معقوله لكن ..!! تاني نقعد نفرح بالكهربا قطعت ..!!! والكهربا جات ..!! والنيل نزل …والنيل طلع ….!! ماياهو واحد من اتنين يالدولار ولا النيل اختارو لينا واحد …!!عشان نقدر نركز …!!المره دي قالو نازل …اها السنة الفاتت قلنا ليهم في شنو …!! ؟؟ قالو الفيضان …!! غايتو النيل مسكين تعبان معاكم تعب ..!! اي شي رامنو فيهو …!! (يكون ميت من الضحك) ….!!! المهم غايتو المغسه الكبيرة بتاعة (ابتهاج ) بت جيرانا …حارسا عرسا ده ليها تلاته وتلتين سنة ..!! ويومو الجا …!!! الكهربا مشت ،…!!! (منوره يابهجة ) ….
اتخمخمنا من المغرب ..!!وسقتا ليك ناس البيت كلهم (فطوم ) حلاااتا قاشره كمان الليله …!! راجيه عرس (ابتهاج ) ده ليها شهر ….!! وعبير اختي طبعا حاسه انها كبرت شويه داخله ومارقه مع البنات الكبار والحجاب والقيافه …!! اها مشاعر ريحة (السشوار ) تقول ياغربتي تعوج في خشما حاسا بي عظمه ..!! ليها يومين مع العروس …!! والبيت كلو مع عرس ( ابتهاج ) …والحاجه شخصيا بالتوب الجديد ….!!! والعروس طبعا غاتسه في الكوفير من الصباح في انتظار هذه اللحظة التاريخية …!! المهم كل الحلة في الصاله…!! المدرجات مليانه فل …!!!اها ذي الساعة عشره وعشره كده عربية العرسان جات تكورك ذي المطافي تيت تيت تيت ..!! وباب الصاله اتملا لي حلقو …!!! وموبايلي وموبايلك …!! تصوير شديد (انتو الصور دي بودوها وين ) وفي ناس يصورو ساااكت لو قلتا ليهو انتو العرسان ديل اسمهم منو مابكونو عارفين ….!!! اها وناس مشاعر يعجبوك…!! قاطرات العروس في ضهرا …!! وكل واحده متخيله منظرا وهي في يوم ذي ده …!!!وفي واحدات كده بدون سبب بصلحو فستان الزفاف يعني المعني انا صاحبتا (الانتيم ) …!! يازول ( وابتهاج ) حاسه بي عظمه ..وجنس نفشه هي ..!! بس الملكة (حتشبسوت ) والعريس يقشو لي في العرق مع الجبيصة والبدله والحر ..!! وأبشر ياعريس والزغاريد واللمه والخلق ….!! ومشغلين جوه فرحانه بيك انا ياجناي..!! لي دخلة العرسان ….ووسط كل هذه الأجواء السعيدة …!!! تقومي انت يالكهربا تقطعي …لااا حولا …ولا قوة الا بالله …
ده كلام ده ياخوانا ….يازوول والدنيا جاطت واتلخبطت …والواطه ضلمت …!! والنَّاس أحبطت …!! وابتهاج تكون كرهت يوما …(وقد حرمت من منصة التتويج …) وهمهمه… وكواريك …ووين (الجنريتر )…ماقلتو عندكم (جنريتر ) وناس الصاله ماخدين قروش زيادة ….( بدل مولدات ) طلعو ذي ناس الكهربا …ماخدين زياده (وجنريتر ) واااحد مافي …..!! وتفتيش علي مدير الصالة ..!! وتلفونو مغلق …وجوطه مابتتوصف …(فجاة الجنريتر بقي اهم من العريس ) والدقائق تمضي عجلي …والساعة حداشر قربت ….لا كهربا لا جنريتر … وباقي من الزمن خمسه دقايق لا الكهربا جات لا الجنريتر وصل وانتهي الزمن ….!!!
هسه بس ياناس الكهربا …العريس ده كان قال دي شنو (المره ) دي البدت بي قطعة كهربا دي ..!!؟ (اكيد حتنتهي بي زلزال …) تكونو قطعتوالكهربا وقطعتو الرزق ..
معليش (ياابتهاج ) والله مامنك …!! نعوضك ليها صبحية ..والرد بالسد …!! (سد شنو كمان إنتا ياعلوب …) شابكننا السد السد …!! ااها سديتو نفس العرسان وسديتو نفسنا ذاتو …
ياحليلك (ياابتهاج ) اسمك خذلك الليله …ووريتينا الطفا النور منو …العاقبة عندكم في ( الجمرات ) ان شاءالله في (الحرم ) ما (الخبيثة )…منوره يابهجه …الف مبروك …
error: Content is protected !!