ملوك القافيه حالي العاكره كيف رواقه
والشوق فاض سيولو الجارفات غراقه
الفي عينا سهما سننوا الطراقه
رميتو صايبه جوف ما بقرعو الدراقه
اريت لو أجمع الأحرف بيان ومعاني
ولغة الضاد علي نظم الغنا مطاوعاني
اوصف بيها شوقي اللي هواكي دعاني
و احكي مواجع الريده المعاها بعاني
يا نفس الرماد من المآسي شبعتي
في سوق العواطف دللوك وانبعتي
سهرك والألم اتمان هواك و دفعتي
خليك جافيه ما تطيعيني خالفي طبعتي
اليل ليل عشوفك ضووا يامصباحو
ما تخليهو في الأحزان بناجي اشباحو
منك عبرة الشوق والقماح ارباحو
عبرتو في الوريد لامن يلاقي صباحو
الحاميك ياجروح الغرام ماتبري
دافن أحزاني داخل وبره لابس صبري
مناي ياروحي من وجعو و مشقتو تبري
وأنا افداك فوق عمري ودماي تعبري
من عصريتو عاشقك بالشجون يتقلب
تحت اصفاحو حاس جمر الصنوبر علب
ريدك صارعو و بالشوق عليهو اتغلب
قلبو وطاهو في لجة غرامك وتلب
غيابك طال وفقدك ياما بشتن حالي
اتلف صحتي وحنضلي طعم الحالي
مع اوجاعي فقدك يالعزيزه اوحالي
أغني الشوق وابدأ مع الحزن ترحالي
كان حكمك زمانا وقسمتو الفراقه
معقول في القلوب ريدتنا مي حراقه؟
صحيح الدنيا لي عمر الفرح سراقه
كم غشتنا بي زيف لمعتا البراقه