الليله قلتا امشى أحلق شعرى ده لى زمن ماحلقتا …!!! تحلق وين ياعلووب …!!؟ تحلق وين ياعلوب …!!؟ تحلق وين ؟ ياخ ما تنقشط ليك فى اقرب حلاق وخلاص ..!! وبالفعل كان هذا هذا هو الخيار …المهم فى حلاق كده قريب من البيت …مشيت عليهو …بس لقيت صف طويل عريض ..!! قلتا تمام ..!! ده معناها كويس …اها كمان فى مشكله ..!! اتارى الصف ده كلو لى حلاق واحد بس الباقين فاضين ..يازول قلتا انا مالى ومال الصفوف ..(كفاية صف الغاز …) .وبينى وبينكم كده حنّيت على الباقين ديل ..يعنى منظرم يشفق…!! ذي الأخوات البجو عرسان طوااالى لى واحده فيهن بس …وهن قاعدات يتفرجن …!! بالجد انا بتأثر للحاجات الذى دى …طوالى قعدت ليك فى الكرسى قلتا البجينى يجينى … حيحصل شنو يعنى …!! هو انا عريس …!!!؟؟ المهم والله فعلا جانى واحد كده جارى جرى اظنو ليهو ساعتين واقف ….(طلع من الشقيقة اثيوبيا …) قلنا ظبت .. هم ذاتم الجماعة ديل فهمو شعرنا ( الشين مفتوحة ) وفهمنا رصتم وانا ذاتى (الحبش) ديل قاعد احبهم ..طوالى بتخيل لى انهم بضربو الهم بالرقيص …!! يازول قلتا ليهو مرحب ولمزيد من توثيق عرى المحبة والصداقة قلتا ليهو (دنانى ) يعنى اهلًا بالحبشى ..!! والله لمن هو ذاتو أتكيف …يازول لبسنى ليك المريله ديك وجاب عدتو ويتبسم ساااكت ..قال لى (ولاهى العزيم ) انا تسفاى …(ياخوى مصدقك الحليفه فى شنو ..!!! اتشرفنا ياتسفاى بعدين شنو يعنى دايرنى أقول ليك وانا علوب..!! (دى حلاقة ولا رحله ….!! ) قلتا ليهو كيف تمام …!!؟؟ قال لى حالا سعبه ولاهى …. قلتا كويس على الأقل فى شوية عربى رغم حبوب الصراحه البالعا دى ……قال لى كيف راس تحلق …!!؟؟ قلتا ليهو انا ولا انتا ..؟؟ قال لى لا يعنى كيف راس تحلق ..شويه….!! الكتير ….!!! ولا الفى النس ….كيف يعنى !!؟؟ ايوااا يعنى عايز تحلق كيف ..قلتا ليهو بسسس الفى النس دى (الثوره بالنص ) وخير الأمور الوسط …اها مسكة المقص بتاعتو مااااريحتنى …شعرتا بيها مامسكة معلمين …طوالى غيرتا رايي قلتا ليهو ..الشويه بس ..يعنى ماتغرق ..(يقوم يزعمطنا كمان ..) !!!
