“يوميات علوب” (79) … الكنداكة ليزا

طبعا الجماعة المتابعين (يوميات علوب) والتي توقفت بعض الشيء لما مر به الوطن من ثورة كانت ولاتزال تصنع المشهد وأخذتنا معها ….
فالجماعة المتابعين كلكم بتتذكرو (ليزا ) ..!!
ليزا ياخ الخواجيه ديك الكان لاقيتا زماااان في لندن…!
(تسمع لندن تقول مشيت اقرا اكسفورد…!!)
ياهو الناس البعزمونا بتاعين جمعية الكلاب ديلاك كل مرة بنجي نحضر اللمة دي…!!
والجماعة جادييين.. كلو (كلب) بي إسمو وعنوانو واسم العايلة.. معلقنو في سدرو..!!
(غايتو كلابنا ضاعت ساكت المسكينة كلهم مسجلين خطر…!
وفِي (جريوات) كدا غايتو حلات الدنيا عليهم جنس لطافة وأدب..
بعطسو بس…!! مافي هوهوا والكلام الفارغ الزمان داك…!!
وكت تقول ليك (ااايتشووو..) بس فضل ليها تخت المنديل..!! كلاب متربية باخ…
طبعا ديل الحرامي لو جا عادي بسرقم هم ذاتم…!! نحن الكلب بمرق الصباح يجي البيت تاني يوم الصباح…!! (دا لو في بيت)… ولاوي بوزو…!! والعيون حمر…!!
(قاعدين يمشو وين الكلاب ديل…!!)
أها وباقي الكلاب الكبار المشاركين هناك ديك يازوووول… شهادات الميلاد… !! وفصيلة الدم… والتطعيم..!! والجوازات… فضل ليهم يرأسو (الفيفا)…!!
واحدة كدا جايه من (جورجيا) جايبا كلبا من هناك يشارك في (الكولمبياد) ده..!! قالت (سورمي) تعب.. غير معاه الجو..!! هياااا سورمي…!! (سورمي) أنا قايلو عمها جاي معاها محرم..!!! طلع دا الكلب ذاتو..!! قلتا ليها نحن كلبنا بكون غاتس تحت (السببل) ساعتين…!! ضارب (الكنداشه) يمرق يتنفض ويمشي في درجه حراره (أربعين) 40 علي (الكوشة ) دايركت..!! يشوف الفيها النصيب ويبقي مارق..!!! وحاتك ولا بقول…(هو)…!
(أبو الكب ذاتو)…!!
قلتا ليها هسا دا اسمو (سورمي)..!!؟
قالت لي أيوا.. ( قالتا بالجورجي)
وسورمي طبعا القصة (بضم القاف) والشعر بالجنبه.. خجلتا أقول ليها ذكر ولا أنثي…!!
قلتا ليها نحن كلبنا إسمو (جر)..!!
صدقو قالت لي ( نايس نيم..!!) تكون لفقت مع (جورجيا) حقتا دي..!!! يمين الكلاب دي باقي ليها تضحك بس.. وبي أمانة في واحد منهم ضحك…!!! انا شفتو..!!! عاين لي كدااا وضحك ابن الكلب… ماعارفتو قاصد شنو.!! الكلاب بتحس.!! يكون عرفني مشخت للفارغة دي..!!
هل بتصدقو في مليونير مشهور كدا اسمو… منو كدا ماعارف..!! تتخيلو الراجل دا اتبرع بي كم مليون دولار (الدولار الواااحد دا)
قال لعلاج مرض نادر بصيب الكلاب…!! عندو اسم علمي كدا ما متذكرو… لكن المرض بتلخص في إنو الكلب او الكلبه لو اتخلعت لي اي سبب..!! بحصل ليها تجمد وتيبس في الأطراف وبترجع لي ورا… ( حركة ورا..!!)
يعني بتدق خلف…!! هو الكلب وكت بتخلع قدر دا (الكلبنه) ليهو شنو طوالي يعتزل ويبقي (أرنب) ..!! المهم يازول عمك اتبرع بالمبلغ دا كلو لأبحاث التوصل الي علاج للمرض..!! عليك النبي شوف القصة دي ذاتا كيف..!!
