفوضى دى ….!! بس ابراهيم قام ليك عليها …! فوضى….!! والله الفوضى ياها البتعملو فيها انتو دى …!! الزول ده عيان ونحن لينا نص ساعة هنا …!! حالتو ذاتا ماشفتوها..!! يموت يعنى حتى تتحركو ولا شنو …!! اها الدكتور ذاتو قلب مع ذَا فويس …نعم…!! نعم… نعم ….!! طيب ماكان تعالجو براكم وقتين نحن مالينا داعى …..!!! لو سمحتو خلو لينا المريض بس ….! اها ابراهيم حلف مايطلع قال ليهم هو نحن معاهو ماشتغلتو بيه والله نطلع الا نلقاه مات …..!! اتخيلو بكل برود البت المشوطنه دى قالت ليهو خلاص عالجو انتو …..!! وانا خلااااص بقيت اشوف ظلال ..!! اشرت لى الجماعة ديل يطلعوا بره ….!! عايزين نتعالج ياخ ..اها غايتو طلعتهم كده بالغصب …واستلمونى المعلمين ديل ….!! البت اصلها ماقربت منى تكون (قرفانه) ….!! وداك يسأل فينى.. اكلت شنو انت ….!!؟ قلت ليهو ما اكلت حاجه اكلت لى حتة طعميه …..!! طوالى قال لى طبعا من بره ….. (مالا خلقتى دى مابتاكل من جوه ولا شنو ..!!؟) المهم انا عايز اتخارج من هنا…!! وبطنى عايزه تتقدا …!! قلت ليهو بره جوه ياخ انا اكلت طعميه …!! داير تعالجنى ولا أقوم امشى ….!! ولا ردا على …قال لى امشى جيب الأدوية دي …..!! أمشى !!؟؟؟؟ هو انا كان قادر امشى كنت قاعد أعاين ليك كده ..!! حسه بى سؤالو بايخ …! قال لى طيب وين العصابة الجو معاك ديل. ( بقاهم عصابه ..!!)….( والله العصابة الا انتو ديل) …. المهم ناس معمر وابوخليل واقفين بره… لكن ملصقين فى الباب ..(حبايبى ديل ياخ ..). طوالى معمر جا …. ..اها ادوهو ورقه طويله عريضه فيها كل حاجه من الابرة الى السيارة …..!!! (ماعندهم التكتح …) اها مشو جابو الحاجات بعد نص ساعة….. لافين من صيدلية لى صيدلية ..! ديك مافى …وديك مقفله …!!! وغايتو حاله تحنن …!! فى الفترة دي تانى زولك وَذَا فويس دورو الونسه …وانا طبعا مع مرضى ده لكن قرون الاستشعار والشمار شغاله …!! أسمعهم ليك …والله ياهنادى .. (ده اسم الدكتورة وعاشت الاسامى ..) الواحد المستشفى دى كره يوما ذاتو …!! وردت الأميرة …هانت كلها شهور ونكمل الامتياز ده ونبقى مارقين دى مابلد يقعدو فيها …..!!! أمممممك ….!! امتياز …!! يعنى دى لو كانت اخصائيه كان طردتنى انا ذاتى ….!!! وده كلو ولا فى سماعة وصلتنى..!! ولايد هبشتنى… غايتو الود ده فتح لى عيونى دى عاين فيها سمممح ذي الرايحه ليهو حاجه وخلاص…!!
…!! المهم ناس ابراهيم جابو الكيس ملان دربات وحقن وحبوب …زولك ده ولا عاين ليهم مدا ايدو شالم من جنب الباب التقول جايبين (عشا دليفرى ..). وقال لى للممرض اديهو الدرب ده وحقنه كده …..!! واستأذن من دكتورة الهنا قال ليها منتصر شرف سعادتو قال فى الباب …ولا داير اقابل وشو ده …اوكى جااااو …!! وهى قالت ليهو جاااو …صدقو ..!! وانا فى النص أسو … نااااو …(كديسه فى شوال ) …!!! وهى عاينت لى كده بى حميره التقول عندى معاها تار ….!!! هو كمان انا صحى مافوتها ذَا فويس بدل تستمع بى الحلقة ….( وشو بحبك انا وشو هيدى الأسية …تقعد لي علوب متسمم بالطعميه …!! ). المهم غايتو ربنا ده بس من فوق قدر ولطف وجات خفيفه …!! والناس ديل الله لاوداكم ليهم ولا ودى حبيب …!!اها كملت الدرب بتاعى ده ..وقربت اشرب التانى ..!! ما بى قروشنا…..!! وبقينا مارقين …!! معمر يتحسر..!! وإبراهيم يسب ويلعن …!! وانا محوص فى النص من التعب …!!! تانى الطعمية لو لاقتنى فى الدرب ..بلف صينيه ……!! وانت ياهنادى انشاءالله بي البوره البنادو ليها المنادى …!! ياربى منتصر يكون جا ….تجى ولا نجى …!!!
error: Content is protected !!