قلتا بسسس ياها دى مافى غيرا …صدقو البت دى أصلا لاكنتا بعرفا ولاحاجه …القدر ده بس رمانى فيها….. مشيت لى محل بتاع موبايلات تلفونى ده بقى بقطع براهو اثناء المكالمات… قلتا النمشى نشوفو مالو ….
( اظنو من الكضب الكتير ) تكون نايم فى سريرك يتصلو عليك .. اها وين …تقول ليهم ..قررربتا ..خلاص طالعين على الكبرى ….!! وواحدين تتصل عليهم وصوت (الجكس )ده عايز يقد اضانك …يتكلم معاك برااحه كده …فى المسجد ..فى المسجد …برجع ليك بعد شوية !!! .تقبل الله ….المهم ياخ خلونا فى البنية اللاقيتا دى …بصرااحه
قلبي انشرح ..!! ودمعى انسكب ….!!! مبااالغه …!! ملاله بس …نار حمرا ….حكمة ربنا بس غسلت وشها ده وجات .. كحل مافى ….!! (من المصنع للمستهلك .) … …!! قالت لي بتاع المحل ..عايزه موبايل بى شريحتين ….!!! انا نطيت طوالى قلتا للراجل خليهم تلاته مره واحده… انا واحده وهى اتنين …..هههههه…( معاها ضحكه …) اها لقيت نفسى بضحك براى …..!!! والله لمن خجلتا من روحى …انا قلتا اعمل لى جو …وحركة كده …!! صدقو قالت لى …ظريف (مع لوية الخشم ديك والضحكة الخشبية … ) وأدتنى نظره ندمتنى على الرشاقة دى …وطوالى طلعت ..!! اها انا هنا بالجد زعلتا من نفسى قمتا حصلتها بره …قلتا ليها ياخ والله انا اسف جدا …ومابقصد اى حاجه ..وياخ امسحيها لى فى وشى ده لو فهمتينى غلط …..!! وهسه انا بقيت سبب فى انك خليتى حتى موضوعك الجايه ليهو …..!! يازول وقت شافتنى كده لما حنت على ….!! قالت لى بس انا جنى وجن حركات الأولاد دى وبضايق منها شديد…!! قلتا ليها عليك الله هسه انا شايفانى ذى الأولاد ديل …!! ابتسمت كده قالت لى مالك فى راسك ريشه …!!! بامااااانه ياخوانا البت دى مش كسرت فينى ضلعه والأمه مجتمعه ……ياخ انا بس حسّيت كده انو البت دى ياها زولتى ذاااتا البفتش ليها….. !! اول حاجه طلعت من المحل لمجرد تعليقى ده وبى كده نكون قفلنا صفحة الأدب والتربية …..!! الحاجة التانيه الصوت …ااااااخ انا من الصوت ….البت دى قطع شك بالعا ليها كمنجه ….!! ولا الابتسامه والعيون الساحرة يوم ينزل غماما …آمنت بالله ….!! المهم قلتا ليها أسمعى يابت الناس انا والله بالجد كده زول محترم ومن أسرة وداير أتعرف عليك ….ولى خيير ….!!! (انا قلتا نوع الكلام ده بخليها ذاتا ماتعرف تقول شنو ..). لكن هى كمان بتتلفت ….!!! قالت ياخ انت غريب جدا ..بس هو طواااالى كده …!! انتا هسه بتعرفنى من وين …..!!؟. قلتا ليها بس جبتى الرايحه …!! انتى قايله الناس دى خلقوها كده بتتعارف ماهو بتجمعا ظروف ذي دى ..!! وانا ذي ماقلتا ليك ..زول جادى ومااعندى حركات الأولاد دى ..(كلام كده ذي الكلام …..انا ذاتى ماعارف جبتو كيف …!!! ) قالت لى والله ماعارفه أقول ليك شنو ….!! حيرتنى ذاتك …!!! اها انا هنا قلتا ليها ما تقولى ولاكلمه ،….وده ماوقتو ..!! نحن نتلاقى تانى فى وقت أفضل ….(المره دى ضحكت عديل مافى ابتسامه ..!! ) قالت لى وكمان حنتلاقى …ياخ انت متفائل شديد …..!! انا هنا هدنتا السرعة شويه قلتا ليها أبدا ممكن تقولى واضح زياده عن اللزوم والزمن ده الظاهر الوضوح بقى مشكله …..!!! قلتها كده بشكل صارم وقاطع ( علووووب يا ) حسّيت بى كلامى ده جاب نتيجه لانو مختلف وصريح ……!! البت دى عاينت كدااا …قالت لى شوف انا حاديك فرصة لكن تأكد انى لو لقيتك عايز تمسك بى زمن …قسما عظما …حافرج فيك خلق الله……!!! اها انا الجمله الأخيره ده ماريحتنى …!! شنو أفرج فيك خلق الله دى ….