الليله جعفر صاحبنا ماجاهو عقد عمل من السعوديه …يازووول فرحان جنس فرح قال لى بارك لينا خلاص (افراج) …!! انتو الحاصل شنو البلد دى حاقعد فيها انا احرسا ولاشنو ..!! قلتا ليهو يازول مبروك ..!! ربنا يوفقك …!!! اها قال لى تمشى معاى (المغتربين ) عشان قالو الإجراءات هناك …يازول مشينا لقينا أمة محمد دى كلها بهناك .. انا طبعا دى تانى مره امشى الحته دى ..(هو ذاتو البودينى شنو ) المهم دخلنا اول حاجه قالو تفتحو ملف ..!!المهم بعد صفوف ومدافره وصلنا الشباك …(وليتنا لم نصل .) ..أسسغل زول اشوفو فى حياتى قاعد فى الشباك …بطنو طامه.. وقافلا معاهو …ومسيخ مساخه …(زول فقر خلاص …!! ) عاين كداا فى الورق بى طرف عينو….لكن مركز تحلف تقول امتحان الفيزياء ….انا عرفتو بفتش ليهو فى غلطه …فعلا لقاها ( السنيح ) …!! والله لما ابتسم …!! امشو امشو قال جيبو الدمغة ..!! (الدمغة ان شاءالله يدمغوها ليك فى راسك الكبير ده ..) قلنا ليهو ياخ نحن وصلنا هنا بعد تعب ..ياخ تانى نرجع …!! انتو قايلنو اتبرع ورد علينا… والله كأننا (بنهوهو …) قال لينا عليكم الله ماتعطلونا …!! (بالله شوف ده …) اها قلنا ليهو نلقاها وين الدمغة دى ….!!؟ (مش سؤال مشروع ومنطقى ..!! واقل حاجه يورينا ) ….!! قال انتو لِسَّه واقفين ….!! قلنا ليهو نجيبا من وين الدمغة …!!؟ والله داير يجينا ناطى بالشباك ده ….!! قال لينا ما أحسن امشى أجيبا ليكم واجى ..!! ماتمشو تسألو ..!؟؟ اقتنعنا انو الزول ده واحده من هواياتو المفضله هى الاستمتاع بعذاب الناس ..!! صدقو فى ناس بستمتعوا جدا بالحاجة دى …!! (ديل بكونو لما كانو صغار بوروهم اللعبات لكن مابجيبوها ليهم ..!! ) يازول جعفر ده زول هادئ كده لكن حسّيت بيهو اتضايق ….!! قمتا انا شلتا الورق منو بي زعله كده …قال لينا (ومعاها حدره) مافى مشكله حتلفو وتجونى ( يعنى ابشروا بطول عذاب) … ياربى حيسقطنا فى الامتحان …!!؟؟
اها مشينا نسأل من (الدمعة ) ولا هى الدمغة دى (الظاهر نحنا جعنا )
وبفضل الله والحوامه بين الدهاليز لقينا الهدف …. طلع مازحمة شديد …(وذلك الفضل من الله) .. لقينا بنات وأولاد كده قاعدين ..!! وتلاته موبايلات مدوره …(واتسابى ..وواتسابك ) وشوية (فيس ) وواحدين النصيحه منهمكين فى العمل …!! قلنا بس نقع ناس (الجات ) ديل بكونو ظريفين …!! وطبعا النوع ده بكره اى زول يقطع (الوتسبه دى ..) لكن الظاهر ديل بكونو متعودين انهم يتكلموا معاك والاون لاين ده شغال …دايرين شنو .!!؟؟ واحده سألت..!!؟؟ ولا رفعت عينا عاينت لينا …قلنا ليها دمغه …!! شالت الورق ادتو نظره والعين التانيه فى الموبايل ..
