قصة مغترب مع الاراضي في السودان !

مغترب سمع حكاية المخطط الجديد قال هههههههه والله عصرتني في جرح لامن بقي ينتح هسي.
سنة ٢٠١١ فكوا لينا الوهمة بتاعت مدينة النور ام درمان وكان شفت الخرط و المجسمات و الابراج و ما عارف المنطقة المركزية و حوالينا فنادق و احواض سباحة و كان شفت الكورنيش الما خمج وانو المشروع ماسكاهو شركة كويتية ( و الكوايتة بحبونا والشريف مبسوط مني وكدة ) وبدوا يردموا البحر من تالا كبري الفتيحاب و مقبلين لا كده .. اها قوووم انا يا الاهبل اب ريالة وأشتري لي قطعتييين ناصية وتاني ناصية بي ١٧٠ ألف ريال وبي محاميها و تسجيلا وصلت ١٩٠ .. اها نحنا في احلامنا و خططنا قومي يا الشركة الكويتية غيري رأيك و خلي المشروع وخلي قطعنا جوووه الموية وأمشي !! اها لي اليوم ده ارضي زي التمساح في الخريف تكون جوه البحر و في الشتاء تمرق علي الجرف تتشمش شوية وتااني ترجع تغطس .. اجازتي الفاتت كان البحر قايم مشيت ومعاي سمسار عنده الخريطه و قلت ليهو كدي وريني واطاتي وينا وحات الله ولااا اتلفت ..دنقر شال حجر و فنننن فكاهو وانا بعاين ليهو لاامن جممممبلوغ وقع . قال لي هديييك الواجعني هسي القطعتين ما بجيبن ٥٠٠ مع انو لو كنت خاتيهن ريال كان جابن مليار و شوية.
هووووي يا السماكة اييي سمكة قاعدين تقبضوها في واطاتي اصلي ما عافي ليكم . وانتو يا ناس الشركة الكويتية شحدت ربي تمسكم الكتكوته .. اما انتو يا ناس الحكومة مداعاتكم ذااتا بلا وجع الخشم ما بنلقي منها شئ ..