قصيدة “اوعى تتابع الفارغات بقل معناك”
اوعى تتابع الفارغات بقل معناك
وابعد من كترة القول بيعلا سماك
ديمه اتجاهل الجابلك حديث بكاك
عشان ناقل الكلام حتمآ بكون (سباك)
ماتلوك العروض بي خلقو ماتتسلا
واوعاك شان غرض لعبادو ماتتزله
ماتباري الصحاب التاهو من درب الله
واوجز في الحديث خير الكلام ماقل
ماتقول الكلام الشين وتتبناهو
القول إن مرق مابتستطيع تمحاهو
انصت وشوف حديث الدايرو والتاباهو
والزول إن رحل بس ذكرتو التحياهو
ماتغتاب اخوك اوعاك تظهر عيبو
للمحتاج اعين خليهو جيبك جيبو
الزول الكبير ديمه احترم لي شيبو
والياباك براهو انساهو واختى دريبو
اتحاشى البقول اديت وبدي واسوي
فارق للبكون بالشينه بس متقوووي
اختاهو الدوام في سيرو جت متلوي
وابراهو البناصحك وليك ديمه يضوي
سرك اوعى تديهو البدور يازيك
ولاتعطل حياتك بي فشل ماضيك
ماتخش فوق كلام إن شفتو مابيعنيك
قد تسمع ردود لا تسر ولا بترضيك
اوعاك يارفيق تبرى العبوس تتغره
واحمد ربك إن جاب ليك خبرآ سره
زولك اوعى تنكرو ليو تسيب بالمره
معروف الضفر من لحمو مابتبرا
خليك ديمه بالأخلاق مأسس ساسك
وارضابو البقسمو المولى ليك فوق راسك
انساهو العتاب خلي السماح نبراسك
اللوم الكتييير باكر بنقص ناااسك
تابع للشرع دايمآ تعيش متهني
وبر بالوالدين في الطاعه عقب وتني
زي ماتبر ببروك يوم تمش متحني
قدم للسبت تلقى الأحد مستني
جافي العنصريه وبيها ماتعتزه
ماتنقاد وتبقى الإمعه البتلزه
خاويهو الكريم إن وضعو مال وإهتزه
ماعون الدهن قط مابتفارقو النزه
خلي الروح نقيييه وفي السماح متفانيه
هدم كل خصله مشينه إن فيك بااااانيه
انساهو الخصام وامحى الزعل في ثانيه
مادام نحن في دنيا بتعدي وفااااانيه