قالت (عشرين الف ) ولا زادتا (مزاد بس ) الحمد لله كان بقت على الدفع هينه..!! شالتم وأدتنا الدمغه….!! بس المحيرنى حاجه وااحده … انو العمليه دى تمت كيف (والجاتنغ ) شغال فى نفس اللحظه …(موهبه ربانيه) ..!!! ياربى أخدو دوره ) ….!!؟؟ واحنا مالنا ..!! مش دمغونا …!! اهااا المشكله اننا راجعين تانى لى زولنا ( السغيل .) ..غايتو فعلا زحينا ..زحينا فى الصف لحدى ماوصلناهو …قال لينا اهلًا جيتو …!! ايوااا كده تمام ..!! يالله امشو افتحو الملف الضريبى وتعالو لى …(قالا بى كميه من الفرح ) …(ان شاءالله بركة اليوم السعيد ده يفتحو ليك بلاغ بنقو.. وارهاب ..وتهديد أمن الدوله ..!!! التلاته فى يوم واحد شحدتا ربى …) بالله شوف الزول ده عليك الله …!! المره دى ولا عبرناهو ولا قلنا ليهو بتقول فى شنو ..!! طوالى مشينا سألنا برانا وصلنا الملف الضريبى ..لقينا واحده قاعده ..(الضرايب دى ظاهره فى عيونا …) النوع داك المابكون ما ضحك فى حياتو غير مرتين ..!! مره وهو صغير ….!! والتانيه شاف ليهو زول اتزحلق بى قشرة موزة وقع اتكسر …بس تانى مافى ..!!! دخلنا لقينا (القطامه ) دى ماشاء الله منوره الوش ….!! قلنا السلااام عليكم …(مافى رد) …(ياربى بكما ….) أديناها الورق ..طلعت النضاره قعر الكباية …وقَعَدت تتأمل …وينو عقد العمل ….!!؟؟ قلنا ليها ياهو ده …قعدت تقرا …وقالت كده قلعت النضاره ….!! ده شنو ده ….!!؟ الوظيفه …مراسله …!! قلتا ليها ..لا أبدا ..(office boy ) ..قالت (اوفيس بوى) ماياهو المراسله ….!!! هو منو سيد العقد ..!؟؟ قلتا ليها ياهو ده … …ويازول جعفر صاحبى ده شخصيه كده ..!! هو ذاتو قياافه …!! ولما قلتا ليها ياهو ده اخد ليهو وقفه كده على شكل استعداد معاها (نفشه ) …!! اها (المرأة الضريبية ) دى انا ماعارف مالا زهجت انو الوظيفه دى كده..!!! ماعرفتا ..!!! ياربى تكون دايرا لى واحده من بناتا …..ولا استخسرت انو شاب ذي ده مفتول العضلات (شلولخ ) ماشى يشتغل (مراسله ) ..ولا شنو الحاصل ..!! رغم انو ( العقد ) ده جعفر بس مثبت بيهو وضعو يعنى حيمشى هناك يشوف شغل تانى …..يعنى عااادى القصة دى …!! بس الوليه دى (عصلجت) اها هنا جعفر خرج من وقارو …قال ليها انت المشكله وين ..!! العقد ده مزور …!!؟ قالت ما مسألة مزور ….!! القصة انو ما أظن انت ماشى تشتغل كده ….!! (اظنها دايرا ضرايب اكتر ) …قال ليها لا …!! صدقى ماشى اشتغل كده …!! الشغل عيب ..!! ؟؟ ولعلمك (مراسله ) دى حلمى مما كنت صغير ..!! عندك مانع …!!!؟؟ يازول اتنفخت كده (واكفهرت ) قالت ليهو بى زعله …هسه اعرف كيف انك (مراسله) …!!! والله ابو الجعافر لم يتردد …. أو يتأخر فى الرد …قال ليها بسيطه …رسليييينى …..!!! والله انا من الضحك عايز أقع …( تستاهل الوظيفه ياجعفر اخوى …) قلتا ليها بس انتى رسليهو …!! والله الزول ده سريع خلاص ….!! صدقو الاستاذة دى ضحكت ..(الحمد لله بقو تلاته مرات ) انا خايف نمشى الالزامية يلقو (مراسله ) دى …!! يقولو الزول ده محتاجين ليهو هنا (يجيب الفطور للتعلمجيه ) …!! .واحنا طالعين قلتا لى جعفر عليك الله ذي الساعه سبعه كده ماتنسى تعال أرسلك الدكان داير لى رغيف …والله ساكينى لحدى الحافله … ..بالمناسبه جعفر خريج (أداب تاريخ ..) غايتو كان رسلوهو هناك ياهو الجاب ليهم (بعانخى).. ..والمرسال مشا وماجا …ياحليلك ياجعفر ….تانى زول جميل …فات ..!!!
error: Content is protected !!