معقوله ياعلوب حدك القاهره دى عمرك كلو …طوالى كده لندن ….!!! الله ده ماكريم علينا ….!!! القصة انو انا كنت مشترك فى جمعية الرفق بالحيوان ايام الجامعة وعادى كنتا اي كلب يلاقينى بنهزو بى طوبه …!! بتصدقو بس كده قالو اختارتنا السفارة نمشى لندن تقديرا قالو لدورنا فى الجمعية (والله صحى الحيوانات وفيه …) … .الحاجه يازول كلمت ليك الحله كلها ….!!! المهم وصلنا لندن …!! انا قلتا بس اهم شئ اشوف الآرسنال بى عينى دى …!! المهم طبعا بهرتنا عاصمة الضباب بلد الخواجات
لكن يشهد الله خواجه واحد لاقانى مافى ….!!! سألتا الجماعه انتو ناس (هكس ) باشا وأحفادو ديل وين …!!! قالو خلوها لندن لينا مشو الريف الانجليزى ….الغريبه نحنا الريف ده خلينا زمااان جينا (الخرتوم ) ….(حكمه لا يعلما الا الله ….) معناها دى بلد عمرانه عمار اصلو مامعقول …(الريف من المدينة ماتفرزو …!!! ) اهاالشارع بس كاس العالم اى جنسيه دايرا بتلقاها ذي طابور الاولمبياد داك يوم الافتتاح …اها بس ظهر ليك العلم السودانى والله فرحتا فرح …من جوه قلبى …ذات الوجوه ونفس الوقفه الفى الشارع ديك ونفس الطيبه والملامح البطمن ….!! لكن هناك شئ ماخلف العيون …!!! لا ادرى أهو الحنين للوطن ..!!! أم الخوف من الزمن ….فى مدينة كالطاحونه لاترحم وتلتهم الوقت التهاما ….(ربى يحفظكم .) ..والبنات زمنن ده كلو يغنن …..حبيبي تعال تعال ياذوق … نسكن لندن عمارات فوق …..اها عماره واحده مافى ….!! (بيوت بس الا النصيحه سمحات … ) والكهربا اخر مره قطعت ١٨٩٠ ….اها بدينا الجوله بعد البرنامج الرسمى قالو لي نوديك (ايجورد روود ) (شارع العرب) عرفتو من الشيشه ومحلات الموبايلات ..الدخاخين دى فى السما …..ذات الرصه والمرضه …!! والثنائي العربى الأشهر …(كلام ومزاج )… وأكل …!! أكل ..!! عضه جد … سته وسبعين مطعم مرصوصات والانجليز كمان الديمقراطية الكاتلاهم خالنهم يكتبو بالعربى عشان ياكلو زياده مايعملو ليهم ازعاج …..اها انا قايل نفسى فى بيروت اشيل واقرا فى اللافتات …الكبة المقليه …التبولة الشاميه …المشاوى العراقيه …(فضل داعش تفتح ليها فرع …)
اها بالليل مشينا لى عرس سودانيين شهيدى الله قايل نفسى فى صالة المعلم ….هيا اخوانا اتارى السودان ده كلووو هنا …!!! يازووول ..التياب تتطاقش ولمه جد وكمان في شوية حنين كده زايد للسودان…( فرق التوقيت اظنو …..) اها مكترين المحلبية شويه …!! جنس زغاريد هى ….!!! غايتو الخواجات كان حاضرين بقولو الناس ديل مالم
لكن كمان مع صوت الإسعافات فى الشوارع القصة طلعت عاديه يازول كل دقيقتين وووووويو اسعاف وووويو ..نجده …!! انا قلتا ليهم فى مظاهرات ولا شنو …!!! قالو ده العادى بتاعنا …..حاجه تخوف …!!! طواااااالي وووووويو دى حاجه عجيبة ….
