جيت لقيت ليك الحله دي مقلوبه فوق تحت والقيامه قايمه الظاهر انو فوزيه وسنيه اشتبكوا مع بعض في خلاف علي ما يبدو عميق ….!!! ولمن لايعرف فوزيه وسنيه فأحب أقول ليكم في كلمتين انو فوزيه وسنيه هن من يصنع ويحرك الأحداث في حلتتا دي ….نقطة سطر حديد …
قلتا لي مشاعر هو الحاصل شنو ..!!؟ قالت لي ابدا كانو في أمانتي الله قبل يومين مشو المستشفي يزورو سعاد جارتنا دي ولدا عملو ليهو عملية زايده راقد في ( الأطبا ) وأمي كانت معاهم
ومافي اي حاجه ..!! الظاهر فوزيه قالت لي سعاد …يطرشنا والله مافي زول كلمنا …!! اها سنيه نطت من هناك قالت ليها
كلممتك يافوزيه ….حتي قلتا ليك العملية يوم الاتنين …!! (الكلام ده كلو قدام سعاد …) …!!! فوزيه بلعتا ..!! بس طلعتن من المستشفي قالت ليها تعالي هنا ياسنيه ….انتي في شنو ..!!؟؟ يعني قصدك تحرجيني مع المرا ولا قصتك شنو …!!؟ ….وحدثت ملاسنة ..!! تطورت الي مخاشنه…!!! تحولت الي مطاعنه …!!! كلمه من هنا …واحده من هناك … انتي الفعلتي …وانت التركتي …النار قامت …ووقعت الواقعة وفشلت كل المحاولات في احتواء الأزمة ……!!!
قلتا لي مشاعر … وشنو يعني مايتشاكلن …!!! بكره برجعو…. المشكله وين …!!؟ قالت لي والله انتا متفائل شديد…!! انت عارف انو الحلة دي هسه منقسمة نصين ….نسوان مع فوزيه وفريق مع سنيه ..!! انتا هل تعلم انو اول ردود الأفعال فوزيه شالت الكلام لي ( أمونه الشيطونه ) ..!! قالت ليها سنيه قالت انتي ( منفسنه …) …!! ياها ديك أمونه متيمنه وحالفا تدق سنيه وتحلق ليهاصلعه ….!! واشترت ليها سوط ….!!! (اتخيلتا سنيه بالصلعه والتوب بتزلق …..!!!) ضحكتا ضحك …😂
علوب انتا ماجايب خبر ساي ديل نسوان متقدرات …!! انتا متخيل في نسوان لحدي هسه ماقادرين يحددو موقفن من الأزمة …!!! ياهن ديك برجفن اي واحده فيهن خايفه تكون أدت ليها ( سر ) لي واحده من النساوين ديل …
قلتا لي مشاعر والله انا بعرف ( البيوت اسرار ) لكن (الحلة اسرار) دي جديده علي ….!!! (اتاري الحله دي محكومه ونحنا ماجايبين خبر…) …!! طيب ماتكلمي( الحاجه ) تتدخل لاحتواء الأزمة …!! قالت ياحليلك ….!! اتدخلت زماااان ورفعت يدها نهائي …مشت لي فوزيه قالت ليها العني الشيطان …فوزيه قالت ليها اعوذ بالله من سنيه الدنيه ….!! اها ده زول بتكلمو معاهو تاني ….!!…..قلتا ليها طيب سنيه ما تعتذر او تقول ماقاصده ….!!! قالت لي سنيه قالت هي فعلا كانت ماقاصده …لكن هسه قاصده …!! ( ابو الزفت ) ..( الترسانة النوويه داخل الحله في خطر …) …المشكلة انو سنيه نشيطه في (الواتس ) وقروباتا اكبر …!! وفوزيه ماشغاله بي القصة دي ..!! وده طبعا يعتبر تقدم نوعي يؤهلها للتفوق في المنظومة الدفاعية …وميزان القوة ….!!!
المهم فشلت كل المحاولات في تقريب وجهات النظر ولابد من ظهور مستفيدين …!! اها اي واحده عندها مشكله مع واحده فيهن
استثمرت الأزمة ….!! وولعت النار …!!! وناس ملكه دخلو في النص ….(ملكه وكدا) … بتتذكروها….!! اها ملكه قادت مبادره غبية كده قالت يجيبو ست الموضوع ذاتو (سعاد ام الولد العملو ليهو العمليه …) ويقولو ليها بي سببك حصلت مشكله …!! وكدا
….(الصفقه لي ملكه ) ….( ياخوانا مافي ودحلال يقنع ملكه دي تسكت …!!! ) ….
