الجلاكسي المسروق

جوالي اتنشل وانا عقلي ودر وجنة
والسرق الجلاكسي ان شاء الله لا يتهنى
تتقلم اصابعو عضامو جت تتنى
لايضوق النعيم لايشمو ريح الجنة
…
جوالي اتنشل وانا حالتي تب بطالة
كت بفرح شديد وكتين تجيني رسالة
السرق الجلاكسي يموت ويبقى زبالة
تنهش في الصقور تشبع كلابا ضالة
…
جلاكسيني العزيز كت مابية بي تبديلو
تطشيهو السريع والنت سمح توصيلو
السرق الجهاز يا الله تبقى كفيلو
تدعي عليهو امو وما يتمو عديلو
…
جلاكسيني اتسرق صاحبتي جات عزتني
قالت يا حليل السامسونج العاجبني
فيهو اغاني لي ترباس وانصاف مدني
فيهو اغاني لي شيرين وتامر حسني
…
فيهو حسن عطية وفوقو ودالبادية
فيو سيدخليفة واغنياتو الهادية
بت القلعة فيو ست الخدود النادية
فيهو منوعات واصوات رخيمة و شادية
…
فيو ود الامين غناها خمسة سنين
وفيو عقد الجلاد لي وين وكيف لي متين
فيو وردي الوطن غناها نور العين
وفيو الحوت صدح ان شاء الله في ستين
…
ومن ارض الشمال كان فيهو ود النصري
فيو ود السقيد طراني قوق القمري
مشغول الفكر حار بي دليلي وامري
يارب ياكريم عوضني كتر صبري
…
ومن فقد الجلاكسي انا قلبي كايس جبرة
والسرق الجهاز ياربي يصبح عبرة
تتكسر سنونو ويبقى متل الصبرة
تنسل عينو زي علاقة تقعد برة
…
السرق الجهاز منحوس واصلو وضيع
السامسونج جميل في شكلو راقي بديع
أياسارق الجهاز في بير غريييييقة تضيع
تمسك فيكا اصلة تقطعك تقطيع