اها اليوم داك قلت كده شلت شنطتي دى فى كتفي متوجها الى الميناء البرى الخرطوم قاصدا بيت خالى فى البلد …وانا أصلا والله ماكان عندى نية وماداير امشى…!! الا أمى قالت لى ماعافية منك ياعلوب كان مامشيت شفت خالك سوليهو العملية….!! والله العملية ذاتا بتاعة شنو انا ماعارفا …!! تكون عملية ارهابية ياربى …!! غايتو بس اتوكلت وقلت امشى …(جابت ليها عفو كمان) …هو انا ناقص !! وانا ذاتى وآلله مشغول وعندى مية حاجة… بعدين خالى ده انا شفتو بالاسكايب …!! وضربت ليهو تلفون…!! واتونست معاهو بالواتس ..!! يعنى بعد ده الا انزلو تطبيق فى تلفونى ده …!! نسوى شنو غايتو أهو حال الدنيا …!! المهم من رقشة لى حافلة لى بص وصلت المينا البرى ده .. لقيتو طبعا كالعاده زحمممة ألف….وناس داخلة وناس مارقة …(انتو الناس بتسافر كده بتمشى وين ..!!!؟) كمية من البشر …وستات شاى …!! وشية جمر…!! وصوانى ملاح …!! وحلاوة سمسمية …!! وقصب سكر ..وأولاد بى هناك ببيعو (كدايس ) بتاعة لعب ..ودباديب ..وبشاكير ..!! وشحاديين …..!! وناس كده تانين تحس بيهم لافين ساااكت بس …هم ذاتم ماعارفين ليه مدورين كده …غايتو بس قيامة رابطة …!!!
اها كمان الكماسرة ديل عالم تانى …!!! كوووووووستى ربك ….يا والله لمن يجرها كده تحلف تقول ده (ابو اللمين ).. يرد عليهو واحد من هناك …بورسودان بورسودان ..بورسودان…يا …(واليا الاخيرة دى الفيلم كلو) …. ليعقب ثالث …مادني.. مادني ..مادنى (ده اسم الدلع بتاع مدنى ) …والله بس اغانى واغانى …وانا أعاني …
المهم فى نص الجوطة دى لقيت ليك نسوان كده مستاءاات .. ويعانين..!! اتاريهو فى واحد كده ماعرفتو حاسى بي شنو …شابك ليك الناس نبذ كده بالبارد …!! انعدمت الأخلاق …!! انعدمت المروه …!! انعدمت مابعرف شنو …!! الغريبة اصلو ماجاب سيرة البصل والغاز…!!؟؟؟؟
اها كمان جا واحد تانى ده كمان (طبزا ) عدييل …لانو بقول ليهو فى كلام فارغ ..ويتلفظ ..ويقل فى أدبو… كده نهارا جهارا …المسالة دى ضايقتنى شديد …!! وبينى وبينكم لقيت النسوان ديل مرصوصات …وامة من الناس ومافى زول قادر يسكت (المعتوه ) ده …..!! طوااالى يازول عاينت بالجنبه كده لقيت النسوان ديل راجين ليهم راجل يثبت الزول ده ويوقفو عند حدو …بس وقلت كده انبريت….!!! اسمع ياخينا. هىيي ….انت راجل مامحترم ولا شنو …!! ده شنو الكلام الفارغ البتقول فيهو ده … لامحترم نفسك …!! ولا محترم الناس دى ..ايه الفوضى وقلة الأدب دى …. احترم نفسك ..!! والله لما انا ذاتى اتكيفت من نفسى كلام كده رصيتو ذي الرصاص ….!! وبعاين كده بى طرف عينى غايتو فى واحده كده بس فضل ليها تزغرد …!! وسمعت لى كم تعليق كده بالجنبه ….عاد انت اريتك ود السرور يايابا تسلم أمك الجابتك …(كويس انها ماقالت لى المرسلاك لى خالك) ..المهم كمان الكلام ده خلانى طاير ودست ليك بنزين زيادة على الراجل ده …!!! الغريبة الحيطة دى ردت كان هو رد !!! بس وااااقف يعاين فينى ….!! واكتشفت ليك انو الزول ده مابرمش …!!! بس عيون مفنجلة …..!! بينى وبينكم خفت شويه كده …!!! ولاحظت اضانو الشمال دى ذي بتتحرك كده …!! فأيقنت أنى امام مجنون …!! المهم ماقال لى اى حاجه…!! وطوالى فات ….!! انا يادوب اتنفست …واخدت لى قدلة كده وإحساس عظيم انى (الوالى ) …وحاسى الناس دى كلها مركزا معاى …..بس دقيقتين كده اشوف ليك زولى ذااااتو المابغبانى جاى من هناااك و شايل ليهو حديده …(يشهد الله تسند سد مروى) …وجاى على بالاسم ….والله ياخوانا الدنيا دى بس بقت لى علبة كبريت …!!!