هسه المشكلة برضو انو الوضع الاقتصادي داخل الحلة في خطر …!!! لانو فوزيه وسنيه هن الماسكات (الصندوق) …اها نسوان الحلة المشتركات فيهو يدهن في قلبن …!! لولا خروج تصريحات مقتضبه من فوزيه انو الصندوق لن يتاثر بما حدث …!! حتي شويه قلبن ده برد …!! رغم قرار سنيه الانسحاب من الصندوق نهائيا …. !!! (ولم يتأخر الرد كثيرا ) ….!! فوزيه قالت في ستين …!!! انا بدخل بي اسم بتي محلها …!! (وريتينا لكن ) ….يبدو ان الميزان التجاري في صالح فوزيه …!! لكن وين مع الواتس ده … الإعلام كلو في يد سنيه …!!
اها مشاعر قالت لي …بتصدق (سنيه) في عز الأزمة دي رمت ليها كلام كده هسه الحله دي كلها متوترة …..!!! قلتا ليها…. قالت شنو ..!!؟؟ قالت لي ….قالت والله انا مانوع النسوان البرمو الكلامات ساكت أمشو لي فوزيه القالت هي عارفا الرجال المعرسين بالدس في الحلة دي منو …!!! ( والله انا علوب المامعرس ده خفتا … !! ) وانا أقول مالم الرجال في صلاة الجمعه الاخيرة دي بتلفتو كتير كده …!!! بالله ده كلام ده …!! في داعي ياسنيه تستخدمي القنابل الفسفورية دي …ماعارفاها محرمه دوليا ….!!
غايتو يامشاعر كان دايرا نصيحتي حقو تلحقو النسوان ديل القصة دي لو استمرت الحله دي بتتشلع …!! قالت لي وانا من قبيل بقول ليك في شنو ….!!! قلتا ليها هسه يعني مافي اي بوادر انفراج …..!!! قالت لي في مبادرة اخيرة ان شاء الله تنجح ….!! (ياربي يكون ده الوسيط الأفريقي) …!!! قالت لي ود اخت فوزيه طوالي خاطب بت أهل ناس سنية ديل …!! بعد علاقة خمسه سنين …!!! اها هسه هم بحاولو يعالجو الموقف ده لانهم عارفين انو علاقتم دي ممكن تتنسف بي نيران صديقة .. ..!!! حال استمرار الأزمة …!!!
…المهم انا طلعتا ونسيت الموضوع …!! اها جيت بالليل داخل …بس جاتني ليك مشاعر جاريه…!!! قالت لي الحق ياعلوب فوزيه وسنيه وقعوا اتفاق السلام …!!! اتذكرتا الموضوع …!!! قلتا ليها والله سلامه كبيره ….!! الحصل شنو …..!!؟؟ قالت لي كمال …(ده خطيب البت) .. ساق فوزيه اللي هيا خالتو قال ليها عازمك …وبي هناك سناء خطيبتو ساقت (سنيه ) قريبتا قالت ليها عازماك …!! وكمال وسناء متفقين يجمعوهم مع بعض من غير مايكونو عارفين ….!!! اتلاقو في محل دهب …!! اها لمن (سنيه) لقت (فوزيه ) في المحل اتجننت قالت مابتقعد دقيقه …المهم بعد تحانيس كمال قال ليهم كدي اصبرو احنا عايزين نصالحكم بالدهب…!!! لانو علاقتكم أغلي من الدهب …..!!!
سنيه فصلت ….!!!
وفوزيه ساعدتا بي بسمه ….!!!
اشترو لي كل واحده خاتم …!!
اتقالدن ذي المافي حاجه …وقعن الاتفاق …وكبن الدموع …!! قالن دموع الندم ..والله كان تحلفن لي بكره دي ( دموع الختم ) …..!!
….مشاعر قالت لي سنيه جات لي أمي كلمتا بالقصة دي
قالت ليها …والله انا فوزيه لو وزنوها لي دهب ماكنتا رجعتا ….!!! بس عشان خاطر سناء وكمال ديل ماعندهم ذنب …!!! مبروك ياكمال خاطرك طلع عيار تمنتاشر…!!!
…قلتا لي مشاعر …الود ده مفروض يستعجل سريع يعرس البت دي …انا خايف النسوان ديل يدورن تاني يكونن قافلات علي غوايش …
انا غايتو بعرف (خاتم سليمان) لكن (خاتم كمال ) دي اول مره ….!!!
ياربي يكونن مفبركات القصة دي كلها للموضوع ده …!!!؟؟؟مابعيده عليكن يا ثنائي ( اللغم ) ….الحمد لله ( رعده وعدت )..
error: Content is protected !!