اها قال كده بدا الحلاقة والترجمة طوالى معاها …( طبعا الحلاقين ديل لازم يتكلمو والكلام عندهم فريضه ولا دين له ….) قال لى انتا من وين ..!!؟؟ ياسلاااام … قربتا أقول ليهو من أديس ..من وين كيف يعنى !!؟ سألته مستفسرًا …قال لى …يعنى خرتوم (بحارى ) ولا خرتوم… ولا وين ..!! ( والله الحبشى ده نفسو مفتوحة شديد …) قلتا ليهو بحرى ..قال لى ..ولاهى انا ذاتى قلتااا كده..قلتا ليهو ليه يعنى ..!! ناس بحرى عندهم جرحه فى راسم …قال لى ناس بحرى تيبين ياخ ….!! طوالى كرسى يقعد …ناس خرتوم ام درمان …(سورى) ينتظر …ايوااا يعنى ناس الخرطوم وأم درمان هم الواقفين فى الصف ده منتظرين الحلاق السورى المعاهو …عاينت فعلا لقيت فى
حلاق سورى فى المحل …قلتا ليهو عادى ماف مشكله …كلكم تمام ….قال لى تمام …بس نحن اولاد ( بحارى ..) (امممممك …يكون اخد الجواز …!! ) قلتا ليهو كيف يعنى ….!!؟؟ قال لى بحارى حاقاتنا وا بنلف فوقو بى راحتنا …ومعاها ضحكه كمان ( والله فعلا أختا راحتك تمام ) قال لى تعرف انا هنا فى عشرا سنه ..قلتا ليه والله عمر …اها …قال لى سورى ده بس عشرا يوم بس ..!! فهمتا من كلامو انو السورى قبض منهم الجو رغم حداثة التجربة …قلتا ألطف الجو شويه …قلتا ليهو ياخ جماعة ديل حرب كبير فى بلد هناك ..!! قال ايوا بس كمان لازم حكومة تعمل نزام …(دى عجبتنى ) قلتا ليهو كيف يعنى تعمل شنو ..!!؟؟بقى يتكلم براحه كده عشان مايسمعو …قال لى يعنى لازم يمتحن كيف يعنى يعرف شعر حلاقة .!!! (داير يعملو ليهم امتحان معادله …) قلتا ليهو انتا لما جيت سودان فى واحد يسوى امتحان …!!؟؟ اخد ليهو سكته كدااا ..قال نحن أديس خارتوم كلو واحد ..رغم اعجابى بالتوصيف قلتا ليهو (سورى ) برضو اخونا …فى الوقت ده سامع ليك السورى مع الزبون المعاهو بتكلم …لك احلى أصة شعر حبيبي …!!! شو بداك..!!؟ خفف لاك اشوى ..ولا بداك عاذوئى….!!؟ داك طوالى قال ليهو على ذوقك …يادوب انا عرفتا الصف ده مالو طويل (للزلمه ) ده …!!! قربتا أقول للحبشى انتا نوع الكلام الذى ده مابتعرف تقولو …شابكنى بحارى ..وخرتوم ..!! ياخ دى نحن فى الحافله زهجنا منها جاى تبرطم لى بيها هنا …اها تانى رجعنى للقناة الاثيوبية دى ..قال لى …حر شديد الليله ..(ولاهى العزيم !! ) قلتا ليهو ايوا سخانه شديده (هسه فى داعى
تذكرنا ) اها فى الوقت داك الزلما قال للمعاهو ..لك يخليلى ياك …شو هالطله …احلى عريس اليوم …(وهو ولا عريس ولا حاجه …زول ساكت جاى يحلق ) بس لمزيد من رفع المعنويات ..ثم أردف …لك تسلملى …رح خلى شعراتك
اليوم تبرء برء ..!! عليك الله شوف جنس الكلام ده …قال ليهو حاخلى شعرك يبرق برق …انتا شابكنى الدنيا حر …(الحر اليفسخك …) لا وزادنى من الشعر بيت ..سألنى انتا اسمك منو …(الله لاتاجرك انت عايز تحلق لى ولا تطلع لى
قطعة ارض ) قلتا ليهو أسمى ..علوب بتصدقو ضحك ..!!! اى والله ضحك ..قال لى…(الوب ) اسمك مالو كدا ..!!! قلتا ليهو والله لو (الوب ) فعلا مالو كده …!!! دى مصيبة شنو الوقعنا فيها دى ….قال لى تعرف (الوب ) انت فى سلعه (صلعه ) قريب يجى …!!! والله قربتا أقوم..!! ياخ الصلعة المقابله الحر …عليك الله شوف الحبشى المحبط ده !!! لا وكمان عندو خاصية توقف الحلاقه عند الكلام …(الزول ده محتاج يتفرمت …!!) زهجنى زهج …وداك بهناك شابك
ليك الزبون ..رح أعملك اصة تبين الوجه الحلو …وباينى وبايناك… هيدا الشعر لازملو حمام زيت ..حابب اعملاك …!!؟؟ زولك طوالى قال ليهو …ايوه اعمل لى …انتا اقعد عديها لي جاياك (سلعه ) وعندك قمل ..!! الله لا كسبك ..
