غايتو جارنا بله ده اكبر دَجَال فى الحلة دى قاعد قدام البيت فى
الشارع ياكل فى المسواك ده اكل ..!! شهاهو العافيه ونتف ريشو …!! يعنى المعنى انا صايم …( انتا صايم لينا نحنا …) لا كمان مدور فينا خييييييخ …خووووخ …(الله يقرفك ويقرف يومك ..!!) كرهتنا ذاتواها كان جيت بى جنبو ساكت ..!!! الله قال بى قولك ..!! يفتح ليك موضوع يشدك ساعة …!! غايتو بس فى لحظة سهو كدا مريت بى جنبو ..علوووب ….!!! (.الله لا كسبك ..!! خلاص قبضنى) …..اهلًا يابله ان شاء الله تمام ….!! التمام وين ياخ مع الحالة دى ..!! …(شوفو الإيمان ده ) عملتا نفسى رايح …!! قلتا لي خير …!!!؟؟ خير ..!!! الخير يجى من وين ..!! (ماشاء الله اجابات كلها يقين ) …انتا ياعلوب ناس الكهربا ديل يعنى بالظبط كده بقصدو شنو ..!! الناس ديل كفار…!! ( وأخرجهم بله من ملة
الاسلام ) … ياخ الناس ديل مابحسو..!!؟؟ مافى شعور ..!!؟؟ معقوله لكن الطريقة دى ..!! وانا بس ساااكت اسمع …!!!قال لى غايتو. مامشتهى حاجه فى الدنيا دى الا الما لى فى واحد فيهم افش
مغستى دى فيهو واتفشى…!! ( ذي ما تتفشي فى مسواكك ده ..!!! )
قلتا لي …. يورينا الله …!!! اها يابله انا مستعجل شويه …!! قال لى ماشى وين …!! البشوفك مستعجل كده يقول مدير ( زين ) ..!!! 😳اها انا دى خلاص جابت كثافتى ..!! قلتا الليلة الراجل الدجال ده لازم يتأدب ويفهم حاجه …!! ..بس من دربى داك لى معاويه صاحبنا …(شاميهو ذيى كده …!! ) قلت لي يامعاويه غايتو يا أنا ياعمك بله فى الحلة دى ..!! (وتطابقت وجهات النظر ) ( معاوية طلع
برضو من دول الضد ) ..!! قال لى لقيتو شايل (مسواكو ) ده فى نص الشارع يمدغ فيهو …!! صدق من الزعل صفقتا ليهو ..!! قلت ليهو ياسلاااام يابله …!! صوااااام لكن …!! اتخيل اتبسط ..!! قال لى اقل من الواجب …!!! بس معاويه اخد ليهو صنا كدااا ….قال لى بس لقيتا ياعلوب ..!! هو مش قال ليك نفسى أعتر لى فى واحد من المسؤولين بتاعين الكهربا ديل اتفشا فيهو …!!! قلتا ليهو ايوه ..!! قال لى اها أنا بوديهو للوزير …!!! قلتا ليهو وزير شنو كمان أنت
يامعاويه …!! معاويه ضحك…!! قال لى انت كمان صدقتا …!! خلينا نوديه لى ( كمال ) صاحبنا فى مكتبو الوجيه داك نقول ليهو ده وزير الكهربا …ويلا يابله انقل ليهو معاناة المواطنين ….!! عجبتنى الفكرة شديد …!!! قلتا بسس …!!! النشوف نهاية بله ده ..!!! بس جيتو قلتا ليهو طبعا انت يابله تعد من أعمدة هذا الحي ( العمود اليكسرك ) وأحد الرموز البارزة فى الحله دى ( الرمز المسواك ) 📏
بناء عليه تم اختيارك لتمثيلنا أمام وزير الكهربا …!! طلب يقابل رموز الأحياء ديل ينقلو ليهو معاناة الاهالى …!!! والله ياخوانا لما جدع المسواك …!! قال لى والله ما اخترتو الا القوى الأمين …!! الله
يقدرنا ياياعلوب ..!!دي الفرصة ذاتا الكايسا لى زمن ….!!! المهم كلمنا (كمال ) لقينا داك كمان عايش الدور …!! عجبتو حكاية انو وزير دى ..!! هو أصلا …بحب الجخ …(كرتو ) داير يقع من الكتابه
الراصيهافيهو …تلتاشر وظيفة …!! والتلفونات بالصف الخرطوم …دبى …لندن وبالعكس …الرقم الصاح الوحيد بتاع الخرطوم البقيه كلها تلفونات شوارع فى دبى ولندن ..!!!!!!
المهم اتفقنا انو المقابلة تكون يوم الخميس …!! اها (بله ) جا ملفح من الصباح …والشال …والعمه المغسله وشربانه ..!! المهم حشرنا فى عربية معاويه وانطلقنا لمقابلة السيد الوزير…!! وصلنا هناك لقينا ليك السكرتيرة بتاعة كمال والمكتب مكيف …!! وبله يلتفت ذي الطيره …!! هى فاهمه الدور ..!! قالت الوزير مشغول شويه لكن انتظرو عندو خبر ..!! وبله يتلفت …!! بعد شويه دخلونا …!! انا ذاتى افتكرتا كمال الوزير …خاتي ليهو خشبه قدامو مكتوب فيها وزير الكهرباء…💡 وبله قعد يتضاير ..!! بالله مما شاف كمال كده داير يقع من طولو ….!!! سيادة الوزير …!! حبابك والله حبابك ..!! الليله ليلة القدر بس الشفناك …(كمال مدّا ليهو يدو كده من بعيد) …!! (ماوزير كمان …) اهلًا أتفضلو …!! ايوه يابله قالو شغالين طنطنة شديده فى موضوع الكهربا …( الوزير يستفسر ) ..!!
