“مستنكح” بدرجة فارس – “الحق محفوظ للكاتب”

ضيق ذات اليد والحوجة الماسة للمال لمجابهة ضروريات الحياة ومتطلباتها كانت سببا فى خلق قبيلة المستنكحين الدخيلة على بلادى.. هؤلاء الناس لهم الكثير من النوادر والقصص والحكايات.. واكثرها مضحك.. يتمتعون بذكاء وحنكة.. يعرفون المخارج من اضيق المواقف بأقل اضرار ممكنة..
اهاااااا مشيت لزيارة فردتى ورفيق صباى متوكل.. وصلت البيت.. دقيت الجرس والباب.. لم يفتح الباب إلا بعد التأكد تمااااما مِن مَن هو الطارق.. فتحت الباب شقيقتة بعد كم سؤال تحقيقى.. وبعد التأكد الجازم من شخصى الشفت.. فتحت الباب سلمت ودخلت الصالون لقيت متوكل فردتى فى حالة توتر وكدر شديد.. سلامات يا حبوب.. مالك معفوس كدا.. قال اسكت يا ابوعويض يوسف اخوى متورط فى شيك بمبلغ كبير.. وعامل ليبتون ليه اسبوعين.. ناس المباحث كرهونا البيت والحلة.. ممممممممممم لا حولاااااااا شيك بكم.. قال 250 مليون.. والموجود من المبلغ 150 مليون..يعنى العجز 100 مليون.. قلت ليه طيب والحل؟.. قال عنده ود عمتو حا يجى بعد شوية وقال عنده فكرة.. قلت ليه يا زول هوى فكرة شنو؟.. ود عمتك ده حنفولى وعنده شرتيت (قروش) بحل الموضوع؟.. الشيكات دى بحلوها بالدفع بس.. الحنك مااااا بقسم فى هكذا امور.. المهم ونحن بنتكلم وصل ولد عمتة.. زول شكلو مفتح ومقرم والدنيا واقعة ليه.. هو عارف الموضوع.. بدأ الكلام بالراحة وثقة.. قال يا جماعة الموضوع بسيط.. انا اتصلت على زول حا يحل الموضوع ده حا نمشى ليه الآن نتفاهم معاه.. تمام.. كيف حا يحل الموضوع ؟.. قال ما عليكم خلونا نتحرك انا مواعد الزول الآن..
ركبنا العربية وتحركنا على بيت اعظم مستنكح فى العالم.. عمك بدر.. نعم اسمة بدر.. وصلنا البيت.. اتصل ولد عمة متوكل.. فتح الباب عمك بدر شخصياً.. رجل فى بداية الخمسين من العمر.. وجية جدا.. وشكلة صبوح ومقنع.. هادئ ومرتب.. دخلنا البيت.. جابو الشاى.. وسأل عن الموضوع.. حكو ليه القصة من طق طق للسلام عليكم وموضوع الشيك.. قالو يوسف متعود على حركة الشيكات دى.. بشيل بضاعة وبكسر فى السوق وشغال بفهم طاقية ده فى رأس ده.. لكن لو اتخارج من الورطة دى تانى تووووووبة ما بعمل الحركة البيش بتاعة الشيكات..
