“يوميات علوب” (42) … خطوبة (مشاعر)

 مشاعر قالت للحاجه فى ولد جاى يخطبا …!!! يعنى البت خجلانه وكلمت أمها …وامها تكلمني ….!! قلتا للوالده منو هو ..!!؟ وشغال وين !!؟؟ واهلو منو …قالت لى هيي هيي قول بِسْم الله…!! قالت كان معاها فى الجامعه… وقال دايرا …قلتا ليها كان معاها فى الجامعه ده معناها اتخرج السنة الفاتت…!! اشتغل متين وقام للعرس …!! الحاجه قالت لى انت دايما تسبق الحوادث …يعنى الولد كان ماعارف نفسو جاهز … بجى يخطب …!! قلتا ليها وهى رايا شنو ..!! قالت لى ياعلوب هى كلمتنى قالت الود جاى يعنى حيكون رايا شنو ..!!! ( صحى كمان انت ياعلوب مرات جنس بلاده عليك ) لكن قصة قرا معاها دى ماريحتنى… !!! نحن لينا (تمنيه ) سنين مما تخرجنا العرس ده الا نحضرو فى صاله ….!!! قلتا ليها اها والجاى منو !!؟ يعنى اهلو !! ولا هو براهو… ولا القصة شنو..!! قالت لى لا ..!! جاى هو برااهو … !!! ذي تعارف يعنى …وبعد داك بجيب اهلو …
قلتا ليها جدا خلى يجى النشوف اخرو ..!!! المهم يوم الخميس حوالى سته ونص كده زولك جانا داخل …!! اول حاجه الشعر محلوق بالجنبات ذي الطيره….!!! والتى شيرت وبنطلون الجينز مشروط فى الركبه ( اممممك ) …وصغيييير شكلو …!! هيا اخوانا ده شنو …. اها ومعلق ليهو حجاب فى رقبتو (جدعه كده ) ( بسحروك لكن ) … والموبايل والسماعات معلقا فى الاضنين …والشعر المبرم ملان زيت ….
اها لاقانى …انتو قايلين السلام كيف …!!؟ علوب مش كده (ههههههه) صدق عرفتك من غير ماتتكلم (هههههههه) حريف لقيتينى صح…..!! (هههههههه ) حنين ياخ شكلك كده (ههههههه )ورفع لى يدو الحركه ديك بتاعة (give me five .).والله ياخوانا بهذا ماحصل … !!! انا ذاتى اتخلعتا …..!! والله صحى برنامج تكوسو وبرنامج يكوسك ..!!! اهلًا اخوي اتفضل ….طوالى قعد وأم فريحانا ماسكا
اهلًا اهلًا ما تعرفنا .،،.!!؟؟ ..عندو نضاره كدا غمزا زياده فى عيونو لزوم الإجابه ويرمش … !!! مهند …!! مهند الناير ..(هههههههه ) (بس انا كان عرفتا الزول ده البضحكو شنو ..!!؟؟ ) اهلًا يامهند اتشرفنا ..!!! أيوه انا مشاعر كلمتنى عنك قالت انك كنت معاهم فى الجامعه ….(ههههههههه) ضحكه تانيه …ولا أزال …!!! لاتزال .!!!!؟؟؟ ..كيف يعنى …!!!؟؟ قصه طويله دى ياعلوب ..أصلا عندى ماده كده مسقطني فيها واحد (موهوم) كده اسمو دكتور صادق …!! مشاعر حتكلمك …!!! (حتكلمك دى شنو كمان ) .!!!! لا ياخى….!! (الود ده يكون عقد على البت دى) …. اها وواصل القصه …زول كده حنكو بيش ..!!؟ قال شنو ..!!! انا ماقاعد احضر محاضراتو ….(ههههههههه) ياريت بس انتا لو شفتا منظرو ..!! حاجه كده مامامفهومه …قميص وبنطلون وااا حد قادينا بينا السنه كلها …..ومممل بشكل ….!! ده انا لو حضرتا محاضراتو دى كان جانى اكتئاب (هههههههه) ….( تبرى انت من الاكتئاب) ….اها وقام سقطك ..!!؟؟ قال لى إتخيل ..!!! لكن مافى مشكله قالو حيلقو ليها حل …!! قلتا ليهو يعنى المعنى انك لِسَّه مااتخرجتا …!!! قال لا ياخ ماتقول كده انا اتخرجتا بس بدونه شهادتى ….لما نحل الموضوع ده ….!!! ايوااا كويس (مشاعر جايبا لى ملحق فى البيت ) …قمتا مشيت اجيب ليهو حاجه يشربا …(الزول ده اظنو شارب بنقو يضاحك كده …) اها جيت شايل الشاى ألقى ليك العيون مغمته…!! والسماعات فى الاضنين..!! وزولك منسجم ليهو مع أغنية داير يغرق …!!والرقبة تتهوزز..!! والله ضحكتا براى …(الله يسعدك يامشاعر الليله جبت لينا مايكل جاكسون شخصيا فى البيت …) اها شافنى قلع السماعات …قلتا ليهو شايفك منسجم قال لى كيف ياخ ده (توباك ) اعظم (رابر) فى التاريخ …ياأخوانا الزول ده بقول فى شنو… (توباك ) ده شنو كمان.. سجاير (اون لاين ) ولاشنو …(ورابر) ده منو ذاتو …!! قال لى ماتقولى لى مابتسمع..( راب )….!!! ايواااا ..يادوب وقع لى (غنا الراب) …(الرابه يايابا فى خشمك ). .قلتا ليه كيف ياخ والله راب … ودوبيت ..وكلو …..هو قايل ( دوبيت ) ده فنان قال لى ( دبيت) ده منو ماعرفتو …قلتا ليهو ود عمو لى (توباك ) قال لى لا ما أظن (توباك )؟ ده انا بعرف جدو ذاتو ..هههههههههه ( تانى رجع يضحك )…… يمرقنا الله الليله…!!!