البت دى مالا قلبت فجئتن كده لى (جاكى شان ..) قلتا ياخ مامشكله المهم تتوفق ياعلوب ….الدنيا ذاتا بقت صعبه (والشفاته ) ديل ذاتم عملو أزمة ثقة ..) قلتا ليها تمام …المهم أخدتا تلفونا واخدت تلفونى…واتفقنا نتقابل عشان نعرف بعض …!! وانا طبعا انتو عارفنى وعارفين (تقلتى ) تانى يوم من الصباح اتصلتا …!!! مافى رد ….!! (ياربى تكون مالقت أب شريحتين ) …قلتا خلاص البت غيرت رأيا… بس ذي الساعة اتناشر كده تلفونى رنا …وظهر اسما …والهوا قسما ..وقالت لي اهلًا ياعلوب ( انا هنا داير افطس ..) ..!! قلتا ليها مرحب… ما أكون بتكلم فى وقت مزعج …قالت لى انا الضاربة (ينعل ابو الحسم ذاتو ) قلتا ليها كيفك …قالت لى …كويسه (اجب بلا او نعم ) ( البت دى مالا سقيله كدا ) …قلتا ليها نحن كان متفقين اننا نتقابل ….(قلتها كده بى ثقة ..) قالت لى بكره فى أوزون الساعة خمسة مساء …(بس كده ) انا ماصدقتا اصلو….طوالى قلتا ليها اتفقنا …!!! خلاص نتلاقى هناك ..!! وقفلتا الخط ماتقوم تغير رايا …..المهم انا أوزون ده ذاتو اسم دوا ولا محل ماعرفتو … لكن ماحبيت أقول ليها أوزون ده منو كمان تغير رايا نهائى وطوالى مشيت لى عمك Google (الزول الوحيد البديل حاجتك ومابكتر كلامو معاك ) اها كتبتا أوزون …طلعو لى سبعين نتيجة بحث …ثقب الأوزون والتغير المناخى…..و مابعرف تأثير الأوزون على البيئة …كارثة الأوزون ….قلت البت دى مرسلانى المريخ ولا شنو …..!! اها رجعتا كتبتا (أوزون الخرطوم ) طوالى جانى (أوزون كافي) …قلتا أمممك دخلنا العولمة …..سألتا صاحبى معمر قلتا ليهو انت فى محل فى الخرطوم اسمو أوزون…!!؟ قال لى انتا لى هسه مابتعرف أوزون…!!! وقاعد تعمل شنو ….!!!؟ (ياربى يكون قاصد الطابيه ) قلتا ليهو ياخ انا بعرفو لكن قالو غيرو محلو ..!! والله لما ضحك ..!! قال لى لا ياهو محلو ذاتو فى نمرة اتنين ورا حديقة اشراقة …أحمدك يارب جانى الوصف فى محلى ويايوم بكره ماتسرع …اها بكره جا ….استحميت الساعة عشرة صباحا… وواحد تانى الساعة تلاته ونص …واتشطفتا الساعة أربعة وركبتا الزلط من حافله لى موتر لى رقشه.. وروحة فى اشراقة.. وأسئلة ..وصلت أوزون خمسه وتلت كده …ألقى ليك زولتى المابتغبانى قااااعده تشرب ليها في حاجه كده… صدقو ماعرفتها دى شنو ذي القهوة لكن فى كباية عصير ..!! قالت لى قبل السلام الزول مفروض يكون عندومواعيد ( اول درس فى الأخلاق ) اها اعتذرتا ليها قلتا ليها المواصلات مشكله بالجد …والله لما حسّيت بيها حنت على .. …قالت لى اها ياعلوب داير تقول شنو …!!! انا قلتا ألطف الجو شويه قلتا ليها مش مفروض اول حاجه اطلب لى حاجا أشربا …وانت كمان رغم انك سبقتينى ..!! ده شنو البتشربى فيهو ده ….!!؟ قالت لى دى موكا …قلتا لبها موكا دى شنو ….!! قالت لى موكا ….!! موكا …مابتعرف الموكا ..!!؟؟ قلت ليها صدقى انا عندى عمتى اسمها (موكا ) دى البعرفا …البت دى ضحكت من اعماقا…!! قالت لى صدق ياعلوب انت زول صادق ولطيف …(انا هنا داير أقع من الكرسى ) (الله يخليك ياعمتى اول يوم تعملى ليك حاجه كويسه فى حياتك ..) اها تانى رجعت للموضوع قالت لى اها انت عايز شنو بالضبط …!!؟ انا قلتا البت المابتلف وتدور دى ياها زولتى ذاتا وعاجبانى …قلتا ليها بصراحة كده انت عجبتينى وعايز أتقدم ليك …!!! اصلها مااتخلعت …!! قالت لى كلام جميل…!! انت بتعرفنى …!؟؟ قلتا ليها… لا ….بتعرف اهلى ..!!؟؟ قلتا ليها … لا ….!!! قالت لى بس عجبتك كده عايز تتقدم لى …!!؟ قلت ليها… ايوه…!! قالت لى امكن ماانفع معاك …. قلتا ليها نحن هنا عشان نعرف بعض (أجابتى كانت مقنعة ) قالت لى تمام ….افرض اتفقنا …انت عندك بيت …!!؟ قلتا ليها… لا ..!! لكن عندى بيت اهلى ..!! قالت لى شغال…!!؟ قلتا ليها… لا …يعنى مافى وظيفة محدده لكن بلقط رزقى … الرزق تساهيل..!! قالت لى ايواااا …!! عندك عربيه …!!؟؟ قلتا ليها لا ….!! قالت اممممم .. عندك شنو طيب …!!؟ وداير تعرس ..!!! عندك قروش تعرس بيها …!!؟؟ قلتا ليها يعنى ماكتيره ..!! لكن العرس دايما بتسهل …!!! قالت لى والله مفروض انت التقوم تمشى تتسهل .. .!!! والله ياأخوانا بس اتمنيت لحظتا انو الارض دى تتشقا وتبلعنى …!! ياخ انا اتهزأتا ….!!! عاينت لى كداااا …قالت لى لكن عارف انت عندك شنو ..!!!؟؟ انت عندك الأهم من ديل كلهم …!! اها انا هنا عيونى تانى فتحن …قالت لى انت عندك العزيمة والصدق والانسانيه والبراءة …وده الراجل الانا بفتش عليهو ….!! انا ياعلوب القلتو ليك ده كلو عندى واكتر منو كتير ….انا أسمى هنادى ..هنادى السنجاوى …ناس السنجاوى …الواحدين ديل بتاعين المصانع …وانا اتقدمو لى رجال بالصف…!! بس كلهم بحس بيهم عايزينى لى قروشى … عشان كده انا نذرتا انى اختار راجلى بى نفسى …وانا اخترتك انت …!!!! اها انا فى اللحظة دى حسّيت بى ثقب الاوزون ده انفتح فى راسى …والمحل كلو دور ..والخلعة كتمت بى …ما فضل لى بس الا اسجد فى نص أوزون ده ذي الجماعة البجيبو قون ديك ….!! وخلااااص بقيت أناهد ماقادر أتكلم …..وصوتى ماقادر يطّلع …بس بعمل مممممم ممممم… طوالى لقيت ليك مشاعر اختى نهزتنى ليك من السرير قالت هىىى ها قووم …!! كمان جابت ليها ابو الكباس …!! امى قالت ليك الزيت كمل… قوم جيب لينا زيت …..!! والله ياخوانا فتحتا عيونى ديل لقيت ليك نفسى مجدوع فى السرير ومشاعر قدامى ….!! زهجتا زهج …وطردتا ليك مشاعر دى من الاوضه…!! قلتا ليها امرقى يمرق جلدك …!! الزيت انشاءالله اليحمروكم بى …يوم الله يفتحا على وتجينى هنادى تجى انت تصحينى…..تانى ما اسمع امى دى تقولى لى متين اشوفك عريس …!!
عريس قال …!! هنادى قالت كلمتا …وجابت الزيت ….!! انتو ياهو زيتكم الكملان ده …امشى جيبى ماعون الزيت الله لا جاب باقيكم …!! قالت لى اجيب ليك الشاى ..قلتا ليها موكا …!! موكا …!! موكا مافى …!!؟ قالت لى الغريبه اتصلت قبل شويه وقالت علوب يجى يوديها دكتور الأسنان …قلتا ليها قولى لي عمتى موكا علوب قال ليك رسلى طقمك بتاع الأسنان بوديهو ليك للدكتور …وهو قال ليك ان شاءالله يجى أسد ياكلك مايفضل فيك سن …!! كنّا وين وبقينا وين ..!!! والله هنادى دى تانى ريموت مايجيبا ..
error: Content is protected !!