والله غلبنا النسوي …اى شغله فى البلد دى دايره ليها واسطة …اها يعنى نقعد نربع يدينا كده ولا كيف ..!! اتخيلوا واسطتى كانت منو ..!!؟ حاجه مابتصدقوها ..!! بتاع (الاورنيش) …!!! اى والله ياهو ذاتو …!! انا باقى مرات كده لمن تجينى قرفه كده بمشى اشرب لى كباية شاى عند (زكية ) ست الشاى مره فاااضله كده والله مرات تديك كلام ذاتو يطمنك …!!! وعندها شاى انا ذاتى ماعارف بتعمل فيهو شنو..!! ياخ ده مش بزبط الراس ده بخلي مزاجك ذاتو رايق …لكن بعد شويه اكتشفت انو القصة مافى مافى الشاى براهو المسالة عندها علاقة بالدوائر المحيطة يعنى بلقى لى ناس كده ذي حالتى دى تاكلين هناك وهاك ياقصص وحكاوى وشمارات نسوى شنو تبقى علينا عطالة ودبرسه أهو بنفكها فى بعض ..!! المهم يازول مع القعدة دى بجى الود بتاع الورنيش ده يلقط رزقو …!! والله محننى … الأولاد ماشين المدرسة وهو لافى بى هنا …!! وانا صراحة ( جزمتى ) دى مابلعب فيها جابا لى صاحبى هديه من جده والله وعاجبانى شديد …!!! اها الود ده مره قال لى …انت ياعلوب شغال وين …!!؟ والله اصعب سؤال يسألنى ليهو …!!! قلت ليهو والله كان لقيت لي معاك طريقه بشتغل معاك ….!! اخد ليهو ضحكه كده …وسكت …!! قايلنى بستفزوا …!! ولما حسّيت بيهو اتأثر كده…!! قلت ليهو انا كان لاقى شغل شايفانى مصنقر معاك هنا النهار كلو …!! اها الود لما حسا بى جادى كده والله هو ذاتو اتأثر لى حالتى دى وقرررب يبكي …!!! قال لي ياخ انت ماتدق الحديد ده …والله قالو سااااقط …!!! طبعا انا مافهمت حاجه ..قلت ليهو كيف يعنى تقصد شنو ..!!؟ قال لى تقع الكرين ده تتم ليك بيعه بيعتين والله كنجالات صاح ….!!!! اهااا وقع لى كلامو… يعنى سمسار عربات …!!!والله ياخوانا بس كلام الود ده اصلو مافارقنى اليوم داك وقلت فى نفسي انت صحى ياعلوب الناقصك شنو …!! حنكك سنين …وانت ذاتك شخصية كده …ودى شغله اصلو لاعايزه واسطه ولا عندها كبير ….!! انتو قايلين تانى يوم مالبست ليك جلابيتى وعوجت ليك الطاقية وجزلان كده فاضى فى جيبى ده …!! ويالكرين جاك زول…..!!
مشيت قعدت بعيد قلت فى البدايه اكشف كده اشوف الحاصل شنو …!! يعنى تمرين كده قبل المباراة …!! لقيت ليك الشغله محتاجه لى تلاته حاجات …!! قوة قلب …!! وحنك …!! وحليفه ….!!! يعنى اقل حاجه على الطلاق بالتلاته ……!! ده غير حرررم …!!! ووحات النعمة دى …!! ويبقى لى اخر زاد …..!! بس ياها دى عدة الشغل وانا اصلى ماعندى (مره )يعنى عادى الطلاق ده ممكن ادقو عشره مرات فى اليوم لو احتجتا …اها فى حاجه تانى مهمه …لازم تدى العربية دى مسحة كده بى يدك وتقول ياخ العربيه دى المسطره بتاعتا فيها عوجه …!! والرفارف ماخده بهيه …!! الجماعة كده طوالى بااامنوا ويقولو الزول ده سيدا ومنقطا …!!! لانو مافى زول عارف مسطره يعنى شنو ..!!والشى التانى اى عربيه لافه هناك ماخده بهيه …!!!بس دى كل المؤهلات …
يازول جيت اليوم التانى زول شغل عديييل ..دارع طاقتى …واخبت فى العربات …بس جا واحد كده عارض عربتو
طوالى جيت عليهو …!! اها يابن العم ..بايع .!!؟ قال لى ايوه بايع …!! قلت ليهو داير فيهو كم البوكس ده ..قال لى بى سعر السوق دايرين فيهو تلتميه وخمسين …!! طوالى ضحكت كده وقلت ليهو ياخ كلامك ده بعيد خلاص …!!! وأديت البوكس مسحه كده قلت ليهو هو ذاتو مسطرتو فيها عوجه ..!! والبوكس ده ماخد بهيه …!! والله الناس الجنبى ديل انفقعوا بالضحك …!! اتارى المسطره دى فى البكاسى ذاتا مافى …!! والبوكس طلع تمنو خمسميه اقل حاجه …تلتميه وخمسين دى قالا ساكت عايز يضحك بى …!! وطلع السايقو ذاتو سمسار اصلى …!! الظاهر الجماعه عرفو أنى لافى ساكت هنا قالو يمسكو بى زمن …!! وطلع البيت محروس والسماسرة عارفين نفسهم ومنظمين حالم …ونوعى ده اسمو الفاره …!!! والله وطلعت فاره وداقسه كمان ياعلوب …!!! المهم اتخارجت برااحه وقلت فى نفسي انت ذاتك ياعلوب البوديك لي جنس المله دى شنو… ديل فاقد تربوى ساكت .. وانت راجل محترم قلت اطمن نفسي شويه بعد البهدلة دى …!! هسه عليكم الله دى جزمة سمسار …!! شوفا ترارى كيف …!!! طوالى طلعتا ليك على شجرتي …وبى صوت عالى …يااازكيه عليك الله واحد شاى مظبوط ..!! وتعال ياولد ورنش الجزمة دى …!! وتانى كان قلت لى الحديد ساااقط ..بسقط حجرك ….!!! قال سمسار قال …سمسار ..بالسا …!!!
error: Content is protected !!