“مسادير” من شعر “البطانة”

برز الحاردلو في انشاء الصور الجميلة للبطانة عندما تهطل الامطار عليها وتتزين الارض وتنتعش الانعام والناس والطيور قال في ذلك:
الشم خوخت بردن ليالي الحرة
والبراق برق من منه جاب القرة
شوف عيني الصغير بي جناحه كفت الفرة
تلقاها أم خدود الليلة مرقت برة
الخبر الأكيد قالو البطانة اترشت
وسارية تبقبق بالصباح ما انفشت
هاج فحل أم صريصر والمنايح بشت
وبت أم ساق على حدب الجميل اتعشت
برق القبلة شال شالت معاه بروق
ختت له أم رويق عم السحاب من فوق
العفرت رحل يبكي ويسوي القوق
والضحوي اتردف ليله ونهاره يسوق
البارح بشوف يشلع بريق النو
وحس رعاده يجرح في الضمير كوكو
داك طير القطا الدور مشارع الهو
وفرقان البطانة اتماسكت بالضو
وقال ود جماع البطحاني يخاطب البطانة:
الموت يا أم هبج صقاره تابع خيلك
الا كرمية ما بتجوعيه دخيلك
رب العزة بي وابل المطر ساخي لك
السحي والمغيريط والصغاري نخيلك
نعمك كس في الهبجة التناها مهيق
براقك بيقدح وهمبريبة يفيق
بهم ربلك مجدع يا الفضاك مو ضيق
علاوك مزرقن وشرفه نيله مزيق
وقال ود نابل البطحاني:
الموت يا أم هبج فيك بالكوار مو صدفة
وما ببنكر عليك يوم تفتحي لك ضلفة
مرية فيك بتطيق العمار الخلفه
مطروحة جناحك طرفه وطن حلفا
وقال شاعر آخر:
برقك قلع السارية أم سحاباً صاح
ونعالك سكت من الهواء اللحاح
رعدك رز في المطرة التقيلة وقاح
وبارك لاقي شمس الغيبة باكر زاح
قال إدريس ود علي في البطانة:
دي بطانة أبعلي العند الشعور مفهومة
شرطاً للبدورها محنضلة ومسمومة
كم لله فيها مفقشين هام رومة
بالدم والرمم لا عند جزم موسومة
حسان وابعلي واب سن حدار الجار
كاتلين عز مكوك كم بردوها الدار
من الهايكوته لي البلد ابو قنا وصغار
ما خلوها نية تتقلب للنار
وقال العاقب ود موسى العشيابي في الفخر:
نحن نسوي لكن ما بنقول سوينا
نحن نفرتق الكرنة ام صفوف بايدينا
الزول البضيف عدم الشراعة علينا
يفهم مني ويسأل من توارخ النينة
نحن الود لبونا بشيل حمول النائب
تصرم عندنا القحية البصيبها الصائب
نحن اولاد شكير جور نالنا كلو نقائب
ديمة نلولي في المحن الكبار وغرايب
وقال ود عبشبيش يخاطب البطانة :
بندق فيك نحاساً من قديم راجينا
فيه خيولنا عارضات كيه للمابينا
كان ما تجرتقك دماً علوجه سمينة
لا تجيبي لنا حنتوت يا ام هواياً زينة
حليل اهلك حليل البردوك قبيل
دا هجين المقادير بي مرور الخيل
قبال التصاويت والبهادل ديل
ما شافو الاضافر في جوامع السيل
وقال شاعر آخر:
ممعوط ما بطير مثلا قديم وارثنو
سيف البالة ما بقطع قدر ما تسنو
السافين لمال الناس في الخزن راشنو
لا بد يوما يجي بالخشيم طارشنو
وقال شاعر البطانة في الغزل:
ملخوخة وبتمشي من الكفل متساندة
سمحة جميلة جدا جدا الا معاندة
اصلها في الوسط بين الهنود والزاندا
لبست في الضمير بدل الحزام الباندا
قامتك سيسبان عم القصار مبهولك
عقلك ادهش الناس حاروا فيهو كهولك
سبحان الله يا الظبية المرادة سهولك
ذوقك فوق صغر سنك تقول مو هولك
سمعنا بيك وجينا تسوقنا ليك الفرحة
وصلنا لقينا تدمير والجثث منطرحة
غايتو حسب افادات الشهود والجرحى
قالوا الماتوا ديل ساعة عدلتي الطرحة
وقال “الحردلو” في الغزل:
مرقت آمنة سوت مسخت علينا الجيل
طبلت قيدها كع في العاصي والعنتيل
الشرباتة شتت والعواصي تسيل
مي داب ود رهيد مبروك مجر النيل
وقال شاعر آخر:
قوامها الباهي جل الباري في تشكيلو
حد ما يبقي ماعون الجمال بتكيلو
الخلتني اسالم في الشدر واشكيلو
عندها وجنـة تنشاف من مسافة كيلو