اها وشفعن يتجارو فى الحفله ذي شفع المغتربين لما يلقو مساحه للباصات البينيه ….!!! بس طبعا دى النسخة
الانجليزية …( توم اند جيرى ) اها ديل خواجات (بالاكسنت ) والميلاد غايتو اهلم مجتهدين معاهم …
المدرسة العربية والتربية الاسلامية يوم الأحد …والنافع الله…. لكن بينى وبينكم ديل ماظنيتم بجو صادين …..زول ولدو فى لندن دى …!!! الجابرو على السخانه دى شنو …!!! الإنجليز ذاتم عارفين الرصة دى عشان كده كان فى زول ساكت زعلم …..اهل الشافع ده الا يشوفو ليهم بلد تانى ….!!! قلتا لى واحد من الشفع ديل اسمك منو ياشاطر قال لى ..(اكسكيوز مى …!!! ) (ماعرفتو الا من شعرو أب اضنين …) خلى يجى يقولا هنا عشان يفهم حاجه …!!! اتذكرتا (الكجم ) شافع جيرانا كل مايلاقينى يكورك …علوب ملاح الروب….!! ويقوم جارى …والله ضحكتا براى ….ياحليلك يالكجم ….!! بالمناسبه الكجم ده لقبو…ياربى ده لما يكبر يقولو ليهو شنو …!!!؟؟ السحار …!!!! بس بتصدقو ضحكتو كانت احلى ….
اها ماكلمتكم مشيت سوق اسمو (شبردبوش ) يشهد الله ياهو ذااتو سعد قشره بتاعنا …!! بس الجواز انجليزى يازول لقيت ليك جماعتى ذاتم الهنا …. (انا اخوك افاطنه .) …اها ديل كمان لندن ذااااتا مافاضين ليها ولا سائلين فيها …. والله الساعه القالو لى حررررم أكان تتغدى معانا
انا اتخلعتا…!! وقلتا ليهم انتو بى جاى …!! ماقالو التاشيرة دى لى هنا صعبه…!!! قالو لى ….ااازول ها ات الله ده وقت يقولها كونى فى زولا تانى بمسكا ……!! هم زمان جونا بى تأشيرة …!!!! والله نخش اى محل ….(ونعم بالله …) ديل قضيت معاهم يومى تب ….!!! جماعة السنتر شكلهم مشغولييين وفى واحدين فى النص لا مشغولين ولاحاجه الا متصبرين ساكت …
المهم يازول لندن كمان ماياها لندن ……الخضرة والماء والوجه الحسن ….
نسوان الإنجليز ذي الحصين ينططن فى الشارع ….واثقااات من روحن …!! اتارى القانون هنا بديهن اى حاجه يعنى قصة الراجل يهدد المره بالطلاق ده كان زمان ….!! على القسم هى البتطلق ..!! ويطردو ليك من البيت ذي الحرامى …!! يسلمو ليها فى يدها…. ويشوف الأولاد كل أسبوعين…!! ويوم الأحد …!!! والماهيه بشوف نصها ….!!! (مافى اى شخشخه …) وانا أقول ديل مالن ماليات يدهن كده …!!! اتاااارى ….!!!! ده الحاصل والله …
اها بالليل مشيت لى ندوه كده عجاجا فوق ….!! كل المعارضه هناك… يشهد الله ماخلو للحكومة دى صفحة لما قعدتا أتلفت ….!!! كمان البلد أمان زول بسألم مافى …ولا النظام العام ولا النظام الخاص تقول الدايرو وتبقى مارق….
لكن غايتو السودان ده سرو باتع تتخيلو لاقيت لى ناس ليهم عشرين سنه من البلد لكن متابعين جدول القطع للكهربا ذي الماحصلت حاجه …واسعار الاراضي …والواتس نقل حى ومباشر ….والعندو بيت ببنى فى ….!! قلتا ليهم انتو البيت ده ماشين عليهو متين …!!! بسكتو ساااكت …الظاهر مافى اجابه كده جاهزه ..!!! لكن بس المهم فى بيت …!! وفى السودان …!! وفى أمل رجعه …!! واى حاجه … !!! عفيت منكم كراع بره وكراع جوه ….(تجو بالسلامة انشاءالله)
اها وقفنا منتظرين البص الأحمر العظيم كل حاجه بالثانيه …قالو لى بصنا بجى عشره ودقيقتين قلتا ليهم مايخلوها عشره وخمسه لزوما شنو الدقيقتين….!!! اكتشفتا انو عشره وخمسه فى واحد تانى ….(ياحليلك يالوالى بصك ذاتو مابجى)
اها دى المناظر بس ولسه قاعدين بث مباشر من عاصمة الضباب …وأحكى ليكم قصتى مع ليزا …!!بتصدقو اشتقتا للسودان وناس امى وفاطمه ومشاعر …..عليكم الله تاوقوهم مره مره البنات ديل براهن …!!!
error: Content is protected !!