“ديوان العرب” فخر ومدح

في قروب (ديوان العرب) بعد انضمام الأساتذة: السر جارتو ،فتح الرحمن محمد أحمد ، بابكر الرباطابي ،أبوبكر ود المر.
كتب الدكتور النعمان على الأمين كرار مرحبا بهم فقال:
مرحب بالبكاري وسرهم جارتوبو
مرحب بالأصيل فتحي وحباب عرّوبو
الديوان مبخر والدعاشة هبوبو
كان دوبيت وكان شعراً فصيح ابدوبو
فرد عليه فتح الرحمن الجعلي:
ود كرار سلام حزت الشكر من توبو
وأهلك من قديم كتر الكرم عرفوبو
الداخلين عليك أهل الفضل، قاموبو
ركابين صعاب والليل أهل لالابو
فرد الأستاذ بابكر الرباطابي :
جيناكم حفايا الكل فقد مركوبو
اتبشتنت اللغة و قطعوا الحرف عرقوبو
حليل أهل الكلام رصوهوا عدّلوا طوبو
ماقايلين العوين بينبطحوا ويتسلوبوا
فرد عليه الدكتوركمال محمود النعيم:
ديوان العرب الليلة جوهو تلوبو.
شاحدين الكريم تبقو الرؤوس و تنوبو
موزون الكلام عسلا عديل تبدوبو.
مرحبتين سلام ديوانكم اتهنوبو
فختم فتح الرحمن الجعلي :
الشعر الأصيل الليلة اتغنوبو
وزودوا في الطرب خلونا نلقى هبوبو
خلوها الصراعات والخلاف وذنوبو
ينقطع الخلاف إن شاء الله رايحة دروبو

Leave a Reply

Your email address will not be published. Required fields are marked *

error: Content is protected !!