المهم شفط الشاى …ودخل فى الموضوع …طبعا ياعلوب انا جاييكم أتعرف عليكم لانو( ذي ) فى فكره كده انى أتقدم لى مشاعر بتكم …(والله أعجبتا بى شجاعتو ) …قلتا ليهو جميل و (ذي) دى شنو يعنى ….!!!؟؟ قال لى لا يعنى تعارف كده …لانو ذى ما انت عارف ( تانى ذى) الحاج والحاجه مافى … ( انا اتأثرتا كده مايكونو ماتو …) قال لى لأنهم قاعدين بره السودان …شهر عسل وكدا …وهههههههااااى المره دى الضحكه معاها غميت عيون وبى صوت اعلى …وانا لاول مره اعرف يعنى شنو الزول تجيهو حالة انبهاط بس انا الان (منبهط) …!! ايواااا …اها وانت قاعد مع منو…؟؟؟ قال لى مع خالتى ….(ماشاء الله ..نحل وكمان داير تعرس ) …بس قلتا كده استعدلتا ليهو…. قلتا ليهو هسه انت يامهند ماشايف انو انتا لِسَّه مابقيت لى قصة العرس دى…. الزواج ده ياخ مامسؤوليه …يعنى انتا هسه ما اتخرجتا ولسه شهادتك مااستلمتها… وما اشتغلتا …وماعارف انتا ذاتك ماشى على وين …!! فماشايف إنّو
قصة العرس دى بدرى عليها …!! انا مابتكلم عن شخصيتك (المهببه طبعا) (بس ماحبيت اجرحو .) .قال لى ياعلوب لا أبدا انا قلت نعمل خطوبه وكده ….!! ولى قدام ملحوق…..!! بعدين نحنا عندنا بيت فى (المعموره ) عندى فيهو شقه …(قلتا ليهو كمان داير تنحل بى اختى ..) اها وبعد الشقه…!! العرس ده ما مصاريف ومسؤوليه يعنى لازم تكون شغال وكده ولا ابوك هو الحيصرف …!! شكلو أتفاجأ بالسؤال …لكن كسرو بى ضحكة تانى ….قال لى ياخ .. لى قدام بتتحلا …والدنيا ايزى ياعزيزي …..(الزول ده قطع شك ملحوس )
قلتا ليهو فعلا الدنيا ايزى ياعزيزي …وزين عالم جميل …!!! واى حاجه ….لكن انا شايف انك لازم فى البدايه تكون نفسك وتكون زول مستقل بعد داك العرس ملحوق ..!!! والله كأنو عايز يشترى طماطم قال لى كدى قول خير
بعدين مشاعر متفهمه …قلتا ليهو بالله هى متفهمه (الليله انتى اصبرى لى بس يامشاعر بقيتى تتفهمي كمان )
ايواااا ومتفاهمين على شنو ..!!؟؟ قال لى قالت لي انا بصبر معاك يامهند على الحلوه والمره …قلتا ليهو المره عرفناها ياها دى …الحلوه دى متين .!!! تانى ضحك ههههههههه(انا بس كان عرفتا سر الضحيك ده ) قلتا ليهو شوف يامهند مع احترامى طبعا الكامل ليك ولى اهلك دحين يااخوى العرس ده عايز استعداد خاص فاتنا ماتستعجل والحياة دى لِسَّه قدامك شوف فيها الحاصل شنو وبعد داك فكر فى المواضيع دى …صدقو قال لى ( زبط ) ….!!! والله انا داير اتفنقل من الضحك ….!!ياخ ده اجمل عريس يلاقينى …وقال لى ..اها يامان أقوم اتفكفك انا …(فكفيك اكتر من ده )

قلتا ليهو تمام …لقط عدتو وسماعاتو وقال لى يالله يافرده ( انا طلعتا!فرده ) قدمتو للباب ….!!! وجيت داخل لقيت مشاعر وامى واقفات …الحاجه قالت لي خير …ومشاعر واقفه ذي بنات المسلسلات البجيهم عريس …قلتا ليها خييييير …!! خلاص حددنا العرس خلاص عيد الضحيه ٢٠٢٦ ….!!! ده شنو يامشاعر جايبا لى (توباكو) فى البيت …صدقو دايره تدافع كمان قالت لى هو اصلو كده (مهترش ) حبه لكن صدق الود ده ممتاز خلاص …وطيب وفى حالو …قلتا ليها هو من ناحية فى حالو فعلا فى حالو …بس كلمى يخلينا فى حالنا …!!! بتصدقو مشاعر ضحكت …الظاهر الناس دى بس دايرا حكاية جانى عريس دى ….!! تمت ولا ماتما دى مامشكله …القحه ولا صمة الخشم …مبروك يامشاعر قولى واحد …..!!!