“سماحة الدنيا” من اشعار “الحاردلو”

سماحة الدنيا مي زوجة وسكن مفروش
سماحا اخوان اكارم فيك يصادمو جيوش
القايل السعادة جمال بيوت وقروش
مابضوق ليهو راحة بال قدر مايحوش
مهما الليل يطول لابد يعقبو صباح
ومهما تضيق وتتقفل تجد مفتاح
حكم عقلك ان داير تعيش مرتاح
اقيف من زاوية واتخيير رفاقتك صاح
خاوي الفوقو نمات الشكر مي كافية
خاوي الطينتو لي طينة البرية منافية
خاوي الشيمو مابتنعد كتيرة وضافية
خاوي النفسو من مرض الحسد متعافية
اسعي الواعي لا تسعي البكتتر جدلو
اسعي الفوقو تيبان الوقار انسدلو
صاحبا ستفك فرحة ومزاجك عدلو
ضو ما بحوجك في يوم تفتش بدلو
اسعي الجاسر اسعي المابخون اصحابو
اسعاهو الكريم اصلو ونضيف تيرابو
فارسا جودو زي مطر الخريف وسحابو
كاسر حيطتو للجيران وقالع بابو
صاحبا ديمة بفخر بيك ويعلي مقامك
ينوب عن شخصك ان غبتا ويقوم بمهامك
محل ما صابتك محنة وقسن ايامك
بدون تندهلو بتجسر ويقيف قدامك
البي طبعو سمح اخلاق وشر مابكنو
ان ذكروهو في مجلس جرارقو بصنو
قول ليهو سو بسو ما بسألك كيفنو
صنديدا محل ما تختو وااااثق منو