الليله قمتا من الصباح مركب مكنة (الوالي ) قلتا ياخ نحن كان تابعنا الحكومه دي تنضف لينا الحله دي بنكون ضيعنا زمنا ساكت ..!!
الحكومة دي بس خليها لقروش النفايات ..( بتجودا ذي ما الله خلقا) …!! (البسمع النفايات وقروشا يقول نفايات نووية ) ..!!!
اها قلتا طيب انتا ياعلوب بوصفك شاب مستنير ماتقود ليك مبادره مجتمعية وتدعو شباب وشابات الحلة لنفير النضافة والتعمير …!!! والله فكره عبقرية ومدهشه …!!! طيب ياعلوب تبدأ كييف …!!؟ ومن وييين ..!!؟؟؟ ولم تتأخر الإجابة سريعا …..!! الفيس ياعلوب ..!!! ايوه (الفيس بوك ) وأهو الشباب كلو متلمين فيهو ولا داير ليك قروش ولا اعلان ولا دعاية ….!!! ده كلام ذي العجب … …!!!
طوالي كتبتا …
(نظافة الحي من نظافتنا..!!! النفير الكبير ..!!! من اجل حلة زاهية تشبهكم ..!!! الجمعة القادمة فلنقدم الانموذح الحي للإنسان السوداني ..!! نثق في حضوركم ومشاركتكم …!!! )
فكرتا كدااا ..!! قلتا هيااا علوب ..!!!والله زول واحد حيشتغل بالقصة دي مافي ..!! لازم صورة مؤثرة تدفع للمشاركة …!!! ناس الفيس ديل بحبو الأكشن والصور …!! والله يا إخوانا لفيت بي موبايلي ده ذي المجنون قلتا ألقي لي لقطه معبره تحكي وتعبر عن الحدث ..!!! اها لقيت الاكياس المالية الشوارع ومعبية وسخ لما اتفتقت دي ..!! جليتا طوالي ..!! دي ياخ ولا معبرا ولا حاجه …بعدين هي ذاتا بقت مألوفة ..!! والله لو ماشفناها ذاتو ما بنتكيف …!! وفي ناس عادي بقو بسلمو عليها ..!!! لا لا ..دي مابتنفع …!!!
مشيت (الكوشه) الجنبنا طوالي….!!! لقيتا عاديه ..!!! اخدتا ليها صوره بالموبايل والله ولا حركت فيني التكتح ..!! في النهايه شنو يعني ماكوشه …!!! لا لا ..!! بس وانا راجع كده وخلاص قنعاان
بس القي ليك المنظر الرهيب ..!!! ولد مسكين كده وحالتو تحنن بفتش في أكل جوه( الكوشه ) دي …ومعاهو( كلب) لذات الهدف….!!! بسسس..!!! دي لقطة العمر التي تحرك الدواخل وتشحذ الهمم …!!! واكتب تحتها …
(حتي يجد هذا المسكين لقمة نظيفة …!!هيا ننظف ضمائرنا اولا وحلتنا ثانيا …!! الدعوة للنفير الكبير وحملة النضافة ..يوم الجمعة القادمة ..مع التفاصيل)
مش بالله عنوان فظيييع ..!! وصورة أفظع ..!!! جيت جاري جري البيت نزلتا الصُّوره والإعلان …وقَعَدتا منتظر امكن بعد ساعة كده لقيت لايك واحد ..!!!قلتا مامشكله امكن لسه ماقروهو
اها بعد ساعتين لقيت لايك تاني …!! قلتا ياخ دي قصة فارغه انا أحسن انزل الإعلان ده في قروب كبير كده عاملنو الشباب وفيهو كميه من الخلق ..!!! اسمو ( راستات ) ..!! بس نزلتو ليك في ( راستات ) مع صورة الكلب والولد …!! وانتظرتا…!! والله امكن عشره لايك في دقيقتين …(اممممك نجحت الحمله ..) ..!! بس بقيت منتظر الكومنتات التي تؤكد المشاركه ..!!! والله ياجماعة امكن خمسين كومنت ..!!!
بس للأسف ولا واحد فيه نص كلمة …أقريكم ليها…!! اها ياها دي
😂😂
😜😂😜😂
😂😂😂😂😂😂😂
😜😜
😂😜😂
بس بالطريقة دي …!!!
والله يا إخوانا دخلتا في حالة احباط لايعلم بيها الا الله وكرهتا نفسي وكرهتا الحلة ذاتا …!!!
بالله دي مستوي ده …!!
بس داير اطلع كده من الصفحة لقيت الحركه البتظهر ليك انو في زول بكتب في كومنت ..!! اها قعدتا انتظرتو لحدي ما تماهو قلتا وأخيرا ظهر رجل رشيد …!!! (فعلا طلع رشيد) …!!! شوفو كاتب شنو……
(بالغتا فيها دي ياعلوب ….الفقرا اتقاسموا النبقه) 😂😂😂😂
في معرض تعليقه علي لقطة الكلب والطفل التعبتا فيها )
فضل لي ابكي بس …لا وكمان اصر انو يذيل تعليقه بهذه الوجوه السعيدة ..😂😂😂😂😂 معاها (احييي يابطني وجعتني من الضحك …علووب يا ) …(طلع رشيد صاحبنا
) والله انا ذاتي ضحكتا …!!!
مش في اتنين عملو لايك للموضوع في صفحتي اها في واحد منهم مسح اللايك بتاعتو …
….(حباب الراستات)….!!! هسه ده عالم يرفعو ليهو ( قلم ) ..
error: Content is protected !!