الله يقومنا بالسلامه بس الليله ….لا وسألنى بدون خجله …تويل زمن انت حلاق مافى ..!! قلتا ليهو ايوه عندك مانع ..!! بس وبدون مناسبه قال لى انا ساكن آل (جريف ) وا مواسلات سعبه انت ماتعرف بيت قريب هنا نحن يعمل ايجار نحنا تسعة واحدين وممكن مقدم سته شهر يدفع ….(خدددد…. زولك شغلنى سمسار..!! ) ( بينى وبينكم عجبتنى مقدم سته شهور دى فكرتا أ أجر ليهو بيتنا ….) وبعدين شنو حكاية آل (جريف ) ياربى الجريف دى طلع فيها نفط ولا شنو ..!!! اصلو ولا رديت عليهو ..وهو ذاتو مااتحسس …طوالى مشى للموضوع البعدو… ولاهى حاله سعبه …كل شى غالى ..!! ياخوانا الزول ده فى واحد مسلطو على …!! هسه فى داعى للأجواء دي وبى هناك الفضائية السوريه شغاله دلع فى الزبون …لك احلى بلد السودان ….!! ولا….كلكم عاراسى ..أعملك اليوم احلى أصه ورح تدعيلى …لك هيدا الحمام عملك شعراتك بتاخد العقل …عنجد انت مزوء …خلنا نضيفك شى ..!! أهوه ..!! شاى ..!! اي شى …مابصير ..!! وداك يقول ليهو كلك ذوق شكرًا كفايه كلامك الحلو …اى والله حلو ….وفعلا
مابصير الصار على انا ده ….(دايرنى اشوف ليهو بيت ..!! تبيت يايابا فى السهله …) وكمان محتج ليه واقفين ليهو صف …!!!! ماسامعو بقول فى شنو …!! انتا اقعد أتنبأ بالصلع والجلحات …!! يشهد الله لو عارفو ده كلامك كان بس ياهو الصف …لا وكمان بدا ينفض فينى قال لى خلاص مبروك خلسنا … ..تجى تانى توالى انا موجود …بس انتا قول تسفاى …قلتا ليهو والسورى ده اسمو منو..!!؟؟ ردا على بى زهجه كده قال اسمو تلال ..دخلتها Google فى راسى طلعت طلال …قلتا ليهو بسس المره الجايه انا طالع التلال دى …عاينت لى شعرى لقيتو مزعمط وحفرتين (هو انتا فاضى من الايجار …) (اذا غامرت فى شرف مروم فلاتقنع بمادون النجوم …) اها انا التلال دى طالعا طالعا …على الأقل نسمع لينا كلمتين حلوين ..اديتو قروشو ..وخمسه جنيه بقشيش بس لانو عرفنا على طلال …وانا طالع طوالى (ابو الطل) لحقنى بى كلمتين ..لك امنور حبيب البى …وناطرنك اتشرفنا بهالطله الحلوه تانى ..يسلمولى ها الديات ..لك أهلين وسهلين …بالله شوف الكلام ده كيف ….!!! وانت ياتسفاى هسه انا عرفتا اسمك …!! وساكن آل (جريف ) ..!! والحاله (سعبه ..!!) وعايز بيت ايجار ..!! والمواصلات مافى ..!! وأنتو تسعة …اها السورى ده بلدو كلها (اتلحست ….) حصل بالغلط جاب سيرة درعا …!!! قلتا ليهو جاييك ياطلطله وعليك الله أدى زولكم ده دوره كان تعمل ليهو نقله ولا افتحو ليهو فرع فى ال (جريف) …ده شنو ياتسفاى لاقصة شعر ولا كلام من درر …ياخ انتو ناس حضاره (امسقنالى تناشو ) يعنى مابالغتا..!! …
error: Content is protected !!