نحن راجعين حركة ورا دي لينا (تلتين) سنه زول سااااكت.. قال لينا في شنو..!! ولا الحاصل شنو.! مافي ….!!! دنيا (كليبه)..!! ناس (الكجم) اكتشفو المرض دا من زمااان كان بجرو الكلب من ضنبو يرجعو بيهو خلف.. والضحك شارطم..!! الكلاب ذاتا تحس بيها مبسوطة وسعيده دايرا تطير من الفرح…!! غايتو كلب ناس (حاج التوم) كان جا هنا كان اتفقع من الضحك..!! العجب لما اتلملمو كلهم قالو في كلب إتشرق… ( دا كلام دا…!!) تكون شرقتو حلاوة (الحنين)..!!! بوظو الكلاب دي إنتهو منها غايتو..!! وواحده كمان أمريكية كدا اسمها (ليونا) كتبت وصيتا لي كلبا بي (اطناشر) مليون دولار…) دولار ينطح الدولار..!! كلبا أسمو (ترابل)..!! قالت (وفي)..!! كلب جيرانا (ماعندو اسم طبعا)..!! أسمو (كلب) مما وعينا وفتحنا عيونا هو قاعد معاهم..!! اها بعد العشرة دي كلها يوميا بصبحو عليهو بي (قالب طوب) وهو ماخد الموضوع عااادي .. ومرات بهز فيهم..!! أبو الكلب ذاتو..!! (كالب) شديد.. دي الورثة ولا بلاش..!! ناس (أمونه) عندهم قضية ورثة مع (خالم).. ليها خمسة سنين مدورين محاكم في تلاته دواليب وخزنة مصدية كدا…!! وفاضيه…!! قالو بتذكرم المرحومة..!! والله مافي مراحيم غيركم… وبالمناسبة كلب ناس حاج التوم دا.. بدخن
غايتو الشي الوحيد البغفر ليهو ايام المظاهرات ديك كان بهوهو شديد وعادي ماشي مع الشباب… كان موقفو واضح صراحة.. والسر جارنا دا مره قال لي سمعتو باضاني دي بكورك (مدنيه)…!! ياخ ليه حق والله…!! قالو شالو اللحم وأدونا العضم…!! يمين ديل العضم ذاتو قامو بيهو…!! (عووويااااو)… من حقك يا ابوالكا… عفيت منك خلينا ياخ من الكلاب والهوهوا والكلام الفارغ دا نرجع لي ليزا اللذيذة…!! طبعا الخواجات ديل أصلو مابغيرو أرقام تلفوناتم..!! بموتو بيها..!! نحن ساي لو جاتك (قرفة) بتغير أبو ذاتو وتبيع الشركة كلها.. وهم ذاتم بستاهلو البيع..!! قطعو مننا النت والمسلسل في الحلقة الاخيرة لكن الحمد لله تمينا بطارية.. رجالة كدا… وهي ذاتا طلعت ما الاخيرة المسلسل مكسيكي..!!
لكن هم ذاتم عرفو إنو نحنا ذاتنا (مكاسيك) والفورة مليون..!! أصلو ما في مشكلة والله تاني بس ياهو البيع دا…!! البمشي صاح بنمشي معاهو.. أي لولوة وجرجرة..!! تسقط بس..!! وكت اصلو طلعتو عديمين عشرة قدر دا.. المهم يازول ضربتا ليك لي ليزا بعد الغيبة الطويلة دي.. ولميت ليك فيها…!!
ايوااا قبل ما ألم فيها…. ضربتا أول لقيتو مغلق اداني رسالة قال لي شنو كدا ما عارف..!! كلام الخواجات الملكلك دا…!! المهم في النهاية صفر صفارة طويلة كدا.. طوالي انا اتكلمتا كلمتين مازدتهم…!! قلتا ليزا.. ليزا … بس كدا… يازول بس بعد دقيقتين كدا رجعت لي..!! (ناس جعفر في الحلة الرجوع الا تاني يوم)..!!
(وما بنرجع الا الرصيد يرجع )… قالت لي (سم ون كول مي هير هو آر يو) ‏some one call me here ..who are you
الله لاكسبك ياليزا ياخ… هو نحن امتحانات الانجليزي دي ماصدقنا فارقناها تاااني جبتينا ل(القرامر) والمرض دا..!! قربتا أقول ليها مافي خيارات..!!؟ المهم قلتا ليها مي مي me me.. انا (علوب)
يا ليزا….!! علوب التانيه دي قلتها بالإنجليزي (الوب)…!! عشان تفهم… وردت الصاقعة.. اووو… الووووب… هاو آر يو…!! قلبي دا قال شححححححح…!!
قلتاليها تمام تمام..!! (قود) (قود) يازول عربي مع الانجليزي خياته جد.. قالت لي يو آر كدددنغ..!!! (كدنغ) دي جرتا شوية كدا..!!
(كدنغ دي شنو هي ذاتا !!!؟؟)
خلينا ياخ مالنا ومالا ممتحنين فيها..! بلا كدنغ بلا كدا،، واضافت الحمامة… (ريلي..!! آر يو هير إن لندن).!!؟؟ (خلاص دخلنا في.. (اللترتشا) انا بس مسكتا ليك في (لندن) دي قوي.. قلنا ليها… يس يس yes yes لندن..!!واضفتا ليها (سيريسلي ) بتاعة البت ديك نفعتني غايتو..!!! قالت لي (اوه ماي قود)..!! اتز بق سربرايز..!! قلتا ليها ايوه (فيري بق)..!! ( سربرايز ) دي إلا رجعت (قوق )..!!! قالت لي..!! وير آر يو ناو…!!؟؟ انا مرات بحس..! عرفتها قاصده انت وين هسا… (ساكت كدا بالإحساس..!!)
