مجادعة شعرية بين البشير ورئيسة كرواتيا !

مجادعة إستقبال وترحيب بين فخامة الرئيس السوداني عمر البشير
ورئيسة وزراء كرواتيا كوليندا غرابار كيتارفيتش التي اصرت علي خرق البرتوكول وإستقباله في مطار موسكو الدولي.
وبمجرد وصوله و عند باب الطائرة انشدت قائلة
جيدا جيتنا يا قمر السبوع هليت
حبابك تاني يا فارس العرب اسد الخلا اب سوميت
شرفت الحضور ذي الصقر خويت
قلبي انسر لما سمعت إنك جيت
حققت المراد لا خفت لا اهتزيت
رد البشير هازا بعصاه
حباب نوارة الرؤساء اللقاها نويت
حباب الخدو يضوي مساحة الاوبريت
وحات إسم الله لو ما إنتي ماكان جيت
ولولا البرتكول كان بالحضن خشيت
#كوليندا
خش يا سيدي انا في زول جزم ما سائله
بزيارتك فرحت وبالحضور متفائله
إنت البركه يا الفوقك نياشين التميز خايله
برق القبلي في الضحوي اب سحابة شايله
إنت معانا ولا فرنسي يا هجام سموم القايله؟
#البشير
خربت عقولنا يا مهر البشاقره العاتي
شتلة فله ساقيها النسيم الشاتي
اقول ليك وجهتي وتشجيعي يا الخليتي باقي الريق نشف في لهاتي
من جدي وابوي وارث الميول كرواتي
#كوليندا
ايوووووو يوووويووووو
مما قمت عنتيل يا دوأ الممكون
بعد تأييدك تاني الباقي كلو يهون
عندي يقين معاك الكأس صبح مضمون
ارح نتمشي كيتآ لي الرئيس ماكرون
#البشير وبدء يتنسم من الهوشه
انا ود الكسر قلم الدخيل مكميك
ماكرون هسي قدامك اكفتو ليك
وحات وجناتك والنووي الظهر في عنيك
بي لعب او رجاله الكأس يكون في أيديك
#كوليندا
هيييع
منك واثقه يا الضو تركة العباس
ضربك للخصيم جتره وتفلخ راس
انت الهيبه والباقين مجرد ناس
وقوفي امام فخامتك اهم من الكاس
#البشير
مااا تخليني اهوش يا الوجنتيك بتحبو
جننتينا يا الجدي المرق من تبو
اخلي حميدتي بالدعم السريع ينكبو
نقلعو ليك رجاله وضكره يا الفي بسمتك كل القلوب انصبو
القاسمي مليزوفيتش

تعليق 1 “مجادعة شعرية بين البشير ورئيسة كرواتيا !

  • August 20, 2018 at 6:27 pm
    Permalink

    الله اكبر

    Reply

Leave a Reply

Your email address will not be published. Required fields are marked *

error: Content is protected !!