عمك بدر قال عندكم كم.. قالو 150 مليون ناقصين 100 مليون من مبلغ الشيك.. قال لا لا اموركم طيبة.. اول حاجة ادونى 5 مليون سريع عشان اجهز ادوات النصب… ادوات النصب دى شنو؟.. ضحك قال جلابية سكروتة وعمة وشال توتل اصلى ومركوب جديد… واجار عربية برادو يومين.. وادونى اسم صاحب الشيك ورقم تلفونة الآن.. وخشمكم عندمكم.. اخد الرقم من متوكل وطوااااالى اتصل .. الووووو السلام عليكم يا ابنى .. معاك خال يوسف بكلمك من بورسودان.. الحقيقة انا بتكلم بخصوص الشيك وعايز احل المشكلة دى وارجع ليك حقك … يوسف ده ولد عاق وتافة ومنحط .. مرضنا ومرض امو.. الله لا يطرح فيه بركة.. غايتو شتم يوسف شتيمة الارازل.. وحدد مواعيد من صاحب الشيك.. قال ليه بعد خمسة ايام يعنى يوم الاثنين الجاى بجيك اشرب معاك شاى المغرب تب فى البيت …. واخد وصف البيت .. مع السلامة يا ابنى وقفل الخط… صراحة انا لقيت نفسى قدام ممثل خطيييير جدا.. ضحكنا كلنا بعد المكالمة..عمك بدر قال سيد الشيك كفاية ندية 140 مليون.. انا بشيل 10 مليون من الجاهزة.. وانتو بعد نخلص تدونى الساهلة هههههههههههه لا حولااااااا بالله فى كدا… وقال كلام خطير جدا.. يوم المواعيد كلنا نجى معاه ومعانا يوسف زااااااتو… تكلمو يوسف أثناء جلسة الاستنكاح دى احتمال ياخد ليه كف صاموتى من عمك بدر ويسمع ليه كم كلمة فارغة… وخشمو عندو… ياااااا عمك الناس ديل عندهم امر قبض يعنى من محلهم داك ممكن يستلمو الزول وعلى الرج عدل… بثقة شديدة قال لا لا لا انا مسؤول زولكم يرجع معاكم تب ويبت فى البيت عاااادى..
المهم يوم المواعيد انا متشلشل عايز احضر باقى الحنك ده.. الساعة اربعة عصر جانا عمك بدر فى بيت فردتى واستلم الكاش وقرم منه 10 مليون بالجمبة يعنى المبلغ بقى 140 مليون… بسم الله ما شاء الله.. جلابية ذى الجلابية وعمة توتل مشغولة و مكروبة بعناية وشال مشغول بالاسود وعصاية ابنوس.. ومرتب الدقن والشنب.. ومتعطر.. شكل مهيب لرجل رهيب.. ومنجعص فى البرادو.. وفى الجيب علبة سجاير بينسون كبيرة وولاعة ماركة.. انا كنت قايلو نبى الله الخضر بصراحة… لما شفت الرجل لما شعرة جلدى كلبت .. ركبنا معاه الثلاثاء انا ومتوكل صاحبى ويوسف اخوة صاحب الشيك.. وبقينا مارقين… كل الطريق عمك بدر يحفظ فينا.. ما عايز واحد فيكم يضحك… لو انا بتكلم مافى زول يقاطعنى.. يااااا يوسف تقعد خشمك عندك.. حا انبزك واديك كف خفيف.. عادى.. الشغل ده بفوت ليك 100 مليون اتزكر نضمى ده سمح.. يوسف برد.. حاضر مافى مشكلة.. فجأة عمك طلع التلفون وقال هوووووس.. سكتنا.. اتصل على صاحب الشيك.. مرحب يا ابنى انا قربت.. يمين شمال قدام شوية… ايواااا البيت الجمبو شجرة النيم.. واقفة تحتها كلك… بس وصلنا..
يالطيف..