(هي المشكلة مافي اللغة المشكلة في الخواجات البياكلو الكلام ديل..) قلتا ليها (سيم بليس)
ياخ دي انا بالغتا فيها والله…. لما اتكيفتا من روحي…
الإنجليز ديل طبعا مابغيرو اي حاجه..!! الزمن دا لو ماخجلانين بثبتو محلو..!! اها نفس الحته النزلونا فيها المره الفاتت ياها ذاتا نزلنا فيها.!! ناس ولوفين خلاص.! عشان كدا قعدو معانا كم وخمسين سنة..!! المهم ليزا قالت لي (ات فايف أوكلوك اي ول بي زاير) خمسه شوكة حاكون هناك… وطبعا خمسة يعني خمسة… الواحد لو طقشتو عربية برضو بجي خمسه…!! وجات المشوطنة..!! أنا اخو القمحة..!! زي مطرة الليلة دي..!! رياح شمالية عكسية يازوووول فيلم اجنبي بس..!! البنطلون دا كيف والقميص والشعر متطاير… لونو اصفااار زي عيش الريف..! بس ذكرتني كديسة يس سيد الدكان..!! لكن هي ليزا.. ما ليزا (سماحة الخواجيات لي حدهن)…!!
طول العمود..!! تتذكرو لما كانو جو السودان معاها الوفد بتاع المتاحف داك ناس جيمس والمرا ديك.. عملت ضجه كيف..!!(بعانخي) نطق..!! المهم يازول أخدتني ليك بالأحضان..
غايتو انا استغفرتا واتوكلنا وبادلتها التحية.!! (فقه الضرورة)…!! الزها يعني..!!!؟؟ هي ذاتا الأعمال بالنيات… والنية سمحة… يازول وشبكتني ليك لندن نورت…!! وانت منور..!!! (بنات يرفعن المعنويات…!! (سلمى) تقول ليك بركه الما لاقيتك وألاقيك ليه… و(امونه) تلاقيك تقول ليك مالك زي العفصك لوري…!!!
يعفصك العفص (وداعة) يالسنيحة…!!
الله لاجاب باقيك….!! (وداعة دا منو..!!!؟؟) المهم أجمل مافي الموضوع إنو (ليزا) خلت اي حاجه في الدنيا وبقت تكلمني عن الثورة ياخ دي قالت كلام.!! يشهد الله قربتا اعرض.. قالت لي انتو ناس عظيمين.. وثورتكم عظيمة ونحن (وي آر براود)… وفخورين بيكم شديد..!! هل تتخيل إنو (ليزا) قالت لي و(الكينداكا) قاصدة (الكنداكة)..!! أنا هنا فاضل لي أبشر فيها بس وتجدعني بي (شبال)..بس ماعرفتا شبال بالإنجليزي يعني شنو..!! قالت لي ياسلام علي(الكينداكات) نحن
سعيدات وفخورات..!! طلعت الموبايل بقت توريني مقاطع من الثوره وهتافات البنات.. والمواكب.. ورسومات القيادة..!!
قالت لي (زي آر قريت ارتست)..!! قربتا اقول ليها جو (فنانين) تانين مسحوها كلها (خجلتا بس) ..!!!
خجلتا ليهم والله…
طبعا عادي ممكن يغمي عليها..!!!
وأحسست أنا بالغصة من جديد… دي كان وريتا باقي الفيديوهات كان ماتت…!! (هو نحنا مستغربين ومندهشين..!!!! خلي ليزا)..!!! المهم لقيتا ليك عارفه اي حاجه وعبرت عن حزنها العميق لفض الاعتصام بالطريقة الوحشية دي… قالت لي (اتز هاريبرل) وهاريبل دي طبعا الخواجات يستعملوها فقط في النووي والشديد القوي..!! لقيتا ليك عارفه كل التفاصيل…!!
(زمن الغتغتة والدسديس انتهي)
دخلت ليها في لحظة صمت عميق كدا حسّيت بالعبرة دي واقفا ليها في حلقا..!!
هم كمان لما يقومو للمشاعر دي أمانة ما صعببن..!!! بقطعوها قطيع..!! شكرتها علي الشعور الجميل دا.. وقلنا ليها ياها المحرية فيك..!! (المحرية) دي قلتها بالعربي عديييل..!! تفهما ولا ما تفهما دا موضوع يخصها.. والله دي (كتشنر) ما يترجما..!!
لكن الظاهر فهمتا…!! لانها غرودت لي عيونا زي الطيرة..!! لذيذه ياخ وأدخلتني ليزا من جديد في أجواء الثوره.. كوركتا في نص المكان (مدنيااااااااااو..)
وتذكرت الشهداء لهم المجد والخلود… فتحول طعم المدينة التي تضج بالحياة الي ماسخ ومر..!!
ثورة خلت ليزا تبكي وتفتخر كدا… فعلا ثورة عظيمة ملأت الدنيا وشغلت الناس..!! ولاتزال
بلادي يا سنا الفجر…
وينبوع الشذى العطر
سلام أنت ألحاني
وحلمي في الهوى العذري
افترقنا انا وليزا في ذلك اليوم علي أمل لقاء جديد…
حاكلمكم الحصل شنو… ومشينا وين
وليزا (نحنكا) ليك..!!!

Leave a Reply

Your email address will not be published. Required fields are marked *

error: Content is protected !!