هى ياجماعة ده كلام شنو ده …!! اها وبين ماهو جاى على …وانا واقف ..!! عديت أطول مسافة فى عمرى ….ومخي ده اجرى خمسة الف عملية حسابية فى الثواني دى …!! هى ياربى هسه انا انتظر الزول ده كده بس …!! لكن كيف كمان…!! أقوم جارى بعد المرافعة والعرض القدمتو ده ..!! وأودى وشى وين من الناس دى ….لكن كمان العمل شنو..!!؟ وجاءنى الرد سريعا ولم يتأخر….!!! ناس شنو كمان ياعلوب …وانت ذاتك بتعرفهم من وين …!! تنتظر ليك (مجروس) ….!!! والله البفكك ماتلقى …!! واكتملت المعادله بعد الأسداس فى الأخماس وطلعت النتيجة فى الثانية الاخيرة ….!!غايتو الزول ده وقت فضل ليهو مترين كده منى ..انا كنت أخليت السوق الشعبى والدوائر المحيطة
فى عملية يمكن ان تسجل فى (غينيس ) لسرعة التنفيذ ..انا ذاتى مامصدق …!! المينا البرى ده بقى هناااك …غايتو حمدت الله على السلامة والنجاة …مع احساس بالخزي والعار لهذا الهروب الكبير بعد ان فتحت الأندلس قبلها بدقائق ….!! ويازول بديت اقنع ليك نفسى ….!! قلت هسه هم ذاتم الناس العطالة الانا دافعت عنهم ديل والله الزول ده كان لحق لمن وصلنى بى حديتو دى ..!! غير يصورونى بالموبايلات الشايلنها دى مايعملوا اى حاجه …!!! والقى نفسى حايم فى الواتسبات بالليل …وقادل فى حيط الفيس بوك …وهاك ياتعليقات …البقول ليك (حرامى فى المينا البرى يجد جزاءه الرادع ) …..!! والبكتب ….(نشال المينا البرى بالحديدة على راسو …) وفى واحدين كده بيزيدوها كوز …(الدواعش يصلوا المينا البرى والشعب لهم بالمرصاد) ..ويخشو ليك المثقفاتية ديك ( هذه هى افرازات المرحلة )….ده كلو وصورتى معلقه فى (الجلاكسي ) ذي خروف العيد ….!! ومابعيد يطلعوا لى أغنية ( علوب ياعلوب بالحديدة والمركوب )….يااخوى انا مالى ومال القصة دى ..المهم غايتو شوية الكلام ده هدانى …!! ومن هناك طوالى ألغيت تأشيرة زيارة الخال …والحمد لله ..!!! بس عندى مشكلة واااحده …البجيب لى شنطتي شنو من هناك ….!!
والله ياخال (عمليتك ) ماظريفة …وانت ياعلوب بى أماااانه …!!! حركتك جبانة …!!
error: Content is protected !!
ياروح ما بعدك روح
ههههخخخخاااااي