فتح الباب سيد الشيك زااااااتو اول حاجة عاين لى يوسف عين ماااااا ريحتنى.. وسلم علينا سلام كويس لكن سلم على يوسف سلام ما لذيذ .. دخلنا لقينا معاه نفرين وقفو وسلمو علينا سلام اولاد بلد.. قعدنا… اول عشرة دقايق كلام بيش سلامات وبسمات.. وسيد الشيك كلما يعاين ليوسف يقرب ينط ليه فى رقبتو.. اهااااااا هنا عمك بدر بدأ يتكلم وسكت المكان إلا من صوتة الجهور… كان بتكلم بثقة رهيبة… قال لى صاحب الشيك شوف يااااا ابنى موضوع شيكك ده انا ما طرف فيه وعلى بالطلاااااااق كان ما ام الولد اختى وصاحبة مرض انا ده كنت دخلتو السجن قبلك.. بس انا ما هانت على اختى المرأة الكبيرة صاحبة المرض والصراحة الولد ده هو السبب فى عياها(طبعا المقصود بالولد هنا يوسف)..ده ولد عاق عديم اخلاق خالى مروه.. ما ملتزم.. لا خلقة لا اخلاق… دايما مورطنا ومصغرنا.. ونحن ناس سمعتنا ذى الدهب.. وعلى كل حال يا ابنى انا جيت من بورسودان مخصوص للموضوع ده.. خليت اشغالى وعيالى فى قفاى.. والنصيحة المبلغ كبير.. فجأة سكت عمك بدر…. كان برتب فى كيفية الولوج فى الحنك الاساسى … والمكان تممممممم ولا حركة … وعاين لى يوسف… ونهرو نهرة اهتز لها المكان وقال ليه … عاجبك الموقف الختيتنى فيه ده ياااا كلب .. وقام علية … طاااخ.. صرف ليه قلم اصلى.. لما الجماعة بما فيهم صاحب الشيك زااااتو وقفو على حيلهم مسكو عمك.. وعمك مصر يديه كف تانى.. والجماعة لا ياج.. خلاص اهدأ اهدأ… والحاج يناهد… قعدوه بعد تعب.. بعد قعد مساااااافة… قال احححححح استغفر الله..
طيب يا جماعة نواصل نضمنا…الصراحة الولد ده ما عندو التكتح… واهله ناس عدمانين.. انا جيتكم وجبت الولد ده معا… وجبت قدرتى القدرت عليها … وهنا تحسس الكيس ..وغيرها ما عندى حررررررم.. وانتو اصحاب حق القال حقى غلب.. وانتو العايزنو سوه زول بلومكم مافى.. لكن كان دخل السجن زوووووول بسأل منه مافى.. وقالو المال تلتة ولااااا كتلتو دحين انا عندى.. وسكت تانى وسحب الكيس وقعد يعد… وهنا صاحب الشيك والشباب المعاه ركزوا مع عمك شديد.. لما وصل 140 مليون… قال والله بسيطة لكن دى قدرتنا… والرأى عندكم… ورجع فى الكرسى للخلف وقال انا نضمى كمل… صاحب الشيك قال بسيطة ياحاج لكن دقيقة … دخل جوه بعد خمسة دقائق رجع وسوس الجماعة المعاه دخلو الثلاثة جوه البيت تانى… غابوا عشرة دقائق… انا قلت ايواااااا بكونو ضربو لجماعة البوليس والموضوع مستحمى.. وحات الحلف رجعو ومعاهم الشيك وأمر القبض سلموهم لعمك بدر.. واتفقو بكره يتقابلو فى القسم الاوسط عند وكيل النيابة ينهو الموضوع… والحمدلله الحمدلله الحمدلله بارك الله فيكم… مشكورين… والله انتو رجال اولاد قبايل… ده طبعا حنك عمك بدر… اها عندكم رقم التلفون لو عندكم اى حاجة فى بورسودان امركم مقضى تب… يلا السلام عليكم… ادونا خاطركم .. اقعد يا حاج… ما بقدر ما شين لى أم الحيوان ده فى مستشفى الزيتونة… هههههههههههههه هو صاحبى اساسا والدتة توفت قبل خمسطاشر سنة عليها رحمة الله…
ركبنا العربية كاضمين كلنا… بعد شارعين كلنا فى وقت واحد فقعنا الضحكة… عمك طلع علبة البينسون جدعها لينا فى الطبلون قال أنا زااااااتى ما بدخن… وطلع الحقة ذى علبت الاورنيش دنكل سفة ذى السفة وقال هوى انا بنزلكم السوق العربى اركبو ليكم امجاد… انا عندى شغلة تانية بباقى الليل ده… ويااااااااا يوسف بالله الكف كيف؟.