انا قلتا بله خلاص حيفتح النار ..!! .شوفو بلاغة الرد
…… هاذول ها طنطنة شنو… !!!!😳
والله …!!! ومن حلف بالله خلى شي …!!! حررم …!! الناس دى كلها مقدره الظروف ياخ …نحنا الجاتنا فى البترول ده هينه …!! كتلنا فيهو كتلا شديده خلاس .!! الكهربا عاد تجيبوها من وين …!!! تسرقوها يعنى ولا القصة شنو…!!!
بعدين خلى البترول ..!! البحر ..!! .البحر ده ذاتو مو نازل …!! كمان ده شغلكم ده ما من رب العالمين …امتحان بس …امتحان صعب والله …!! والله ياسيد الوزير …حررم نحنا ذاتنا شفقانين عليكم …!!! الله يقبل صيامكم بس …(ونحن بس اها …..منططين عيونا ) 😳نتابع في شهادة بله امام الكونغرس
سيد كمال اخد ليهو ضحكة وزارية كده …!!! قال ليهو…!! برافو
يابله …!! ده برضو العشم فيكم …!!! نحنا واثقين من كدا …!!! وشال تلفونو اتصل بالسكرتارية…..!! ياعواطف عليك الله اقطعي الكهربا شويه مواعيدا جات ..فعلا الكهربا قطعت ذي خمسه دقايق كده فى المكتب …!! وتانى اتصل …!! قال ليها خلاص جيبيها (افففف) ( الحر كتلنا )…. فعلا جات ….!! اها الوزير قال لى (بله ) اهو انا مثلا بعمل الحركة دى مرتين كده فى اليوم واحده الصباح والتانيه فى المواعيد دى …المسؤول لازم يحس ويشعر بمعاناة الناس ….!!! اها بله طوالى قام (هزا) فيهو! وقال للوزير حررم خجلتا ….!!! ( والله مافى زول خجلنا غيرك يابله الشوم ) كمال كمان صدق انو الوزير قال كنّا نضيفكم اى حاجه قهوه شاى …!! لكن هههههههه …(تانى ضحكة وزرايه) …اهو الشهر العظيم ده …!!! تتخيلو بله قال ليهو والله الواحد حقو يفطر على شرف الزيارة دى ( بالله الحق ..!! لاقاكم مرض ذي ده ) اها الوزير قال ليهو عفارم عليك يابله انت راجل قدوه …!!!! بتصدقو بله…. كبر…!!!
بس كمال قال ليهو اقعد يابله…!! اسمح لى اقول ليك انك سقطتا فى الامتحان…!! وأسمح لى كمان أقول ليك انك راجل كضاب ..!! نحنا ماعايزين نوعك ده …!! نحن عايزين الشخص البنقل لينا نبض الناس ووجعم الحقيقي …!!! انت يابله نموذج سئ …!!! انا شخصيا
كنتا عايز اسمع كلام غير ده ..!! اتفضل اطلع بره …!! (بركه الورانى فيك يوم يابله ) وانا كمان من عندى قلتا ليهو ….معليش ياسيادة الوزير والله الراجل ده اخترناهو لانو اكتر واحد (بطنطن ) فى
الحلة ….!! وامبارح القريبه دى قال لى انا امنيتى ألاقي واحد من المسؤولين ديل افش غبينتي …!!! وقال حبذا لو كان الوزير عشان يوريهو منو الطفا النور …!! الزول ده كان جاهز …!!! لكن ماعارف الحصل ليهو شنو سعادتك…!! …!!! والله ياخوانا بس كنت عايزكم
تشوفو عيون (بله ) فى اللحظة دى ..👀.مزيج بين الفار المقبوض فى الشرك والكديسه الفى شوال والكلب الشال جزمتى ….!!! أحمدك يارب ان حضرتنى هذا اليوم التاريخي ….وخرجنا من المكتب …!!! والله بله ده لما حنّيت على …!! اها تانى بتكورك ..!! وقلتا ليهو الوزير قال المساويك فى الشارع ممنوعة …!!! اها ركبتنا للعربيه بله تانى جا (نوع ديل مابمشو ) وبكل ثقه قال …هو لكن مهلنى …!!؟؟؟ والله كنتا خاتى ليهو كلام …حررم كان فهم حاجه ..!!! بعدين هو ده وزير شنو ده البقول كلام ذي ده ( اصدق ماقاله بله فى ذلك اليوم ولسنوات خلت ) طوالى نحنا من الزعل نزلناهو… ….!!! قلنا ليهو نحن مستعجلين اسبقنا انت على الحله …!! هديك الحافله امشي التحم مع الجماهير …!!! نزل وعمتو واقعه فى الواطا الدجال …غايتو اول يوم اعرف ليي بقولو (يحلك الحلا بله ) ….تانى بتجى …!!!
error: Content is protected !!